14-муьн апрель сервор Догъисту дуз жугьоб дори э сер пуьрсуьшгьой эн журналистгьо, эн блогергьо ве эн желдлуье одомигьо. Пуьруьш сохе оморебу ниссохи эзуновлейге бире гъозиегьой эн ЧС, пул дореи зараливегуьрдегоргьоре ве унигее вожиблуье гъосуьтгьоре.
Э товун ловбиреи чапар гIови э Геджух
Сергей Меликов риз кеши: екиш хьэрекети нисе сохде пэхьни сохде коргьой човушгьоре. Овхьолете бу тебиетлуье хосиет – э сереботи омореи омбаре ворушгьо гIовдон пур бири ве лов бири. Э фикир эн сервор регион гуьре фегьм сохде омори гIови дуьруьжде вокурдеигьо. Силиссохие комитет бужу сохди гъонунепузмишие кор.
— Егенер мидануьсдуьт э товун секонеи е ченд рузгьо пушоте, гъобул сохде миемо зиедие чорегьо. Оммо гIов пур бири лап зу,- гуфди С.Меликов.
Зури зури дануьсдейм одомигьоре гировунде э де мескениге, сэхд сохде секонее жигере ве э гуьнжо овурде овхьолете эри хилоссохдегоргьо ве волонтергьо, фуьрсоре оморигьо э Дербентски район.
Пулдореи зараливегуьрдегоргьоре
Сервор республике э ер овурди гъэдергьой пулдореире:
Евэхдине кумеки – 15 675 монетгьо эри е одоми;
Зарали зереи э девлет – 78 735 монетгьо, пуч биреи гьемме девлете – 156 750 монетгьо;
Зарали зереи э жунсогъи: гурунд – 627 00 монетгьо, асант – 313 500 монетгьо;
Пуч биреи одоми – 1 567 500 монетгьо кифлете.
Эрзо доре оморени э социальни гъэлхэнди, эз МФЦ енебуге э «Госуслуги». Вэхд пуллуье кумеки дореи – е мегь, пуч биреи девлет – ним сал, зарали зереи э жунсогъи – е сел.
Секонесуьзи эн гIовлуье объектгьо ве хори лов бире фурамореи
Республике хьозуьр сохдени фикиргьо эри зиед гъувотлуь сохде секонесуьзи эн гIови дуьруруьжде вокурдеигьоре. Жирелуье секонеи и нуькерегьо Терек, Самур ве Сулак.
— Гирошдигьо – бигIэдотие овхьолети. Эри омбаревэхдине гъэрорномегьо вэгIэдо небу, — андуьрмиш сохди С.Меликов.
Гьемчуьн у гуфдири ки э келе шегьергьо гереки желдлуь норе товгьо эри тигьи биреи гIов. Э Догъисту эз сенигIэткорсохгьой МЧС, эн министерствой вокурдеи ве эз геологгьо э гуьнжо овурде омори десде эри борж берде э хори лов бире фурамореигьоревоз.
Э догъгьо бинелуье четини – хори лов бире фурамореини. И пушогьо хори лов бири фурамори э сер хуне э Цумтински район.
— Хилоссохгьо ве жигенлуье одомигьо кор сохдебируьт э жэхитевоз эри зиндегуни. ГIэил хилос сохде омори, оммо деде эз ерагьо муьрди, — мэгIлуьм сохди С.Меликов.
Э сереботи думон, эн ворушгьо ве сайловгьо вертолетгьой МЧС не дануьсдет нуьшде.
Энергетике: подстанцие «Приморская»
Жугьоб доренки э сер битIэгIрифи дореигьо э сереботи батмиш биреи «Приморски», С.Меликов мэгIлуьм сохди э товун вокурдеи чор тозе энергообъектгьоре э Махачкале. Угьо дешенде омори э федеральни программе – гьемме эз Догъисту дешенде омори 74 объектгьо.
«Приморская» девлет хьуькуьмети, республике нисе дануьсде дешенде пулгьой хуьшдере э у. Не денишире э и гье генешки доре омори технике ве бетон зере оморени.
— И гьелелуьгее чорегьои. Хьозуьр сохде омори программе хубте сохдеи электрокомплексе эри 2030-муьн-2036-муьн салгьо, — андуьрмиш сохди сервор регион.
У э ер овурди, ки э 2022-муьн сал гьееки э «Уруссиетлуье сетьгьоревоз» тогIин сохде омори программе зевер сохдеи муьхькемире. Э 2023-муьн сал доре омори 1,8 млрд монетгьо, э 2024-муьн сал – дуь гиле кемте, оммо э 2025-муьн сал дореи пул поюнде омори.
Э дузе эфир сервор эн министерствой энергетике ихдилот сохди: э Махачкале гъуьч сохде миев 11 лап четине фидергьо – 80% эн гьемме бура оморигьо. Угьо те зимисду гъуьч сохде миев.
Холинче ве хэберберигьо э товун эз кор вегуьрдеи
С.Меликов андуьрмиш сохди пуьруьшсохи холинчере, дешенде оморигьо э жигей фегьмсохдеи «Приморскире»:
— Ме нисе дануьсденуьм, гьейчуь у герек бу. Ве дузи эри эну нэгI, эри пэхьни бире эз четинигьой Догъисту.
У гьемчуьн рэгIд сохди хэберберигьоре э товун эз кор вегуьрдеи хуьшде:
— Эгенер ме восдорем билет те Москов, и гьечуь нисди, ки ме огол зере оморем эки Президент.
Э сер фикир, ки киниге вомухдени мере э гъэршуй желдлуье корсохгьо, С.Меликов жугьоб дори:
— Э ме екиш зобуни нисе гуфдире э товун гьерки бисдо. Эгенер гуфдиренигеш – ме тигъэт нисе доренуьм. У, ки гуфдирени зобуни, хуьшдени ю бежид темиз нисе бире.
У эз блогергьо гуфди, ки герек нисди гуфдире чуь пулгьой хьуькумет дуз хэржи сохде нисе оморе.
— Эгенер гьисди мэгIлуьмети – фуьрсит э гуьнжолуье органгьо. Гьевел те гуфдире, гереки э дорун кор расире.
Товгьой гIови, пожар ве пуьрсуьш эки желдлуье корсохгьо
Сервор регион гуфди эз желдлуье корсохгьо ки гереки гъимет доре овхьолете э иловлей товгьой гIови «Чиркей-Махачкала-Каспийск». Эки корсохгьо омори десдей эн жигенлуье одомигьо ве талаб сохдет поюнде вокурдеире. Э нуботлуье руз воисдембу фегьм сохде документгьоре, оммо шев э гьомбор сухдебу товгьо эз 36 млн монетгьо омбарте.
— Гьемме жигегьо э зир товгьой гIови э гуьнжо овурде омори э гъонун гуьре. Проекте э кор венгесдеи федеральни компание. Ки гъимет миду и одомигьоре? – руй бисдо С.Меликов.
У риз кеши: пулгьо доре оморигьо эри дегиш сохде товгьоре мидануьсдуьт кумеки сохде э зараливегуьрдегоргьо эз сайловгьо.
— Вокурдеи поюнде ниев, товгьо восдоре миев. Оммо воисдени, чуьнки жэгIмиет не терсу гъимет доре угьоре, ки имбуруз нисе дануьсде хьисоб бире хьовир иму.
Кор э Магомед Рамазановевоз ве плангьо
Э товун еклуье кор э жигегир эн пуреихдиерлуье нушудорегор эн президент э СКФО Магомед Рамазановевоз С.Меликов гуфди:
— Неки фикиргьой иму ежирелуьни – эки гъэролрномегьош омореним гьееки.
Сервор республике риз кеши: не денишире э ЧС, вокурдеи социальни объектгьоре поюнде ниев.
— Е программеш э товун миллетлуье проектгьо поюнде ниев. Четине везифеи, оммо гъэрор сохде оморенигьои, эгенер кор мисохим гьееки.
С.Меликов эз бэхшвегиргьой вохурдеи гуфди согъбоши эри очугъэ гофсохдеи.
