Э Хуней Дусди Махачкале бири вохурдеи жигегире Сернуьше Хьуькуьме Республике Догъисту Ризване Газимагомедове ве рэхьбере Федеральни идоре дерьёгьие ве нуькерие транспорте Андрее Тарасенко э десдей нушудорегоргьой уруссиетие ве ирански сенигIэткоргьо э транспорте.
Корисохигьо э гуьнжо овурде омори э гъэд Разименди гуьрдлемере Гьеммишеинее Уруссиетие-Ирански комиссие эсер фурухде-экономически гьемкоркии. Э у гъобул сохди бэхшвегири нушудорегоргьой хьуькуьмлуье ве жейлее беделе ирански десдере, Росмореречфлоте, ФГУП «Росморпорте», сенигIэткоргьо э дерёгьие транспорте, бизнесе ве екейгегьо.
Э везифе руз бири пуьрсуьшгьо, комики е гъэдер расире параменди фурухде-экономически гьемкоркии э гIэрей Уруссиетие Федерацие ве Исламски Республике Иран э е гъэдер мескен Догъисту, зиёд фирегьсохи гIэрейхэлгъие транспортни-бэхшсохдеие рэхьгьоре, э у гъэдер эз Каспийски дерьёгь, гьемчуьн зевер биреи экономически гуьнжуьндеие ТМК «Софун-Дорум»
Ризван Газимагомедов, шолуми гуфдиреи гъуногъгьоре эз нумине Серворе РД Сергее Меликове э догъистуние хори, бирмунди, чуьки серворгьо дуь вилеет доре жирелуье тигъэти параменди фурухдеие-экономически гьемкоркиире, фегьм сохде муьхькем сохдеи дуьтарафлуье экономически гъэножогъи чуьтам еки эз бинелуье рэхьгьо зурие гьемкоркиире.
Догъисту динлуь доре жирелуье гъэдуьр параменди гьемкоркиире э Ирановоз. Э песой суьфдеи нимсали 2025-муьн сале молфурухи э гIэрей Догъистуревоз ве Ираневоз зофру бири, оммо,ьиму виниреним минкини эри зевер биреи. Зиёд фирегьсохи дерьёгьие эз е ло э де лойге бердеи эз Махачкалински порт, гуьнжолуьи тозе бэхшсохдеие рэхьгьоре ве параменди дузовнее бесдеигьо э гIэрей предпринимателегьоревоз вилеетгьой эн имуре мидану ведеберде гьемкоркиире э тозе риз гъэдерлуьи. Бэшгъэ воисде бирмунде зевер бирение рэхьгьоре – параменди сафарие ве бердеие флоте э Каспийски дерьёгь. Догъистуре гьисди гьемме бинеден, эри сохде Махачкалере бинеревоз каспийски сафарие рэхьгьоревоз. Гуьнжолуьи гьеммишеине сафарие рэхьгьоре мвокуну тозе минкинигьо эри муьхькем сохдеи гуманитарни ве культурни бесдеигьо э гIэрей вилеетгьоревоз Каспийски регионе»,- шолуми гуфдиреи вице-премьер республике.
Р.Газимагомедов бирмунди биелуье гъэдуре Махачкалински дерьёгьие фурухдение порте э параменди гIэрейхэлгъие транспортни сироре «Софун – Дорум». Э хотур чуьки гъэзенжлуье географически овхьоле Махачкалински порт бири вожиблуье бесдеи э гIэрей дорумие регионгьоревоз Уруссиете ве портгьоревоз Республике Иран, гьевел гьемме портевоз Энзели э район Гилян.
Эри гьеммишеине корисохи гье у рэхьгьоре республике гереки сенигIэткоргьо. Унегуьре э бине колледже мошиневокурдеигьо ве гъуллугъсохигьо э нум Орджоникидзе вокурде омори тозе соводие рэхьгьо, бесде оморе э судовокурдеигьоревоз ве гIовие транспортевоз.
Рэхьбер Росморречфлоте Андрей Тарасенко, пуьруьш сохде гьемкоркиире э гIэрей Догъистуревоз ве Ираневоз, бирмунди боворини гьишде гьисдигьо пуьрсуьшгьоре э бедел фурухдение мэгIлуьмети.
«Имуре мерэгълуь бире неки шелебердеи э гIэрей вилеетгьой эн иму, оммо ве жигей ве жирей гирошдеи шелегьоре, чуьки вокошире рэхье гьемкоркиире э екейге риз гъэдерлуьи. Боворини доренум, чуьки иму миофим гьеммей гъэрорномегьоре э имбурузине вохурдеи»,- гуфдири Тарасенко.
Уруссиетие ве ирански лойгьо пуьруьш сохди минкинире вокурдеи контейнерни ризгьоре э гIэреи дерёгьие портевоз Махачкале ве дерёгьие портгьоревоз Иране. Э вохурдеи гьемчуьн фегьм сохди пуьрсуьшгьоре гуьнжолуьи гуьрдномере судоходни компани.
Э пуьруьшсохи бири ведеберде пуьрсуьш гуьнжолуьи игъроле эсер дерьёгьие фурухдеи э гIэрей дуь вилеетгьоревоз. Э гофгьоревоз жигегире министре ве серворе Э гуьнжо овурдеи портгьоре ве дерьёгьсимовзени г-на Саида Расули, ирански тараф хьозуьр гъобул сохде ве гъул кешире гьисдигьо когъозе, гуфдире хьозуьрлугъи эри параменди дуьлое гъээножогъигьо.
«Иран ве Уруссиет гьисди омборе войнегьо эри параменди бесдеигьо э фурухдеигьо ве бэхшсохдеигьо. Иму биё э кор венгеним веди бире минкинигьоре овурде хэйр хэлгъгьоре вилеетгьо эн имуре»,- риз кешири у э бирмудеи эн хуьшде.
Лойгьоревоз мэгIлуьмлуь бире пуьрсуьшгьо, комики фуьрсоре оморе э гъэрорноме еклуье игъиметгьоре э гIэрей уруссиетие ве ирание портгьоревоз, кори сохдеи дуь э екиревоз бердеие ризгьоре, гирошдение рэхьгьоре, овурде расундеи ве параменди портгьоре ве екейгегьо. Дошдеи ве хубте сохдеи гьиметгьоре э транспортни гъуллугъире бири еки эз бинелуье дэгъдэгъэгьо суьгьбет игъролбесдеигьо. Гуфдире омори фикир э товун герекии э кор вегесдеи еклуье гъимете эри бинелуье жире гъуллугъгьо, комики доре флотгьо гьердуь хьуькуьмгьо.
Р.Газмагомедов гуфдири боворини, чуьки Догъисту хьозуьр бэхшвегири сохде э везифегьоэсер гуьнжолуьи гьеймогьоинепассажирски флотилие, вокурдеи омборетарафлуье дерьёгьие жигере ве дешендеи Махачкалере э еклуье нуботноме гIэрейхэлгъие сафарие рэхьгьо э Каспие.
Э гъэд мэгIэнолуь биреигьо Серворевоз РФ ве Хьуькуьмевоз Уруссиете везифегьо эсер параменди МТК «Софун-Дорум» везифе нори жергей корисохигьо, комики фуьрсоре омори э дореи секонеисуьзи дерьёгьсимовзени, зевер биреи гъувотгьоре, гьемчуьн зиёд фирегьсохи шелее бинере дерьёгьие порте Махачкале. Гьемчуьн, везифе нори вокурдеи гьуьндуьретехнологични тэхуьлие терминалгьо ве тозе сохдеи контейнерни терминале.
