Эз 90 млрд монетгьо омбарте налогови ве налогсуьзе гъэзенжгьо диремори э еклуьгие республикански бюджет э 2025-муьн сал – зевер бири эз 30% омбарте. Планови тапшуьрмишигьо веровунде омори э 115%.
Ижире рэгъэмгьоре гуфдири Сергей Меликов э гуьрдлемей Комиссие э товун зевер сохдеи гъэзенж эн бюджет республикере.
«И гьелбетте, зевербиреини. Гье у вэхд фегьмсохи бирмундени, ки минкин зевербиреи эз хьисоб боржбери э соелуье экономикеревоз гьеле гьисди. Везифей иму – зиед сохде коре э и тараф», — гуфди сервор регион.
Жигенлуье бюджетгьо веровунде оморет э 109%: налогови ве налогсуьзе диремореигьо гуьнжуьнде омори 24,2 млрд монетгьо ве зиед бири э 30% той сохде омоге э пушотеине вэхдевоз. Оммо не денишире э у, ки гьемме муниципальни соводигьо веровундет планови гъэрхундигьой хуьшдере э товун гъэзенжгьо, эзугьо шеш не дануьсдет веровунде э пушо норе оморигьо везифегьоре.
Сергей Меликов гуфди, ки э омбаре гъозиегьо и бири э сереботи дуз э гуьнжо не овурдеи хорие гъэножогъигьоре, э сереботи жугьобдорсуьз веровундеи игъролгьой бесде оморигьо игъролномегьоре, э сереботи егIэлмишигьо э документгьо.
Серворгьой эн пес мундигьо муниципалитетгьоре гьееки э ведомствогьоревоз гъуллугъ доре омори фегьм сохде гуьнжуьнде оморигьо овхьолете ве эхире хьисобе сохде э товун сохде оморигьо кор.
Буьлуьнде бирмунушигьой веровундеи плане эри 2025-муьн сал веди бирени э жейлее тарафгьо:
— э се гиле зевер бири гъэзенж эз хьисоб налоггьо эри гешде ве офдеи тебиетлуье овгъотгьоре. У гуьнжуьнде омори 168,5 млн монетгьо, чуь э 118 млн монетгьо омбартеи эз эз гирошдигьо сал;
— патетни системе налогвенореи – 95,8 млн монетгьо, план веровунде омори э 149%;
— налог эри сенигIэтлуье гъэзенж, жирелуье налог эри одомигьо кор сохденуьтгьо эри хуьшде – 657 млн монетгьо, план веровунде омори э 178%.
«Карьергьо, эхирдеш, сер гуьрдет кор сохде эри экономике, ве и бараси эн жэгIмие келе кор имуни»,- гуфди Сергей Меликов.
У э ер овурди, ки э куьнде вэгIэдо сер мигируь кор сохде диеш дуь гъонунлуье карьергьо. Гьееки э уревоз, сервор республике риз кеши, ки гьемме объектгьо мие кор сохут э талабигьой эн молведешенденигьо ве экологически секонусуьзи гуьре.
Э зир рэхьберьети эн сервор Догъисту пуьруьш сохде оморебу барасигьой эн планови гъэрхундигьо э товун гъэзенжгьой эн региональни бюджет эри гирошдигьо сал, веровундеи бюджете эри зиед сохдеи налоге э 2026-муьн сал, гъонунлуь сохдеи «соелуье» тараф экономикере ве унигее пуьрсуьшгьо.
