Сернуьш Хьуькуьм эн Республикей Догъисту Абдулмуслим Абдулмуслимов э гъуллугъ эн Сервор РД эн Сергей Меликов гуьре гировунди гуьрдлеме э товун пуьрсуьшгьой параменд сохдеи сферей вишелуье хозяйстворе э регион.
Э план руз гьово гуьрде оморебу пуьрсуьшгьо, расиренигьо э параменд сохдеи вишелуье секторе, дошдеи биологически жир-бе-жуьрелуьире, зиед сохдеи вишелуьехозяйственни хоригьой республикере, гъобул сохдеи чорегьой боржберире э вишелуье пожаргьоревоз ве диеш.
Э гIэрей вохурдеи премьер-министр гуш дошди доклад эн рэхьбер ведомстворе Вагаб Абдулхамидове, гьемчуьн эн жигегиргьой энуре э эхире хьисобгьоревоз э товун гировунде оморенигьо кор э назари сохде оморенигьо тарафгьо.
А.Абдулмуслимов гуфди э товун гереклуьи системни жирей корисохи эри параменд сохдеи вишелуье хозяйстворе, тигъэте до э вожиблуьи э кор венгесдеи гьеймогьине технологиегьоре ве муьхькем сохдеи гъэдерлуье-ихдиерие бинере.
«Више – и жэгIмие гIошири имуни, иму уре мие дорим ве зиед сохим, э риз хуьшде гъобул сохде гуьнжолуье чорегьоре. Э имбурузине руз вишелуье хозяйствой республикере гьисди омбаре четинигьо, эри гъэрор сохде угьоре гереки гъобул сохде гереклуье чорегьо. И ве э 2025-муьн сал омбар биригьо вишелуье пожаргьо, ве четинигьо, биретгьо э кор венгесденки, гъэлхэнд сохденки ве гъонунсуьз бурраи доргьой вишере, гьемчуьн четинигьо, ологълуь гьисдигьо э кеме пулдореи отрасле»,- сер гуьрди гуьрдлемере премьер-министр. Э эхире хьисобгьо эн докладхундегоргьо гуфдире оморебу, ки э гIэрей миллетлуье проект «Экологическое хуьшхьоли» э 2025-муьн сал э 464 га. мульк вишегьо кошде оморебу доргьо. Гьемчуьн бегьем те эхир веровунде омори плангьой зиед сохдеи вишелуье битмишигьо ве агротехнически гъуллугъсохире – 317 га. ве 1750 га.
Зиед биреи гъэдер вишелуье пожаргьо э 2025-муьн сал, э гофгьой сернуьш Комитет эн вишелуье хозяйство гуьре, ологълуьни э хуьшге ве герме гьоворевоз, гьемчуьн мегьгьой гьеминон нисе оморенигьо ворушгьоревоз, жейле э июль-август эн 2025-муьн сал. Кор э товун нисд сохдеи пожаргьоре, хьэсуьл оморенуьтгьо э догълуье районгьо, эже нисди рэхь омореи, четин бирени э сереботи эни вогьнегьо:
«ВэгIэдо, рафденигьо эри овурдеи гъувотгьоре ве овгъотгьоре эки жигей пожаргьо, вегуьрдени эз 2 те 5 сэгIэтгьо. Э гIэтошевоз боржбердегоргьо э пейде варафденуьт э сер догъгьо, берденки э сер хуьшде шанцеви карасдире, хуреке ве гIове эри хурде. Куьшдеи пожаргьоре э кор венгесденки авиациере гьеммише барасилуь нисе бире э сереботи дури жигей вегуьрдеи гIове, эн тики дэхьэргьо, четин сохденигьо куьнд биреи авиациере эки жигей пожаргьо, гьемчуьн э сереботи буьлуьнде гъимет. Эзу товун фегьм сохде оморени пуьрсуьш восдореи эз хьисоб бюджет эн Республикей Догъисту юклуье дронгьоре, комигьоки вокоширенуьт те 100 кг. Эри овурде расунде гIове ве де укгьоре те жигегьой пожар»,- гуфди сервор Комитет.
Э план гуьре денишире оморени бегьем сохде миев коргьой хьозуьр сохдеи жигегьоре эри норе 40 видеокамергьоре э вишегьо эже бежид бирени пожаргьо (э 2026-муьн сал видеокамергьо восдоре миев э 21,1 млн. монетгьо.).
Э товун овхьолет э сферей параменд сохдеи вишелуье хозяйстворе ихдилот сохди жигегир сернуьш Комитет эн вишелуье хозяйство эн Респуликей Догъисту Алимурат Муртазалиев. У риз кеши, ки у вожиблуьни эри кошде веровундеи вишелуье хозяйствой хуьшдере чуьнки регионе бу гъоимлуье кошденигьо молгьой хуьшде. Гьер сал э 3 га. кошде веровунде оморени 900 гьозор тек гIэдотлуье кошденигьо мол.
Жигегир эн сернуьш Комитет эн вишелуье хозяйство эн Республикей Догъисту Салам Абдуллаев ихдилот сохди э товун гировунде оморенигьо кор э гIэрей э кировегуьрдегоргьой вишелуье муьлкгьоре ве эн могьлугъ э товун зевер сохдеи жэгIмие ризе жугьобдорлуьире эри дешдеи тебиете.
Жейле пуьруьш сохде оморебу пуьрсуьшгьой назари сохдеи пулгьоре эри э кор венгесдеи вишегьоре.
Э артгьой пуьруьшсохи гуьре Абдулмуслим Абдулмуслимов дори е жерге гъуллугъигьо Комитет эн вишелуье хозяйствой эн Республикей Догъистуре э товун зевер сохдеи хэйрлуьи коре.
