Суьфдеи «биразиегъемверфие галерее» вокурде омори э догъгьо Догъистуре. Э товун эну э корисохи корлуье рафдеи э Тляратински улке э десдеи нушудорегоргьо э сервори э премьер-министревоз Абдулмуслиме Абдулмуслимове мэгIлуьм сохди жигегир министре транспорте ве рэхьие сэхьиблугъигьо РД Магомед Тагиров.

Э гъэд дуьруьжде вокурдеи автомобильни рэхье Анцух-Тлярата км 0-12 Минтрасевоз Догъистуре бегьем сохде дуьруьжде вокурдеире — «биразиегъемверфие галерее» Объекте э кор венгесде уже э экуьнди гьисдигьо вэхд, э сер эну мибу э гуьнжо овурде секонесуьзе жуьмуьсдеигьо.

«Гье у сейрекие ве бугьолуье дуьруьжде вокурдеи, комики норе оморе э гье у жигегьо, эже гьерсал э ёгъинлуье жиге фураморе гъэм верфи, э уревоз э гуьнжо овурде терсдии бэхшвегиргьоре рэхьие жуьмуьсдеире. Гье у муьлк гьеммеекире лап хуб мэгIлуьми – э 4-муьн километре эз дигь э автомобильни рэхь Анцух-Тлярата. Гьер сал инжо фураморе гьем верфи, сэхд сохде э омборе вэхд жуьмуьсдеи транспорте, кими вэхд ве рэхь нуькере сэхд сохде, чуь доре келе четинигьо. Э куьнде вэхд уже везифе нори э кор венгесде уре ве э гуьнжо овурде э унжо жуьмуьсдеире. Бэхшвегиргьо жуьмуьсдеире имогьой э пуре секонесуьзи мидану боворини эз гурунди гирошде гье у муьлке рэхье», — мэгIлуьм сохди М.Тагиров.

И пушогьо объект бири бирмунде Сернуьше Хьуькуьме РД Абдулмуслиме Абдулмуслимове э корисохи корие рафдеиревоз э Тляратински улке. Премьер-министр хубе гофгьо гуфдиреиревоз Минтрансе Догъистуре э песой гировунде оморе барасилуье коре э сер хубте биреи секонесуьзие болосуьзе жуьмуьсдеигьо э догъие жигегьо республике.