13-муьн октябрь э зир рэхьберьети эн суьфдеи жигегир эн Сернуьш Хьуькуьм эн Республикей Догъисту Руслан Алиев гировунде оморебу планови гуьрдлеме эн Хьуькуьм Республикей Догъисту.
Э гуьрдлеме пуьруьш сохде оморебу вожиблуье пуьрсуьшгьо, э и хьисоб пуьрсуьш э товун э гуьнжо овурдеи фикиргьой эн социальни-экономически параменд сохдеи Республикей Догъистуре эри 2026-муьн сал ве эри 2027-муьн-2028-муьн салгьо, э товун дешендеи дегишигьоре э план восдореи хьуькуьметлуье девлете, э товун проект эн гъонун республикански бюджет эри се сал ве диеш.
Суьфде э гуьрдлеме пуьруьш сохде оморебу пуьрсуьш э товун фикир эн социальни-экономически параменд сохдеи Республике Догъистуре эри 2025-муьн сал ве эри вэхд 2027-муьн ве 2028-муьн салгьо.
Р.Алиев гуфди, ки э гуьрей эн кор сохденигьо низом эн Министерство экономике ве эн мескенлуье параменди эн Республикей Догъисту хьозуьр сохде омори пушокие фикир эн социальни-экономически параменди э дуь жире – базови ве консервативни.
«Гереки гуфдире, ки экономикей Догъисту бирмундени боворинлуье зевербиреи. Э артгьой эн гирошдигьо сал гуьре иму виниреним хубе дегишигьоре э гьемме бинелуье бирмунушигьо. Гьееки э уревоз, экономикей иму пес мундени эз миенееуруссиетие бирмунушигьо э хьисоб вегуьрденки гьер одомире. МэгIнолуь пес мундени э гъэдер фуьрсоре оморигьо молгьо, э риз миенее мегьине муьзд жофои ве эн унигее бинелуье бирмунушигьо»,- гуфди суьфдеи вице-премьер.
Руслан Алиев риз кеши, ки республикере гьисди омбаре минкингьо эри параменд биреи.
Э бинелуье докладевоз э товун эни пуьрсуьш э гуьрдлеме нушу доребу министр экономике ве эн мескенлуье параменди эн Республикей Догъисту Гаджи Султанов.
Министр кутэхьэ тегьер ихдилот сохди э товун овхьолет эн гирошденигьо сал. Ведини зевербиреи ведешендеи дигьлуье хозяйственни молгьоре – э 2%, гъэдер коргьо, веровунде оморигьо э жирей корисохи «Вокурдеи», — э 1,9%, фурухдеи молгьоре – э 1,1%, гъэдер эн пуллуье гъуллугъигьой одомигьо – э 2,4%.
«Гьечи, гъэдер эн региональни молгьо э артгьой эн 2025-муьн сал гуьре гуьнжуьнде миев экуьнди 1,3 трлн монетгьо, зевербиреи эки пушотеине сал гуьнжуьнде миев 3,2%. Бирмунуши эн молведешенденигьо корхонегьо э пушотеине гъиметдии гуьре, гуьнжуьнде миев 107%. Кошде веровундеи дигьлуье хозяйственни молгьоре зиед мибу э 3,5%, дешендеигьо э бинелуье девлет гуьнжуьнде миев 107,7%. Гъэдер эн рознични фурухдеи, гъэдер эн жэгIмиетлуье молгьой хуреки ве гъэдер эн пуллуье гъуллугъигьо э одомигьо, э гирошденигьо сал зевер мибу э 1,9%, 2% ве 2,2%», — мэгIлуьм сохди сервор эн Министерствой экономически параменди эн Догъисту.
Гьемчуьн нушу доребируьт рэхьбергьой эн Министерство жофо, эн Министерство дигьлуье хозяйство, эн Министерство корхонегьо ве алвер ве эн Агенство э товун сэхьибкоргьо РД.
Р.Алиев органгьой веровунденигьо хьуькуьме дори гъуллугъ расире э мэгIнолуье бирмунушигьо эн социальни-экономически параменди эн Республикей Догъисту эри 2025-муьн сл ве эн планови вэхд 2026-муьн ве 2027-муьн салгьо э назари сохденигьо тарафгьо.
Дуьимуьн пуьрсуьш гуьрдлеме бири проект гъонун эн Республикей Догъисту «Э товун республикански бюджет РД эри 2026-муьн сал ве эри планови вэхд 2027-муьн ве 2028-муьн салгьо».
Э хьисоб эн бинелуье минкингьо суьфдеи жигегир эн Сернуьш Хьуькуьм республике бирмунд социальни сферере.
«ЖэгIмие гъэдер хэржигьо эри социальни политике, дошдеи жунсогъире ве соводи э 2026-муьн сал гуьнжуьнде миев экуьнди 117 млрд монетгьо. И – эз 56% омбартеи эз гьемме хэржигьо эн республикански бюджет», — гуфди Р.Алиев.
Не денишире э пушоте тэгIбир сохде оморигьо гъити, гуфди суьфдеи вице-премьер, бюджете гьисди минкингьо ве эри параменди.
«Омбаре пулгьо дешенде омори эри тозеден сохдеи коммунальни инфраструктурере, параменд сохдеи транспортни сетгьоре, э и хьисоб вокурдеи ве гъуьч сохдеи рэхьгьоре, гьемчуьн эри э кор венгесдеи проекте э гIэрей еклуье параменд сохдеи мескенгьой дигьгьоре ве чуькле шегьергьоре.
Проект мие э гуьнжо овурде биев э хьисоб вегуьрденки гьэгъигъэтлуье минкингьоре ве гирошденигьо макроэкономически овхьолете», — гуфди Р.Алиев.
Э пуре тегьеревоз э товун бинелуье гъэдергьой проект эн республикански бюджет нушу доребу веровундегор гъэрхундигьой эн министр финансгьоре эн Республикей Догъисту Шамиль Дабишев. Сервор министерство риз кеши, ки проект эн гъонун эн республикански бюджет эри 2026-муьн сал ве эн планови вэхд э гуьнжо овурде омори э гуьрей эн кор сохденигьо федеральни ве республикански гъэдерлуье актгьо.
Шамиль Дабишев мэгIлуьм сохди, ки гъэдерлуье бирмунушигьо эри 2026-муьн сал вихде омори э гъэзенжгьо гуьре э 207,1млрд монетгьо, э хэржигьо – 207,6 млрд монетгьо.
Эри социальни гъувотдореи одомигьоре доре миев 30 млн. монетгьо эри гировундеи газе те серхьэд хунегьо ве эри восдоре газови оборудованиере эри хуне. Эри восдоре путевкегьоре эри гIэилгьо ве жовонгьо доре мев 430 млн. монетгьо, и э 17 млн монетгьо омбартеи эз гирошдигьо вэхд.
Э товун артгьой пуьруьшсохи Руслан Алиев гъуллугъ дори зиед сохде коре э сер проект бюджет э комики мие бэхш вегинуьт мерэгълуье тарафгьо. Хьозуьре проект эн бюджет бирмунде миев э Сервор Догъисту э Сергей Меликов ве песде фуьрсоре миев эри фегьм сохе э Гуьрдлемей Хэлгъи.
