Алёна Абрамова: «Чуь не бисдо не пой э е жиге»

Кейки у поисдени э ён духдергьой хуьшде, минкинсуьзи дануьсде, кини эз угьо деде, ве ки — гlэил. Гьемме угьо жогьили, нерме-назуьклуьи ве спортивни. Оммо гье и жовоне зен неки жогьили, оммо диеш ве гъувотлуьи жуневоз. Имбуруз иму меслэхьэт сохденим э Алёна Абрамова.

— Алёна, ихдилот сох э иму э товней гlэильети туь: эже туь хьэсуьл оморей, эже тербие вегуьрдей?

— Ме хьэсуьл оморем э Дербенд э 1982-муьн сал. Унжо зигьисди гьемме кифлет эн ме, э у хьисоб келебебегьо э келедедегьоревоз, холегьо, гlэмлегьо. Э 1985-муьн сал иму э кифлетевоз рафдейм э Пятигорск, ве те 1998-муьн сал иму зигьисдейм э унжо, тейте не рафдейм э Исроил. Э Пятигорск ме тербие вегуьрдем э школей жугьури «Геула». Э гье и школе имуре тербие дори жугьури динлуьигьо, иврити. Ве унегуьре, кейки иму рафдейм э Исроил, мере бу комининиге бинелуье иврит. Гъэрезки мере бу 16 сал, фубердеи гирошди эри ме асант. Ме зури-зури шинох бирем э зугьуневоз, вегуьрдем менталитет израильтянгьо ве рафдем э хундеи э коледж э отделение компьютерни графике, эже шинох бирем э шуьвер хуьшдеревоз.

— Ини эз и жиге те гьер гофие ихдилот сох. Э товун кифлет хуьшде ихдилот сох.

— Шуьвер ме гьемиге хьэсуьломорегор Дербенд, омори э Исроил э деде-беберевоз э гlэилие гlуьмуьрлугъи. Эз е салиге эз шинох биреи иму эвленмиш бирейм, имуре хьэсуьл омори чор духдер. Э и зуригьо бэгъдовой хьэсуьл омореи чуьклеи духдергьо, дуьдуьнеигьо Шира ве Зоар, иму э шуьверевоз руйбирейм эки дин-догlоти тегьер зиндегуни: эз гъонун не ведарафденим шоббот, кашрут ве гьеммере чуь е гъэдер расирени егьудии гlэдотгьоре. Э вэхдгирошдеи лап омборе вэхд, экуьнди 15 сал ме кор сохдем менеджери э еки эз лап дуьруьжде сетевой тукунгьо Исроил. Э 36 сали э ме расири келе беди: шуьвер ме бихэбер рафди эз зиндегуни. Мундеи тэхьно э чор гlэилевоз, ме тозеден миё бирем вокурде зиндегуни хуьшдере шуьверсуьз.

— Алёна, ме, чуьтам екиш, туьре варасиренуьм. Омборте 17 сал песево ме вир сохдем шуьвере. Эгенер э ёр овурде гьемме гье и, нефес кешире минкинсуьзи, фегьм сохде, гоф сохде: дуьлести шоле веноре гъолинде гурунди хуьшдеревоз ве дегуьрдени туьре битов, вогосунде э хори. Ве вэгlэдо хос не сохде, екем евош сохде дорд.

Гlэмел миёв ми вокурде плангьо э биёвгьо бэгъдовой вирсохи куьндлуье одомире?

— Эгенер гье и гереки гlэилгьой туьре, эри гlэмел миёв. Э хотур гlэилгьо гереки гъувотлуь бире, ве боворини э Офирегор кумеки дори мере э гье и ве не дори офдоре э лугъондлуье хьолсуьзи. Ме варасирем, чуьки духдергьой мере гереки гъувотлуье деде ве гьеммишелуьг тефило хундем, Офирегор шиновусди мере.

— Чуь туьре хьэвеслуь сохди э гье и кор, чуь кор туь гьейсэгlэт сохдени?

— Ме дануьсдем ёгъин, чуьки воисдени кумеки сохде э одомигьо хуьшдере хубте гьис сохде, ве рафдем э хундеи вегуьрде э альтернативни медицина рефлексологие, косметологие. Э август 2023-муьн сал ме вокурдем эн хуьшдени сэхьиблуье салон. Гурунд бу, оммо ме дануьсдем эз дес вероморе миёв. Эз гьемме омборетегьерие альтернативни медицина ме вихдем рефлексологие. Гье и хундеи омори эки иму эз гъэдимие Индие ве Китай. И хос сохдеи эз кунпои, чуьнки кунпои гьисди карта беден одоми. Э кунпои гьисди рефлекторни нуьгде, коминики кори сохде дуь э екиревоз э гьер беден жендек имуревоз. Кунпои диеш нум гуьрде оморени чуьтам дуьимуьн дуьл одоми. Гьемме те гьемме э кунпои гьисди омборте 60 желдлуье жигегьо ве гирошдени омборе вожиблуье каналгьо. Гьелбетте, ме гене кор сохденуьм э косметологие, воисдени сохде одомигьоре зиёдте жунсогъи ве рач. Кейки виниренуьм хубе барасигьо жофой хуьшдере ве шиновусденуьм гофгьо согъбоши гуфдиреи, вегуьрденуьм ижире софо, чуьтам ве оморегоргьо эки ме одомигьо.

— Ихдилот сох э иму э товней духдергьой хуьшде.

— Ме гьеммише хьэрекети веноре эри чуьки духдергьой ме эки гъулбенди хуьшде жугьоб доре одоми бируьт, гьеммише хьозуьрлугъи омореи кумеки доре э михьтожлуьигьо. Келеигьо духдергьо гъуллугъсох гъушун, еки эз угьо – э гъовхои бедел. Угьо келе ватанхогьгьо ве лап хосденуьт чуькле, оммо гъувотлуье Ватан хуьшдере. Эри угьо бу ёгъин варасирени ве очугъ, чуьки угьо гъуллугъ мисохут э гъушун ве эри доре гъэрд хуьшдере вилеет хуьшдере, э комини хьэсуьл оморет ве келе бирет.

— Гъозиегьо 7-муьн октябрь 2023-муьн сал дуьлдэгъдэгъэ дори неки Исроил, оммо гьемме гlуьломе, чуьтам ишму ветовусденит те имогьоиш гье и бигlэдотие гъозиегьоре?

— Гьозиегьо 7-муьн октябрь гьелбетте корисохди э гьемме, чуь гирошдени э вилеет: гьемме гуйге чуьн муьрди э комининиге вэхд. Хуьшдени ме винирем э гье у гъозиегьо диеш е синемиши Офирегор ве фегьмсохи боворини имуре, эзу товун ки э гье у вэхд хэлгъ имуре гуьрди боворини э Офирегор, ве иму диеш омборте муьхькем бирейм э у. Гьемме исроили хэлгъ дори хуьшдере э Худо.

— Мэхьшовой иму езугъи э тойсохи э у гьеммишелуьгиревоз, коминире иму дорун расире не даним. Эгенер гlэмел миёв э рэхь офторе э гьевелине вэхд, чуь ми туь дегиш мисохди э зиндегуни хуьшде?

— Ме гьичиш дегиш ни сохдуьм э зиндегуни хуьшде, чуьнки боворинуьм: Гьемме, чуь бири, гьисди ве мибу гьеммише э зиндегуни иму, эз вэхд зуте нушу доре омори Офирегоревоз. Теклуье, чуь имуре гьисди, гье и ихдиёри вихде: бире хубе одоми, рэхьмедуьл, бегьем сохде хубе коргьо енебуге эшкуново. Худо гьисди, не денишире эз иму куьнд омореи эки эну.

— Алёна, чуь туьре дуьлпесои доре э зиндегуни?

— Ме фикир сохде, чуьки э зиндегуни лап вожиблуьи хуьшденпараменди, гlэмел нисе оморе поисде э е жиге. Гурунди паруьсде – вирих, гурунди вирихде – пойноре рэхь биё, гурунди рэхь рафде – э чорченги гешд, оммо чуь гъозие не бисдо не пой э е жиге, параменди бош ве хубте бош.

Параменди гlэмел миёв бире э гьемме сферагьо, угьо лап омборе гъэдери.

— Гоф сохденит ми э кифлет ишму э жугьури?

— Эри, э кифлет иму гоф сохденим э жугьури. Гоф сохденуьт деде-бебей ме, деде-бебей шуьвер. Гьелбетте, гоф сохденим ве иму э бироревоз ве хэгьеревоз. Ве гьеле гlэилгьой ме, коминигьо хьэсуьл омори э Исроил, екем варасиренуьт ве гуфдиренуьт э зугьун дедеи хуьшде.

— Ки эз гьемме омбор кори сохди э туь э зиндегуни туь?

— Гье и белкине гьечи оморени биразие гофсохи, оммо эз гьемме омборте э ме кори сохди гlэилгьой ме. Гьэгъигъэт, э гlэилгьой хуьшде иму виниреним чигьрет хосиет хуьшдере, минкинигьо хуьшдере, верзуьшлуьигьо ве гъувотсуьзе лойгьо хуьшдере.

— Чуь мигуфдири туь э товун хуьшде э се гофевоз?

— Деде, духдер, зен.