Гуьрдлемере э товун дегиши гъимете э сер жейлее жирей молгьо э хэржисохие фурухдение жиге э Республике Догъисту гировундебу Сернуьш Хьуькуьм РД Абдулмуслим Абдулмуслимов, 24-муьн июль.
Э регион фегьм сохде оморени зевер биреи гъиметгьо э сер жейлее жирегьой молгьо, э сер гушд гови ве гусбенди. Гьечи, э даннигьой Догъистустат гуьре, миенее гъимет эн гушд гусбенди э май 2024-муьн сал гьунжуьнде 735,7 монет эри 1 кг. Гъимет гушд гови э май 2024-муьн сал гьунжуьнде омори 535,4 монет эри 1 кг.
Гьееки э уревоз, гъичи гушд э хуреклуье рынокгьой республике веди нисди. Догъисту хуьшдени ю дорени хуьшдере гушд гови ве гусбенди.
Гереки э ер овурде, чуьки гъонун Уруссиетие Федерацие тог1ин сохди, чуьки гъиметгьо э сер молгьо нисе дануьсде бире хьуькуьмлуье рэхьбери, гьисди азадлуье ве э гуьнжо овурде оморенигьо эз бире э фурухдее жиге гъойде.
Нум доренки гъэножогъире эки эни пуьрсуьш эз лой жейлее идорегьо бэхшвегирисуьз, Абдулмуслим Абдулмуслимов гуфди, чуьки гереки э дорун кор расире э войнегьой дегиш бирегьо гъиметгьо, фегьм сохде гирошденигьо гъозиере, э кор венгесде минкиние экономически войне, комигьоки дануьсдени кори сохде э сер гъиметгьой молгьо э гуьнжо овурде оморенигьо э хэржисохие фурухдение жиге.
«Э гье у вогьне гуьре диреморени омборе руйбиреигьо ве вогугьо эз одомигьо. Векилгьой республикански органгьой хьуькуьме гереки гировунде андуьрмишие коргьо э социальни сетьгьо э официальни сайтгьо э товун зевер биреи гъиметгьо ве э товун гъобул сохде оморенигьо чорегьо. Имбуруз э товун артгьой пуьруьшсохи имуре гереки гъобул сохде гъэрорноме эри дуз сохде гъозиере ологълуь гьисдигьо э гъиметгьоревоз»,- гуфди Абдулмуслим Абдулмуслимов.
Э г1эрей гуьрдлеме нушу доребируьт министр экономике ве эн мескенлуье параменди РД Гаджи Султанов, министр хозяйствой дигьлуье хозяйство ве хуреки РД Мухтарбий Аджеков, министр корхонегьо ве фурухдеи РД Низам Халилов, бизнес-омбудсмен РД Мурад Далгатов, рэхъбер УФАС э РД Каир Бабаев, сервор шегьер Махачкеле Каир Бабаев ве еккейгегьо.
Э нушидигьо гуфдире оморебу жире-бе-жирее фикиргьо э товун войнегьой зевер биреи гъиметгьо э сер гушд, э г1эрей комигьоки гуфдире оморебу э товун е жерге экономически вогьнегьо; алишвериши, зевер биреи гъимете э вэхд «майски» миг1идгьо ве э вэхд гировундеи миг1ид Курбан байраме; зевер биреи моле эз де вилеетиге бердеи зуьнде сергьой молгъэре; зевер бире хэржилугъи гусбенддошди э дошдеи хьэйвугьоре ве куьшде ве еккейгегьо.
Э эхир пуьруьшсохи премьер-министр гуфди, чуьки «эз пуьруьшсохи гьеймогьоине пуьрсуьше гереки гирошде эки ёгъинлуье корисохигьо». Э эхир гуьрдлеме у дори е жерге гъуллугъгьо, э у гъэдер у гъэдэгъэ зери э Министерствой дигьлуье хозяйствой республикере тигъэтлуье тегьер кор сохдеи пуьрсуьш себеб э хьэвес венгесдеи корсохгьоре молгьой гушдире э бедел хьуькуьметлуье гъувотдореи технологически тозе сохдеи корхонегьой энугьоре, гьемчуьн фегьм сохде герекии э зиёд сохдеи жигегьой куьшдеи молгъоре.
Министерствой дигьлуье хозяйство ве хурекире, Министерствой экономически парамендире ве Министерствой корхонегьо ве алверсохи Догъистуре доре омори гъуллугъ гьееки э Фурухдени-промышленни палатей РД винире ве фегьм сохде гъосуте герекие зиёд сохде моле э де вилеетиге бердеи вечиреи э зуьнде хьэйвуй хунеи. Гьемчуьн гъэдэгъэ зери зиёд сохде коргьой э гуьнжо овурдеи ве гировунде г1эрейрайонни ве республикански дигьлуье хозяйственни ярмаркегьоре.
Жугьобдорлуье органгьой хьуькуьме гьемчуьн гъуллугъ доре оморебу гировунде хэберлуье-андуьрмишие коргьо э овгъотгьой омборе хэбергьо ве социальни сетьгьо э товун гъозие э хуреклуье фурухдение жиге Республике Догъисту. Комитете э товун ветеринарие РД гъэдэгъэ доре оморебу хьозуьр сохде фикиргьо э товун дешендеи дегишигьоре э гуьнжолуьи хьисобсохи ве дореи пуре артгьой бердеи ве ведеберде оморенигьо сергьой молгъой республике. Гьемчуьн доре оморебу е жерге гъэдэгъэгьо, веровундеи комигьореки фегьм мисохут корлуье десде э куьнде вэхд.
