Нелли Рубин – актриса э данани гуьро, сэхьиб премие Исроили телевизионни академие эри рол э драматически сериал. Нелли рач, мэгlрифетлуь ве лап хьэёмендлуь. Духдер, комини хьэсуьл омори э еки эз раче шегьергьой гlуьлом, Санкт-Петербург, комини вегуьрди верзирение несигlэтдори э кифлет жугьургьой догъи, гьеммише метлеб бири уре бире актриса.

— Гьемме иму гlэсуьлим эз гlэильети. Ихдилот сох, эже туь хьэсуьл оморей, эже тербие вегуьрдей? Чуьни эри туь мэгlэно чуькле ватан?

— Ме хьэсуьл оморем э Санкт-Петербург э кифлет хьэсуьломорегоргьо э Дербенд. Кейки ме бирем се сала, иму рафдейм э Исроил, зигьисдейм э Холон, эже ме келе бирем. Кейки мере бири 14 сал, кифлет ме гирошди э зигьисдеи э Канада (э сереботи кор бебе), э унжо ме варасунде бегьем сохдем школе. Дирте ме вогошдем э Исроил ве дарафдем э хундеи э Театральни школе Йорама Левинштейна – гье и бу еки эз гьемме вожиблуье ве хьэвеслуье э гъэдер вэгlэдо э зиндегуни ме. Мере лап воисдебу гье гене сер кешире э Уруссиет – винире ве гьис сохде жигегьо, эже ме хьэсуьл оморем ве эже келе бирет деде-бебе. Оммо хуне э пурлуье фикиревоз э гье и гоф эри ме гьисди Тель-Авив, Исроил – жиге, эже ме гьис сохденуьм хуьшдере ве вегуьрденуьм хьэвес.

— Ихдилот сох э товней деде-бебе ишму, э товун бинегьой угьо.

— Деде-бебей ме, Рафик ве Лариса Рувиновигьо, гъумолет эз Дербенд – гье и гъэдимие шегьер э гъиметлуье торихевоз ве еки эз куьгьне жугьури жэгlмиет дин-догlоти. Угьо келе бири э динлуье кифлетгьо, эже гъимете верзуьнди соводи ве жофо. Ме гьис сохде хуьшдере лап мозоллуье, эхи э сенигlэт ме вожиби куьндлуье одомигьо, коминигьо бовор сохде э туь ве мейле гуьрде метлебгьой туьре. Деде-бебей ме ве бирор э хэгьеревоз – одомигьо э очугъие фикирсохиревоз, азадлуье руьхьэвоз ве гьэгъигъэтлуье муьгьбетевоз эки зиндегуни ве эки инсонгьо. Эз хуней деде-бебе ме вегуьрдем хьэрекети эки мэгlрифет, эки театр, битlэгрифие фикирсохи ве гуьнжолуьи, коминисуьз минкинсуьзи бире гьэгъигъэтлуье артист. Дедей ме гьисди сэхьиб нисе бирение мэгlнихуни мэгlрифетевоз – фикир сохденуьм, эз у ме вегуьрдем мироси муьгьбет эки сегьне ве эки гьисгьо. Эз бебе – муьгьбет эки книггьо, эки лугъондлуье эхдермиш сохдеи, эки варасиреи нуьвуьсдеи ве фикирлуьи. Ве гьэгъигъэт гуьнжуьсдеи гье и качество – гьис, культуре ве доруние гъувот – гуьнжуьнди мере чуьтам одомире ве чуьтам актриса. Шуьвер ме Хаим Рубин гьеммише кумеки доре э ме э гьемме сергуьрде коргьой ме.

— Эйчуь ишму рафдейт э Исроил? Кейки? Чуьни эри туь гьейсэгlэт жугьурие хьуькуьм?

— Иму рафдейм, кейки мере бу се сал – ёгъин ужире вэхд лов биреи Совети Союз. Гье у бири четини вэгlэдогьо – экономике ве социально – ве деде-бебей ме гешди гъоимгъувоти ве секонеисуьзи эри кифлет хуьшде. Гъэрорноме рафде э Исроил бири сионистски, ве жугьури – эз лугъондлуье боворини, чуьки гье и хори имуни. Эри ме Исроил – гье и неки вилеет, гье и хуне ве бедел тойлуье ухшеши ме, жиге, эже ме келе бирем, ве бирем сэхьиб хуьшде.

— Комини бинелуье сенигlэт гьисди туьре? Чьу кор туь гьейсэгlэт сохде?

— Бинелуье сенигlэт ме гьисди – актриса. Ме варасунде бегьем сохдем Зевери школе театра ве кино Йорама Левинштейна э Тель-Авив. Э песини салгьо ме бирем бэхшвегир э театральни бирмунушигьо, кор сохдем э кино ве э телевидение, диеш зиёд сенигlэтлуь параменди биренуьм. Эзуш бэгъэй актерски корисохи, ме гьемиге нуьвуьсденуьм, э гуьнжо овурденуьм ве мерэгълуьнуьм э астрологие – гье и область, комини хьэвес доре мере ве кумекии лугъондлуь варасире одомигьоре. Ме бовор сохде, чуьки мэгlрифет – гье и неки сенигlэткори, оммо тапшуьрмише везифе: тегьер нушу доре э гьис инсони ве дес зере э дуьл инсонгьо.

— Гоф сохденит ми э кифлет ишму э жугьури? Чуь гъэдери тойлуье ухшеши туь гьейсэгlэт э Исроил? Эз гьемме гьевел, киревоз туь гьис сохде хуьшдере?

-Деде-бебе ве кифлет гоф сохде э жугьури, ве ме лап хосденуьм гье и зугьуне – ве текебури сохденуьм уревоз, чуьки омбор варасиренуьм. Эри иму гье и зугьун, комини ек бире э жугьури тойлуье ухшеши э ведекуьрдеи омборте дуь гьозор сал – зугьун дуьл, ёровурди ве жэгlмиет дин-догlоти. Эз гьемме гьевел ме гьис сохде хуьшдере израильтянке. Ме лугъондлуь екбирем э хориревоз, зугьуневоз, хушебуйевоз, мэгlнигьоревоз ве культурей Исроиле. Гье и нис гофсохи э гъэршуй дуь эн еки уре, чуьнки ме гоф сохде дануьсденуьм э шеш зугьунгьо: иврит, английски, уруси, жугьури, арабски ве испански. Ме боворинуьм, чуьки – гье у гъувот. Гье и неки тегьер гофсохи дуь э екиревоз, оммо ве тегьер гуьрд сохде одомигьоре ве культурегьоре. Кейки э мигlидгьо ме гуш дошде э кифлет жугьури гье и, гье бирден вогордундени мере эки хушебуйгьо, мэгlнигьо ве лезет хуне келедеде ве келебебе. Гье и гьеммише дес зере э дуьл. Э кифлет ме те имогьоиш гоф сохденуьт э жугьури, ве эри ме гье и лап вожиблуьи – и зугьун гуьрд бире эн ме жугьури-кавкази динлуьегьо ве э ёр овурде э товун бинегьо.

Оммо тойлуье ухшеши ме имбуруз омборте фирегь бири. Э ме дери ве израили дорун кор, ве уруси бедел – культуре, э комини ме хьэсуьл оморем ве коминире хьуьрмет гуьрденуьм. Ме гуьнжуьнденуьм э хуьшде кем-кем эз гьемме: эз Кавказ, эз Уруссиет, эз Исроил ве эз Канада. Ве гьемме гье и гьееки гуьнжуьнди э ме доруние фирегьунетегьер, эз комини ме дануьсденуьм э гуьнжо овурде, гьис сохде ве гуьрд сохде жире-бе-жирее гlуьломгьоре. Эри ме гье и гьэгъигъэтлуье бэхш – бире инсон э гlэрей культурегьо ве вир не сохде екиреш эз угьо.

— Комини жиге э зиндегуни туь гьисди эри дин-догlоти?

— Эри ме дин-догlоти – гье и, эз гьемме гьевел, дуь э екиревоз: э хуьшден хуьшдеревоз, э торих хуьшдеревоз, э хэлгъ хуьшдеревоз ве гьебелки, э чуьнигеревоз омборте, эз хуьшдени ме. Ме нисдуьм дин-догlоти одоми, оммо ме бовор сохденуьм. Ме бовор сохденуьм э Худо, э гъисмет, ве э у, чуьки гьемме э зиндегуни иму оморени э вэхд ю ве не нехэбереки. Дин-догlоти рэхь сохде мере ве чуьтам одомире, ве чуьтам артисте – кумеки доре офде фикир ве рачи э гурунде вэхдгьо ве мунде гьееки э дуьлевоз. Э и товун гуьре ме э муьгьбетевоз дошденуьм жугьурие динлуьигьоре: нушу доренуьм мигlидгьоре, дегесунденуьм шэгlмгьо э рузорине, сохденуьм кидуш. Гье и дорени мере гьис герми, кифлет ве гъовуми – бедел бинегьой ме ве жун ме.

— Боворини иму ве дин-гlэдотгьой иму кумеки доренуьт гирошде эз гурунде зиндегуние синемишигьо?

— Эри, гьелбетте. Боворини ве дин-гlэдотгьо дорени мере кумеки ве гьис гъоимгъувоти, бешгъэ э дэгъдэгъэ, кейки зиндегуни гьечи оморени мэгlлуьмсуьз. Угьо э ёр овурде, чуьки иму – бедел келе торих: торих хэлгъ иму, кифлет ве боворини, гировунде оморенигьо эз эрхэгьо э эрхэ. Мигlидгьо, гъэдишгьо, асантие гlэдотгьо – дегесундеи шэгlмгьо енебуге кучмиш бире э сер суьфре шобботи – кумеки доре поисде, нефескешире ве э ёр овурде, чуьни гьэгъигъэтиш вожиблуь. Гье и дорени гъувот ве доруние сокити – варасиреи уре, чуьки гьер синемишире гьисди фикир, ве чуьки имуре гьеммише мейле гуьрде чуьниге омборте, эз хуьшдени иму.

— Эз бинелуье кор бэгъэй гьисди ми туьре екиге мерэгълуьигьо, хобби?

— Эзуш бэгъэй, чуьки ме актриса ве мэгlнихун, ме гьемиге хунде дануьсде астрологие ве астрономие – гье и рэхькори, коминигьо мере лап хьэвеслуь сохде ве зиёд фирегь сохде варасиреи. Астрологие эри ме – зугьун жун, астрономие э ёр овурде э товун тилисим Дуьньёгь. Мере куьндлуьи гуьнжуьсдеи гlилм ве дин-догlоти. Ме хосдегор музыке, шекуьл, э гешдегьо рафдеи э тебиет ве эки дерьёгь – гьемме, чуь вогордундени мере эки динжи, хьэвес ве доруние разилуьи.

— Литературе комини жанр туьре хьэз оморе? Комини музыке туь гуш дошде?

-Чуьнки ме гьисдуьм актриса, ме омбор хунденуьм: пьесагьо ве сценаригьо. Оммо э азадлуье вэхд мере хьэз оморе лугъондлуь хунде книг ве э гьисевоз – угьоре, чуь хьэвес доре ве огол зере гьис доруние жугьоби. Чуь э товун музыке – мере хьэз оморе гьемме жире. Гьемме, чуь дес зере э жун, зугьун нисди вожиблуь. Э уруси ме э гьеммишеине ошугъ бирем Тане Буланова ве Любовь Успенская – мэгlни угьо гьеммише сес дори э хуней иму, кейки ме бирем гlэил. Ме гьемиге муьгьбетлуь бире исроили музыке – эз восточни те поп ве куьгьне классике. Расди, муьгьбетлуьи гьемме – ве гьеммере кем-кем.

— Келе согъ боши эри менфигlэтлуье меслэхьэт, жонлуье Нелли, имуре диеш гьисди омборе гъосуьтгьо эри гофсохдеигьо. Имидлуьнуьм, чуьки нуботлуье гиле ме мивегуьруьм эз туь интервью, кейки туь мибоши номинирована э «Оскар». Дуьрьждлуье офиренуьше барасигьо туре!

Нуьвуьсди Стелла Давыдова

Тержуьмесох Ильканаева И.

Сирот: STMEGI