Сернуьш эн Хьуькуьм Догъисту Абдулмуслим Абдулмуслимов бэхш вегуьрди э гуьрдлеме э товун пуьрсуьшгьой параменд сохдеи бердеи молгьой АПКре э де вилеетигегьо э гIэрегьой эн субъектгьой РФ. Гуьрдлеме гировунде оморебу э жирей ВКС э зир рэхьберьети эн Сернуьш Хьуькуьм Уруссиет эн Дмитрий Патрушев.

Э нушудии хуьшде Дмитрий Патрушев мэгIлуьм сохди, ки Уруссиет мундени имидие алверлуье хьовир, гьеммише фуьрсоренки дигьлуье хозяйственни молгьоре ве хуреке э де вилеетигегьо.

Э артгьой эн 2025-муьн сал гуьре молгьо э де вилеетигегьо берде омори эз 41 млрд долларгьо зеверте, э и хьисоб э 22% зиед бири фурухдеи жэгI ве молгьой эн дерьегь, экуьнди 20% зиед бири молгьой гушди ве шири, э 14% зевер бири фурухдеи ширине молгьоре.

«Вилеет иму пушобери э товун фурухдеи гендуьме, жэгI ве ругъэн симичкере. Молгьо берде оморени э 160 вилеетгьо. Э и гуьре 90% эз гьемме жэгIмие гъэдер фуьрсоре оморени э дусдлуье вилеетгьо. Бердеи молгьоре э де вилеетгьоиге зиед бирени. Гъэдер зевер бири э 12% ве гуьнжуьнде омори 20 млрд долларгьо», — гуфди Дмитрий Патрушев.

Президент эн Уруссиетлуье Федерацие В.В.Путин э пушо нори везифе, э гуьрей комики эки 2030-муьн сал гъэдер бердеи молгьоре э де вилеетигегьо мие зевер бу эз риз эн 2021-муьн сал (эз 55 млрд долларгьо). Дмитрий Патрушев гуфди, эри веровунде везифегьоре гереки еклуье гъувотгьо эн органгьой хьуькуьм ве эн бизнес.

Жигегир эн Сернуьш Хьуькуьм РФ гъуллугъ дори назари сохде веровундеи плангьой бердеи молгьоре э де вилеетгьоигегьо. Вице-премьер тигъэт дори, ки э гирошденигьо овхьолет вожиблуьни гешде ве офде тозе минкигьоре эри бэхшсохдеи овгъотгьоре.