Владимир Путин гировунди корие вохурдеи э серворевоз Догъистуре Сергее Меликове. Э вохурдеи бирмунде омори пуьрсуьшгьо социально-экономически параменди республике. Сергей Меликов мэгIлуьм сохди э сервор э товун веровундеи э регион проектгьоре ве вегуьрде оморе барасигьоре э жире-бе-жирее рэхьгьо.
Артигьо вохурдеире варасунди Сергей Меликов
«Имбуруз мэгIлуьм сохди э сервор эниму Владимире Владимировиче Путине, э чуьреоз зигьисде Догъисту, комини имуре барасигьо ве чуь гене э пушо поисди эри сохде. Гуфдире омори э товун бинелуьигьо – э товун одомигьо, э товун экономике, э товун угьо, чуь дегиш бире эки хубтеи.
Иму гьемме дануьсденим, чуьтам омбор мэгIэнолуь бире эри сервор Догъисту.Уре сэхд бесде э республикей эн имуревоз гьозиегьо 1999 сале – эн иму жэгIмие бараси. Гье у гьис сохде э гьер гофсохдеи – у дорундуьли мерэгълуь бире э параменди республике эн иму ве гьеммише хьозуьр кумекии доре проектгьой эн имуре», — нуьвуьсди Сергей Меликов.
Сервор республике ихдилот сохди э товун кумекии дореи бэхшвегиргьоре СВО ве кифлетгьой эн угьоре. Эз Догъисту э пушолуьи фуьрсоре омори омборте 41 гьозор тонн «гуманитаркигьо», восдоре омори технике, хьозуьрлугъи – гьеммере, чуь гереки эри Бараси. Жирелуье тигъэти доре оморе кумекиире кифлетгьоре: муьзде дореигьо, зуьндее бэхшвегири ве кумекии э гъэрорноме гьер пуьрсуьшгьоре. «Бэгъдовой вогошдеи э хуне гIэилгьой эн иму мидануь офде хуьшдере э динжие зиндегуни – иму веровунденим программере параменди «Вегири догъгьо», 7 бэхшвегиргьо эну уже нори э жире-бе-жирее коргьо»,- ихдилот сохди сервор регионе.
Догъисту э песой песини пенж сал э гуьнжо овурди зиёдсохи э гьемме бирмунушигьо социально-экономически парамендигьо. Э кор венгесде омори 12 гьеймогьоине промышленни корхонегьо, вокурде омори 111 школгьо ве 97 бохчей гIэили, гъуьч сохде омори 374 школгьо, 63 бохчей гIэили, вокурде омори 122 ФАП, гъуьч сохде омори 329 объектгьо дошдеи жунсогъире, медицинее идорегьо вегуьрди омборте 3 гьозор еки тозе оборудованигьо.
Сервор республике мэгIлуьм сохди серворе э товун барасигьо хоригъуллугъсохигьоре, комикигьо гьер сал доренуьт дуьруьжде барасигьо. Э гьевелие сал э регион вечири экуьнди 295 тонн бегьергьо – Догъисту бирмунди гьуьндуьре бирмунуши зиёдсохи корхонегьоре э гъэд регионгьо СКФО. Э 2025-муьн сал рафди расири гьуьндуьре эз 1980-муьн салгьо бирмунуши вечиреи онгуре – 302 гьозор тонн.
Э гъэд екейгегьо гъосуьтгьо вохурдеире – гIовеовурдеи, сафари, э кор венгесдеи системегьорере кор сохдеи э ТКО, рэхьгьо кучмишбиреигьо эз хэребеие хунегьо, параменди спорте, культурере, несигIэтдореи жовонгьоре.
Гуфдире омори э у гъэдер ве э товун четинигьо. Э суьфдеи нубот гье у пуь рсуьшгьо электродореи.
«Гьекки э тозеден э хуьшде дировундеи куьгьне тургьоре, иму параменд сохденим тозе рэхьгьоре – республике э гъэд суьфдеигьо э Уруссиет э шинох биреи «савзе» энергетике, вокурденим офтолуье ве кулоклуье станцигьо, пуледорегоргьо эки эри иму оморени.
Чуьтам гьеммише, э гьемме пуьрсуьшгьо офдем пурлуье кумекии дореи эз серворе хьуькуьме, э песой чуь лап уре хубе гофгьо гуфдиреи. Сервор имуре гуш дошдени, кумекии доре ве ихьдибори сохде имуре. Омборе пуьрсуьшгьо, комики иму гуфдирейм э салгьоревоз, эхирдеш рафди э пушо ве э и зуригьо миду барасигьо, комикигьо гьис мисоху гьер кифлет э Догъисту»,- гуфдири Сергей Меликов.
Эз гьемме догъистунигьо сервор респубдике согъбощи гуфдиреи серворе э песой тигъэти эки Догъисту ве кумекии.
фото: гавриил григоров/ риа новости
