ГIэзизе хундегоргьойму омбаракбу сохденим ишмуре э мигIид Хьэнукоиревоз! Хьэнукои еки эз шоре мигIидгьой дин-догIоти эн хэлгъ имуни, мэгIлуьмей комики имисал офдори э 14-муьн декабрь э луьвэхь уруси гуьре. Э гIэдот гуьре мигIид гирошдени хьэшд рузгьо. Рузгьой мигIид гирошденуьт эз 15-муьн те шев 22-муьн декабрь.
Ханукоире де жирейге огол зеренуьт, чуьн «МигIид шэгIмгьо». И еки эз вожиблуье мигIидгьой жугьурини, нушу доре оморени э товун еровурди мугьужуьзи, гирошдебугьо э Исроил. Исроил бэгъдовой муьрдеи Александр Македонски, комики рэхьберьети сохди омбаре салгьо ве гъэриш не бири э динлуье зиндегуни, дебири э зир рэхьберьети жуьр-бе-жуьре рэхьбергьо, тейте Селевкидгьо зафт не сохдет уре. Оморигьо у вэхд эки рэхьберьети зулумчи Антиох Епифан сер гуьрди сихмиш сохде жугьургьоре. У бу лап зулумкор ве не гьишди жугьургьоре хунде Туроре, дошде Шобботе ве мило сохде кукгьоре, дошде гIэдотгьой жугьурире, лов тум сохдет Битемигъдошгьоре дешенде э угьо хьэйкелгьоре. Хори Исроил сер гуьрде эз 198-муьн салевоз те девр иму гирошди э зир рэхьберьети эн Сирие евани.
У вэхд хэлгъ вэхуьшди э гъэршуй еванигьо, комики дураз кешире омори э гIэрей се салгьо. Жугьурлуье боржбери э гъэршуй еванигьо бу кеме хьисоб ве хьозуьр не бире, оммо и кор мешет не бири эри жугьургьо бесгъун берде э сер еванигьо. Жугьургьо гировундет сурлуье боржберире. Рэхьбери эн Антиох зере шенде омори ве жугьургьо субут сохдет, ки боворини ве гъувот эн руьхь вожиблуьни эз хьисоб лешгерчигьо.
Оммо, э гIэрей дураз кешире оморенигьо женг омбаргьо эз Битемигъдошгьо мурдал сохде оморет, енебуге вачарунде оморет э еванигьоревоз.
Бэгъдовой бесгъуни жугьургьо варафдет э сер догъ Битемигъдош эри темиз ве гъэдуш сохде мурдал сохде оморигьо Битемигъдош Ершолоимире. Э у офде омори энжэгъ е теке кузовлей темизе ругъэн эри дегесундеи минорере. И офде оморигьо кеме гъэдер ругъэн вес мисохд энжэгъ эри е руз сухдеи меноре. Оммо гирошди муьгьужуьзи. Миноре сухди хьэшд рузгьо. Э гIэрей эни вэхд диндошдегоргьо темиз сохдет Битемигъдоше ве хьозур сохдет тозе темизе ругъэне.
Э товун еровурди эн гирошдебугьо гьозиегьо э гIэрей омбаре вэхд жугьургьо дегесунденуьт э и рузгьо шэгIмгьоре, нушу доре э Офирегор гIуьлом разилуьи хуьшдере эри кумеки эну, эри гъувотдореи ве муьгьужуьзи.
МигIидлуьи Хьэнукои гирошдени э гIэрей хьэшд рузгьо ве гьемме эни рузгьо жугьургьо дегесунденуьт шэгIмгьоре э жейлее меноре, комиреки доре омори нум «Ханукие». Э нумазгьой жугьури хунде оморени тефило «Алель».
Хьисоб шэгIмгьо э менорей хьэнукои тен-бе-тени э рузгьой Хьэнукои. Э суьфдеи руз дегесунде оморени энжэгъ е шэгIм. Гьер руз гереки зиед сохде е шэгIмигереш. Э хьэшдимуьн руз дегесунде оморенуьт гьемме шэгIмгьой хьэнукои.
ШэгIмгьоре гереки веноре эз лой чепи э лой расди ве дегесунде эз жейлее шэгIм, нум комики гьисди Шамаш. Шамаш дегесунде оморени э гьемме рузгьой хьэнукои.
Менорей хьэнукои норе оморени э пушой пенжере, чуьнки диндошдегоргьо веровунденуьт весиете «мэгIлуьм сохде э гьемме мугьужуьзире».
Хьисоб сохде оморени, ки товуш хьэнукои лов сохдени зулумире, унегуьре гуьнжуьнде омори гIэдот э торих кумек бире э межбур гьисдигьо одомигьо э пулгьоревоз, чуьнки гьер одоми дануь гировунде мигIид Хьэнукоире.
ТэгIнит гуьрде э и рузгьо гIэмел нисе оморе, унегуьре жугьургьо гуьнжуьнденуьт гIошире шуьлхонгьо э хурекевоз ве шори сохденуьт. Еки эз раче чигьой Хьэнукои э суьфрей мигIиди гьисди «гIош куьдии». Ранг эн куьду нушу дорени товуш менорей хьэнукоире.
Э рузгьой хьэнукои жугьургьо нисе поисденуьт эз кор. Энжэгъ гIилгьоре гьисди форигъэти. Кими вэхд и мигIде огол зеренуьт мигIид гIэили.
Оммо, шэгIмгьо дегесунде оморенге дие эри зенгьо гIэмел нисе оморе кор сохде. Гьечуь зенгьо нушу доренуьт разилуьгъи хуьшдере э пушой Офирегор гIуьлом эри муьгьуьжуьзи хьэнукои.
Эри гIэилгьо бэхш доренуьт пулгьой хьэнукои. Оммо бэхш эн бэхшире оморигьо пулгьо гьер гIэил егъин мие дуь эри кор мисволуьи. Гьечуь гIэилгьо хуте биренуьт рэхьбери сохде э омонет хуьшдеревоз.
ГIэдот доре гIэилгьоре бэшгьо э мигIид хьэнукои дарафди дирте. Чуьнки мигIд хьэнукои офдорени э пушой мигIид де хэлгиге гIэилгьой комигьоки вегирдебируьт бэхшгьоре. И гIэдот дарафди гьемчуьн э мигIид жугьуриш, мигIид хьэнукои. Эзуш бэгъэй гIэилгьой жугьури возиренуьт э севивонлеревоз э чор енгьой комики веруьт чор хьэрфгьо, комигьоки гьисдуьт суьфдеи хьэрфгьо эн ижире келме «Келе мугьуьжуьзи бири унжо».
Сер гуьрде эз 25-муьн руз мегь жугьури Кислев хьэшд рузгьо мибу рузгьой шори сохдеи э биевгьо эрхэш, чуьтам норет хьохьмгьой жугьури.
Нум мигIид тержуьме сохдимге гьисди «гъэдуш сохдеи».
МигIид Хьэнукои гирошдени э гьемме ториклуье вэгIдо эн сал, э декабрь. Ве э гьечуьревоз жуьгьургьо бэхш биренуьт э товуш гьозорсалине торих э гьеммей гIуьломевоз.
Эз гьеммей жуьн хосденим эришму, гIэзизе хундегоргьойму, шолуми ве хушхьолуьи, бигьил темизе товуш эн шэгIмгьой Хьэнукои пур соху хунегьой ишмуре э никиревоз ве ишугъ доренуьт дуьлгьой ишмуре э имидевоз, бигьил э хунегьй иошму падшогьи сохдени шолуми ве берекет ве гьер бараси ишму, сер суьфде, бугу барасий эн руьхь! Э гьемме шоре ве товуше мигIидгьо расошит э гьемме куьнде одомигьо ве хосдегоргьой ишмуревоз!
Мигlид Хьэнуко
Роза Мардахаева.
Бисдпенжимуьн руз эн кислуь
Шоре мигlид тилисими
Жергей шэгlмгьо гьисд бергулу*
Э Минорет Хьэнукои.
Дуь гьозори бисд сал пишо
Э гъэд поке Бейт э Мигъдош
Бесгъун берди Маккеево
Не гъул бири, не гъэревош.
Антиохус, залум бире
Гъэрор норе эй гlивригьо:
Дин – догlоте пузмиш сохде,
Рэгlди сохде эз Тирогьо.
Игиде хэлеф Йеудо
Лешгер дуьшмене туьлк сохди.
Бофолуь бире э Худо
Миллет жугьуре тож сохди.
Эз торики ве зулмети
Ругъэн зеит пура хуьмле
Хьэшд руз ишугъ, товуш дори
Жугьургьоре хилос сохде.
Гъэтлемегьой ругъэнии,
Ош куьдуьи, э рэнгъ чуьшме
Гуьнделегьой миробои —
Нишон хилос эз дес дуьшме.
Мигlид миёв э гьер хуне
Товушире тожи мидуь.
Говлеире бэхш овурде,
Торикире селт мисоху.
Э шоре рузгьой эн Мигlиди
Жунгьо темиз – дуьл фиреи.
Шэгlм Имиде дегесунде,
Тефилегьо эдем хунде.
Хилос гердо эз дерд гlилом
Биё тилисим эн Хьэнуко!
Биёр товуш, биёр Шалом!
Гъэнет Худо фирегь гердо!
*Бергулу – факел
