Гьер сал э гIэдот гуьре нушу доре оморени 12-муьн декабрь – еки эз бинелуье хьуькуьметлуье мигIидгьой э вилеет иму. Конституцие гьисди ихдиерлуье биней хьуькуьмети, ижире бинуьши, э комики гуьрде оморени гъонундорлуье ве веровундлуье хьуькуьм. Конституцие нушу дорени тарафгьой параменди хьуькуьмете ве нушу дорени ихдиеригьой ве везифегьой гьер одоми вилеете.
Уруссиетлуье конституциере дуразе торихи. У гирошди четине вэхдгьоре. Конституцие, комики изму нушу доре оморени э тегьергьой демократиеревоз ве гъобул сохде оморенигьо эри гъэлхэнди мерэгъгьой гьер одомире, гьисдуьтгьо одомигьой РФ.
12-муьн декабрь 1993-муьн сал э гьеммехэлгълуье сесдореиревоз э вилеет иму гъобул сохде оморебу Конституцие эн Уруссиетлуье Федерацие. Согъэ текст Конституцие дофус зере оморебу э «Уруссиетлуье гозит» 25-муьн декабрь 1993-муьн сал ве эз у рузевоз Руз Конституцие гьисди еки эз гьемме вожиблуье хьуькуьметлуье мигIидгьой Уруссиет. Конституцие эри одоми эн гьер вилеет гьисди Гъонун, комиреки эз сер суьфде мие дануь, эри данани ве соводлуье тегьер гъобул сохдеи гъонунгьоре – и овхьолет эри хубе зиндегунини, гъувотлуье тегьер эри зевер сохдеи качествой энуре. Гъобул сохдеи Конституциере бири еки эз очорлуье гьозиегьой торих эн гьеймогьине Уруссиет. Ижире ихдиерлуье акт гуьнжуьнди неки тозе хьуькуьметлуье ве политически системей Уруссиете.
Руз Конституцие, э гьеммей вилеет иму гирошденуьт жуьр-бе-жуьре мероприятиегьо э гIуьзет бинелуье гъонун вилеет. Иллогьки омбаре мероприятиегьо гирошденуьт э соводлуье ве идорегьой базургенди э Уруссиетлуье шегьергьо – угьо гьисдуьт нубогьой ихдиер дануьсдеи, гиргине шуьлхьнгьо, гъосуьтлуье презентациегьо ве бирмунуьшигьо, мигIидлуье концертгьо, могълугълуье акциегьо, митингьо ве диеш.
Эз нуминей редакцией иму воисдени гьемме хэлгъгьой вилеет имуре омбаракбу сохде э Руз конституцией Уруссиетевоз ве хосде эри энугьо жунсогъи, мозол, шолуми. Сохдеи Уруссиете хушхьоллуьи иму миданим энжэгъ гъоим дошде ихдиеригьо ве азади имуре, нушу доре боворинлуьире эки тегьергьой холисе демократие, жогъобдорлуь гьисдигьо э мерэгъгьой эн омбаремиллетлуье уруссиетлуье хэлгъ.
