Имбуруз иму шинох ми бошим э зиёдгуьзелие духдеревоз, жугьур догъи, коминики хьэсуьл омори э Баку, зигьисди э унжо суьфдеи 16 сал зиндегуни хуьшдере, эзуновлейге рафди э Москов эри вегуьрде экономически данани. Гьеймогьой у э декретни форигъэтии эз кор, оммо не поисде э расире бараси ве параменд сохде сэхьиблуье проект хуьшдере «My Joy», э гуьнжо овурде менфигlэтлуье бэхшлуье наборгьо э кошерни шоколадие мол деси. Ини дуь сал у эвленмиш биригьо, мозоллуьи ве хьэсуьл овурди гlэиле. У ихдилот сохди э товун рэхь хуьшде, кифлет ве хьэвес, комини кумеки доре уре де коригереш сохде эз дедеети ве бизнес.

— Ева, ихдилот сох, чуьтам гlэили э Баку кори сохди э вердиш биреи э и зиндегуни?

— Ме келе бирем, э фикир ме гуьре, э варасирение ве гъуногъсевене вилеет, ве гье у мере хуте сохди гъэножогъи бире хьуьрметлуь э ки гьер одоми, межбур не бире эз дин-догlот ве шивдолуьи эну. Мере лап хьэз оморе гъуногъгьоре гъобул сохде ве гьечуь вохурде угьоре эри чуьки угьо гьис соху хуьшдере чуьтам э хуней хуьшде.

— Чуь гьуьл дори туьре рафде э Москов эри тербиевегири, ве чуьтам гье и синогъи дегиш сохди туьре?

— Ме дарафдем э университет э Баку, оммо варасирем, чуьки мере воисдени хундеире вегирде гьееки э дошдеи несиетгьой ёгьудииревоз: шобботгьо, мигlидгьо, кашрут. Э екиге вузгьо гье у гурунд ми бисдо веровунде. Гьетте ме дануьсдем э товней жугьури университет эри духдергьо «Махон Хамеш», дебиригьо э Москов, гье бирден гъэрор норем дарафде э унжо! Гье и синогъи диеш дори мере гъэсди ве хуьшденкордани, э чуь ме лап шоруьм.

— Эйчуь ту гъэрор норей хунде дануьсде экономике ве финансгьо?

— Мере эз гlэили войге бу дарафде э гье и факультет, чуьнки э кифлет иму омборгьо бири экономистгьо. Мере гьеммише э хуьшде вогосунди бизнес, метлеб ме бири вокурде кор хуьшдере.

— Гье и лап хуби, кейки ниетгьо бегьем биренуьт. Чуьтам дананигьо эз университет кумеки доре э туь э корисохи сэхьиблуье проекте «My Joy»?

— Э университет ме тербиевегирдем чуьтам светски гьечуь ве жугьури дин-догlоти дананигьо. Светски лап кумеки дори рэхьбери бюджетевоз, варасире верзуьши гъимет ве у, чуь э у дарафдени. Жугьури данани бирмунди келе вожиби маасере (жейле сохдеи 10% эз гъэзенж) ве «Ахават Исраэль». Меселен, ме хьэрекетлуь сохде бэхшгьо эз хуьшде эри зенде зенгьо, эри чуьки шор сохде угьоре э гье у вэхд.

— Гье и гьисди лап раче десшувуни эз лой туь. Ихдилот сох, э товун проект туь. Чуь хьэвес дори туьре э гуьнжо овурдеи бэхшлуье наборгьо э кошерни шоколадгьой мол деси?

— Эз гlэили мере лап хьэз омори сохде бэхшгьо. Гьеммише э гье у дорем гъувот хуьшдере, вэгlэдоре ве пуле. Варасирем, чуьки воисдени гье и коре сохде, чуьнки хьэз оморе мере фегьм сохде э гьис одомигьо ве вегуьрде хьэйронлуье жугьоб дореи! Ме гуьнжуьнденуьм раче наборгьо, э гуьнжо овурденуьм угьоре ве пурлуь сохденуьм гьеймогьине ширине хурекгьоревоз, ижирегьо чуь мури ве гиде э гъэд шоколад, Дубайский шоколад ве диеш екиге мол деси.

— Туьре жогьиле кифлети ве лап чуькле геделе. Чуьтам туь де коригереш сохдени гьееки э дедеетиревоз ве параменди бизнес? Чуьтами четинигьо ве шоригьо вохурдени э гье и рэхь?

— Ме сергуьрдем и рэхьэ гьеле те хьэсуьл оморе и гlэиле. Суьфде талаби деноре омборе гъувот ве вэхд. Кейки ме бордор бирем ве зендем гlэиле, шуьвер лап омбор кумеки сохди. Гьеймогьой гlэил мере нимсали, ве ме оголзерем зиёдгуьзелие кумексохе-студенткере, шинох мере. У лап кумекии доре, эхи ме, чуьтам деде, доренуьм э гlэил экуьнди гьемме вэхд хуьшдере, оммо кор ме дорени мере омборе хьэвес. Ме вегуьрденуьм лап дуьруьжде софо, винире шори эз вегуьрде бэхшгьо!

— Ева, комини дин-гlэдотигьо жугьургьой догъи туь хьэрекети веноре дошде э кифлет хуьшде?

-Хьэрекети норенуьм омборе вэхд гировунде э кифлетевоз ве гировунде э гьееки шобботгьо ве мигlидгьо.

— Чуьтам шуьвер туь кумеки сохде э туь э сергуьрдеигьо ве дедеети?

— Шуьвер кумеки сохде э гьемме коргьой ме. У восдорени мэхьсуьл эри наборгьой ме, веровундени коргьой хунере ве гировундени вэхд э гlэилевоз, кейки минкин бире. Эз гьемме вожиблуьи – у варасирени эгенер ме чуьнигере сохде не дануьсдем, ве гьеммише хьэрекети веноре вэхизунде хьол!

— Чуь эри туь мэгlэнолуьи бире жогьиле зен ве деде э гьеймогьоине гlуьлом?

— Эри ме бире зен ве деде э гьеймогьоине гlуьлом – мэгlэнолуьи, бире сук, асант ве гъосут веровундегор! Эгенер туьре гьэгъигъэтиш чуьниге воисдени – офде мидани эри гье и вэхд ве гъувот. Вожиби кими вэхд сохде чуьниге эри хуьшде, кифлет ве эри кор хуьшде, не денишире э хэсдеи.

— Комини дэгъдэгъэ дедеети э суьфдеи пенж мегь туьре омборте дес зери?

— Мере лап дес зере гъонмиш биреи, чуьки э гье и вэхд ме гlэиле гереклуьнуьм эз гьемме омборте. Бесдеоморе гlэиле эки деде – гье и гьисди гъэжоибие гьис ёгъине муьгьбет эз дуь лой.

— Чуьтам туь офдени хьэвес эри кор ве параменди проекте?

-Хьэвес оморени эз одомигьо! Бежид эз гьемме зиёдгуьзелие хэёл хьэсуьл оморени, кейки э ки ме руй бире хогьишидорегоргьо э войгеревоз веровунде чуьниге ёгъин тозе: эри жогьиле деде, э гендер пати, юбилей диеш. Ве иму э гуьнжо овурденим гье угьоре э гьееки!

— Комини везифегьо ве метлебгьо гьисди туьре э и экуьндие вэхд – чуьтам эри хуьшде, гьечуь эри «My Joy»?

— Эри хуьшде серворлуье гъосут экуьндие вэхд – евош кор сохде, софо вегуьрде эз геделе ве кифлет хуьшде, тэгlди не сохде э е жигеш ве зигьисде э и дэгъдэгъэ! Э проект хуьшде воисдени диеш зиёд сохде и, чуь хьэвес ве эшгъ доре мере ве екигегьоре.

— Чуь несиет туь ми дори э екигегьо жогьиле дедегьо, комигьоре воисдени сер гуьрде кор хуьшдере енебуге э кор венгесде мерэгълуье хэёлгьо?

— Гьер деде – игиди! Эри хуьшде, гlэилгьо, шуьвер ве гьемме кифлет хуьшде. Эгенер уре воисдени офде кор зиндегуни хуьшдере, уре гереки гуш дошде э ки хуьшде ве варасире, чуь гьэгъигъэтиш уре мозоллу сохде! Гьэгъигъэт э гье и гlэмел миёв вокурде кор хуьшдере, чуьнки э гье и гъозие чуькле гlэил гьисди гъувотлуье хьэвес!

Торих Ева – очугълуье меселен гье у, чуьтам гlэмел миёв барасилуьи гуьнжуьнде дедеети ве сэхьиблугъи кор, дошдеи дин-гlэдоти ве верзуьши. У э ёр овурде э иму э товун вожиби муьгьбет, кумекии ве боворини э хуьшде. Бигьил проект «My Joy» диеш зиёд шор соху одомигьоре, метлебгьой угьо веровунде биёв. Согъбоши эз хьэвес дореи ве э бэхш сохдеи синогъи хуьшдере э имуревоз. Войге сохденим зиёдие барасилуьигьо ве мозол э рэхь туь!

Нуьвуьсди Лея Гаврилова

Тержуьме сохди Ильканаева И.