Э пресс-холл эн Дагинформ э зир рэхьберьети эн Рэхьбер Агенство мэгIлуьмети ве дофуси эн Республикей Догъисту эн Арсен Юсупов гировунде оморебу корлуье гуьрдлеме, гIуьзет сохде оморигьо э мероприятиегьо эн хьуькуьметлуье программе «Дошдеи ве параменд сохдеи зугьунгьой эн хэлгъгьой Республикей Догъисту».

Э гэрей вохурдеи бирмунде оморебу ве фегьм сохде оморебу проектгьо эн егъинлуье пунктгьой программе, веруьтгьо э бешпурт эн е жерге мероприятиегьо. Бэхшвегиргьо пуьруьш сохдет тегьергьой э кор венгесдеи угьоре ве гузет сохде оморенигьо барасигьоре. Гуьрдлеме евош-евош гирошд э жирей гиргинее шуьлхьон, э гIэрей комики серворлуье редакторгьо эн республикански СМИ гуфдирет фикиргьой хуьшдере э товун зиед сохдеи программере. Жейлее тигъэт доре оморебу э миллетлуье СМИ э фирегьлуь мэгIлуьм сохдеи зугьунгьой дедеире.

Э гIэрегьой очугъэ пуьруьшсохи гьово гуьрде оморебу вожиблуье пуьрсуьшгьой отрасль. Бэхшвегиргьо гуфдирет э товун вес несохдеи сенигIэтлуье корсохгьо э миллетлуье СМИ, гьемчуьн э товун нисдии гIэилие мэгIлуьметие, соводлуье ве дуьлхошие программегьо э зугьунгьой эн хэлгъгьой Догъисту. Пуьруьш сохде оморебу рэхьгьой гъэрор сохдеи и пуьрсуьшгьоре, э у хьисоб эз гIэрей соводлуье проектгьо ве грантови гъувотдореи.

«Лап вожиблуьни, чуь пуьруьшсохи иму бу лап егъинлуьни ве минкин дори очугъ сохде четинигьоре, э и хьисоб гереклуьи дузетмиш сохде егъинлуье бирмунушигьой программаре. Чуьн арт, бинелуье везифей эну – дошде зугьунгьой дедеире, гьемчуьн мероприятиегьо эри расире э везифе мибу дуз ве барасилуь»,- гуфди Арсен Юсупов.

Э артгьой гуьрдлеме эн гиргинее шуьлхьон гуьре гьемме гуфдире оморигьо фикиргьо вегуьрде оморебу э кор эри фегьм сохде ве эри песдеине дешендеи э план мероприятиегьо эн хьуькуьметлуье программе.

Бэхшвегиргьой гуьрдлеме игърол бесдет э товун дореи фикиргьоре э десхэтлуье жире э гIэрей дуь рузгьо.