Имбурузине одоми эн иму – гIилмчи медицинеи гIилме духдир акушер-гинеколог медицинеи бинере РАНХИГСе э сер сервор РФ. Уре бэхд бири зенде оморе э лап хубе кифлет: деде-бебе несигiэт дори эки данани ве жофохосдеи, хьуьрметлуьи ве хосде одомигьоре. Гъисмет бири уре э шуьвер рафде э ижире хубе кифлет, эже несигIэт дори ижире верзуьшигьоре. Бире бэхдлуь э бэхдлуьиревоз екейгегьоревоз – ини гьэгъигъэтлуье мозол гьер, ки вихди сенигIэткори медицинеире. Духдир эн иму сохди бэхдлуь лап омборе зенгьоре.

– Эже ишму зенде оморейт, эже гирошди гIэильети ишму ве салгьой школеи?

– Ме зенде оморем ве келе бирем э Москве, гьеммей зиндегуни эн ме бесде омори э и шегьеревоз. Инжо гирошди школеи салгьо эн ме – гье у хубе ёрбиёри бесде оморе э московие хьэётевоз, школеревоз ве хьовиргьоревоз. Москов эри ме – гье у неки жиге хьэсуьл омореи, гье у шегьер, комики э гуьнжо овурди хосиет эн мере ве хуьшдени эн мере.

– Ихдилот сохит э товун бебе-деде эн ишму. Чуь ишму дануьсде э товун келетегьо эн ишму?

– Бебе-деде эн ме э жогьили гирошди э Москов эз Дербенд, эри вегуьрде инжо буьлуьндие соводире ве э гуьнжо овурде кифлете. Дедей эн ме, Исакове Ахсо Николаевне, — тербиедорегор английски зугьуне. Гье у неки сэнигIэткори эн уни, оммо гуьнжолуье сенигIэт. У гьеммише гуьнжолуь биреи эки кор э лап келе муьгьбете ве жугьобдорлуьи, дешенде жуне э хундегоргьой эн хуьшде. Омборе салгьо у тербиедори э московие школе, ве эри садигьо гIэилгьо бири неки тербиедорегор, оммо ве одомиревоз, комики дануьсде хьэвес ве кумекии доре. Дедей ме – гъиметлуье ве рэхьмедуьле одомини. Уре гьисди сейреклуье мэгIрифет: винире э гьер хундегор хуьшденире ве офде гъэножогъи эки четиние гIэилгьо.

Бебе, Исаков Вячеслав Исаевич, — инженер-вокурдегор, варасунди Московски инженерно-вокурдеие институте э нум В.В.Куйбышеве. СенигIэткори эну гьеммиши огол зери э ме жирелуье хьуьрметлуьи, эхи гье у одомигьо э гуьнжо овурде шегьергьоре. Эгенер э гешдегьо рафдеи э Москов, гIэмел миёв винире омборе хунегьо ве дуьруьжде вокурдеигьо, комикигьоре у вокурди э десгьой хуьшдеревоз ве эгъуьлевоз. Гье у гьэгъигъэтлуье жофои, комики мунде э девргьо – нисе э когъоз, оммо э сенгъгьо ве э бетон, э архитектуре ве кучегьо, комикигьоре гьер руз э кор венгесде одомигьо. У гьеммише бири эри ме меселеневоз жугьобдорлуьи, жофохосдеи ве боворини кор хуьшдере. Не денишире э мешгуьли, бебе э суьфдеи жиге гьеммише нори кифлете.

Хэгьер эн ме гьемите духдири. У, чуьтам ве ме, варасунди Суьфдеи МГМУ э нум И.И. Сеченове чуьтам отолоринголог. СенигIэт эн у лап гурунди, комики талаб сохде келе жугьобдорлуьи ве дананигьо. Оммо ме кейки рэхьэ норем эри эну вихде гье у сенигIэте. ве у гъэрор нори. Ве ме гьич е чендгъэдериш нисе бибоворини бире, чуьки у офди гуьнжолуье сенигIэт эн хуьшдере. Аннере гьисди сейреклуье гуьнжуьндеи сенигIэткорлуьи ве гьуьндуьре риз гъэдерлуьи оголе жугьоб дореи.

Нечогъгьо бовор сохде э у, эзу товун ки у гьеммише тигъэтлуье ве дануьсде гуш веноре.

Бирор Родион омборе салгьо зигьисде э Великобритание, унжо у варасунди школере ве вегуьрди гьуьндуьре соводире. У варасунди Уорикски университете э Ковентри, эже хунде дануьсде мошиневокурдеире, сенигIэткор э кор венгесдеи ве дешендеи гьеймогьоине технологигьо э и коргьо. ГьейсэгIэт у инженер – роектировщик дата-бинегьоре.

Келебебе ве бебейхолу эн ме бири ветерангьо, угьо гирошди гурунде довгIо, синемиш сохди муьшкуьлле э пушолуьи, вегуьрди ерагьо. Жовони эн угьо бири э гурунде бэгъдовой довгIое салгьо.

Келебебе Исай Романович Исаков кор сохди э жовони сиротиекорреспондентевоз, оммо эзуновлейге вокурди кооперативни хуреклуье тукун. Эри Союз Совети гье у бири лап хубе ве тозе фикир. Омборегьо э куче нум дори уре: «тукун лелей Исай». Э ёр эн ме келебе мунди лап гофсохдегор, хэнделов ве зиреклуьи. Э дедейхолуревоз, Истыр Иосифнеревоз, угьо келе сохди хьофд гIэилгьо, гьер гIэиле дори минкини хунде ве вегуьрде гьуьндуьре соводи – гье уре угьо хьисоб сохди вожиблуьи. Чуьтам бебей эн ме, дуь бироргьой эн у бегьем сохди институгьоре э Москов. Тейте келебебе кор сохди ве дошди келе кифлет эн хуьшдере, дедейхолу берди кифлетлуье коргьоре.

Бебейхолу, Николай Илизирович Яхияев, бири одоми гъувотлуье ве гьинорменди. Эри эну ведиремори лап четиние гъисмет: э вэхд довгIо у дарафди э есири ве гировунди чор дуразе сале э концлагере. Гье у вэхд гьишди лугъонде жиге э хуьшдени эну оммо уре нисе хуьрд бире. Эшкуново – товунди хосиете ве дори уре жирелуье хьохомлуьи. Уре гьеммише бири келе войге эки дананигьо. Мехьшево сохди бире духдиревоз, у дарафди э тмедицинеи институт э Харьков. Хунди э келе мерэгълуьиревоз, оммо бэгъдовой сеимуьн курсе бири огол зере э довгIо. Вогошде ки, уре воисди зиёд сохде хундеире, оммо гьемме идорей дошдеи когъозгьоре бегьем сухди ве уре дануьсди вегуьрде энжэгъ э суьфдеи сал. Хунде екем дуьимуьн гиле, у гьишди вузе: гереки бири кор сохде ве дошде кифлете. Ве гъэрезки у нисе дануьсди вегуьрде медицинеи сенигIэткорире, у сохди гьемме минкинире, эри гье у войгере э зиндегуни венгесде гIэилгьо ве невегьой энуре. Еки эз духдергьо эн у, Ума Николаевна Семенова, бири лап хьуьрметлуье духдир-терапевт э Дербенд, кор сохди омборе сал э е жиге, гIэилгьо эну гьемите варасунди медицинеи институте ве бири дермухьозурсохгьо.

– Ихдилот сохит э товун деде-бебей шуьвере, э товун хуьсуьр эн ишму.

– Кифлет эн шуьвер ме гьеммише бири эри ме меселен дусди ве дуь э еки кумеки сохдеи. Хуьсуьр, Пётр Гюршумович Нисимов, — одоми хьуьрметлуье ве верзуьшлуье, эки комики ме синемиши сохденум дорундуьлие хьуьрметлуьи. Пётр Гюршумович, вегуьрде медицинеие соводи, вегуьрди сенигIэткори чуьтам радиобиолог-токсиколог. У бири доктор медицинеи гIилме, прфессор, бири гьеммегIуьломие мэгIлуьмлуье сенигIэткоревоз эсер хундеи ионизирующего излучение э беден ижире молгьо, чуьтам плутоний ве цезий. Гъобул сохди бэхшвегири э нисдсохи эзуновлейге бире гъозие хэребеи э Чернобыльски АЗС, гировунди жейлее хоси нечогъгьоре э лучевой нечогъиревоз. Кор сохди э пуьрсуьшгьоревоз радиобиологие ве гешдеи тегьере хос сохдеи, берекетлуье э кор венгесдеи э медицине ве радиационни гъэлхэнди. Бири верзуьнде е ченд хьуькуьмлуье бэхшгьо э песой бэхшвегири э нисдсохи хэребеире.

Э 1975-муьн сал у варасунди Суьфдеи Московски медицинеи университет э нум И.М. Сеченове э сенигIэт «Медико-санитарни кор». Э 1979-муьн сал унжо гъэлхэнди сохди кондидатски диссертацие. Э арти аспирантурере фуьрсоре омори эри кор сохде э Институт биофизике Министерстве дошдеи жунсогъире СССР. Унжо кор сохди гьеммей зиндегуни, гъэлхэнди сохди докторскире, сервори сохди гIилмие лабораториере, бири бинелуье гIилмие корсохдегоревоз ве ю хуьшдени нуьвуьсдегор омборе гIилмие ве дофусие коргьо (омборте 120). Гешдеи гIилмие эну бири бинеревоз эри тозе э кор венгесдеигьо э жире-бе-жирее вилеетгьо гIуьломе. Те песини рузгьой эн хуьшде бири – э войней не гьишдеи эки руй-бе-руигьо пэхьникигьо – нисе ведарвфде рафде эз вилеет. Хуьсуьр эн ме, Эмма Александровна, гьемите духдири, акушер-гинеколог э омборе вэхдевоз корсохдеи. Экуьнди ниме девр у бири серворие гинекологевоз еки эз районгьо Москове.

– Комини вузе ишму варасундейт ве эри чуь вихдейт гье у сенигIэте?

– Ме бегьем сохдем Суьфдеи Московие медицинеи университете э нум И.М.Сеченове. Эз гIэили мэхьшево сохдем бире духдир, кумекии доре зенгьоре ве доре угьоре мозол дедеетире.

СенигIэте «акушерство ве геникологие» ме вихдем варасиреи: эри ме гье у еки эз вожиблуье ве гъэдуьрдание сенигIэткори, эхи гуфдире оморе э товун жунсогъи зенгьо ве омореи э гIуьлом тозе зиндегуни.

– Ишму – кандидат медицинеи гIилме. Э комини гъосуьтевоз ишму гъэлхэнди сохдейт? Чуьтам гъэрор норе э ижире гурунде жофоревоз?

– Э 2008-муьн сал ме гъэлхэнди сохдем кандидатски диссертацире э жиге эн хуьшде aIma mafer, э кафедре акушерстве ве геникологие Суьфдеи Московски Медицинеи университете э нум И.М. Сеченове. Гъосуьт диссертацие эн ме – хундеи гьеймогьоине корисохигьоре э акушерстве ве геникологие эки боржи э зенунеи гIэилсуьзиревоз. Гьисди ижире сейреклуье, оммо лап гурунде нечогъи, синдром Ашермана, э сер комики зенгьо нисе дануьсде гьисди гIэилгьо. Мере э пушо поисде хундеи гье у нечогъире ве винире рэхьгьоре угьоре гъэрор норе. Эки мозоллуьи, э жиге овурде омори тозе тегьер хоси э кор венгесдеи лазерни технологире. Гье у гъэнжогъи бирмунди барасилуьи эн хуьшдере, ве ме шори, кейки нечогъгьо эн ме бирени дедегьоревоз.

– Ишмуре омбори гIилмие жофогьо. Кор мисохит ишму э сер докторски диссертацие?

– Эри, гIилмие корисохи гьеммише мерэгълуь сохде вожиблуье жиге э зиндегуни эн ме. Ме дофус зеренум э сэнигIэткорие журналгьо, бэхшвегири сохденум э конференцигьо. Э биёвгьо – кор э сер докторски диссертацие. ГIилм доре минкини рафде э пушово ве параменди сохде медицинеи коргьоре.

Чуьтам ишму дануьсденит, духдиргьо гьеммише хундени ве зевер сохде гьинорменди эн хуьшдере. Ме гъэрор норе вегуьрде дуьимуьн буьлуьнде соводи э сенигIэткори «э гуьнжо овурде ве рэхьбери э дошдеи жунсогъире». Ме варасундем Серворие академире РАНХиГС.

– Чуьтам ишму фикир сохденит, ГIэилгьо эн ишму зиёд мисоху медицинеи гъумолете? Ихдилот сохид э товун кифлет.

– Кифлет эри ме – гье у имидие жигеи ве минкини гуже. Гьелбетте, мере мибу дуьлхоши, эгенер гIилгьо эн ме зиёд сохде духдирие гъумолете, оммо ме хьисоб сохденум, чуьки бинелуьи – эри чуь угьо вихде сенигIэте э сер гуьнжолуье сенигIэт ве бире бэхтлуь. Ме дедей дуь зиёдгуьзелие духдергьо, Эмме ве Злате. Эмме зигьисдени ве хундени э Великобритание, у сохде карьерере гIилмчие-химике. Ме лап сикелуь, чуьки у вихди ГIилме, — гье у рэхь, комики талаб сохде келе жофохосдеире, гьиноре ве бофолуьи коре.

Злате, гьеле нисе фикир сохде э товун песдеине сенигIэт, гьейсэгIэт у фикир сохде э художественни гимнастикеревоз: у хунде э зугьунлуье школе ве зиёдие гъувот доре эри вегуьрде нуме мастере спорте.

Шуьвер эн ме, Григорий Петрович Нисимов – варасди МГУ, сенигIэткор э экономике гIуьломие сэхьиблугъи, кандидат географически гIилме. Ме гьеммише гуфдиренум, чуьки мере бэхди: у, эки бэхдлуьи, нисе духдир. Э кифлет эн иму весси медицине – кими вэхд мере гьечи оморени, чуьки э хуней эн иму чуькле консилиуми. Григорий — эн ме гьэгъигъэтлуье кумекии ве бине. Гьемме тозе сергиригьо у вохурде э варасиреиревоз ве гьеммише бовор сохде э ме, гьеле кейки ме бибоворини сохденум. Ветовусдеи – гье у эну жирелуье хуби, э песой комики ме уре лап согъбоши гуфдиреи: бире эки духдир нисе асанти, ве у дануьсдени. Кейки иму гоф сохденим, у кумекии доре ихдилоте э гьер гъосуьт. Жейле ме гъимете верзуьнде, чуьки у э мерэгьевоз гуш веноре ихдилотгьой э товун коре ве пуьруьш сохде э меревоз медицинеи пуьрсуьшгьоре. Тозе корисохигьо эки хоси гIэилсуьзире э кор венгесдеи лазерни медицине кумекии дори омборе зенгьоре бире дедей. Гье у весси, эри чуь нум эн у гьеммише мунде э медицинеигьо барасигьо. Гуьнжуьнде гIилме ве рэхьберире,медицине теоретически ве практически, гье у лап четини, оммо Ирине Нисимове барасилуь гъэрор норе. Войге сохденим песдеине барасигьо э лап четине кор.

Ньувуьсди Стелла Давыдова

Тержуьме сохди Ягудаева Ольга