Гьер сал э вэхд поиз э 15-муьн Тишрей сер гирде оморени шоре мигIид дин-догIотлуье хэлгъ иму – Суккот. Суккот – шоре мигIид сукегьо, комики норе омори э еровурдеи 40 салине гешдеи хэлгъ жуьгьури э сэхьро Синай э рэхь эз Мицраим э Хори бебегьо, кейки одомигьо зигъисдет э сукегьо, сохде оморигьо эз луьгегьо. Гьемчуьн суккот, вэхд комики ранжбер шори сохдени, вечире мэхьсуьлет жофой хуьшдере ве бэхшгьой хори Худоре.
Имисал э луьвэхь урусси гуьре шоре мигIид жуьгьури офдорени э 6-13-муьн октябрь ве гирошдени хьофт руз. Э еровурдеи эну вэхд иму ведиромореним эз мухькеме хунегьойму ве гирошденим э лэхье суке. Бун сукере гереки веноре э лугьегьоревоз, комигьореки бие кешу гьечу, ки веди бу гуфдире астарагьо. Суке нисе гъэлхэнд сохде эз сэхде ворушгьо ве хиникигьо. Секонесуьзи ве имидлуье зиндегуни межбури эз де себебгьо иге.
ГIэдот вокурде сукегьоре нушу дорени, ки не мухькеме хунегьо, не муьхькеме бун нидануь гъэлхэнди сохде имуре гьечу, чуьтам имуре дошдени Офирегор. Чуьтам э вэхд ведиреморои эз Мицраим ве зигъисдеи э сукегьо, не бун ве диворгьо дори хэлгъ жуьгьурире боворин ве гьувот, оммо мугъбет ве гис сохдеи биреи э зеверсер ишу Офирегоре. Борухьосуьз эн Офирегор е доне хуне гьич вэхд нидануь бире боворинлуь.
Унегуьре, шев э асму ведиреморенге астарагьо, бэгъдовой тефило хундеи, диреморе э суке, борухо сохде гереки. Э суке хунде оморенуьт тефилогьо, э вэхд комики э дес гуьрде оморенуьт жуьре-бе-жуьре луьгегьой доргьо нушу доренуьтгьо мэгIэной мигIиде: хуьрмов, ива, мирт, ве э лимон ухшеш зеренигьо этрог. Гьер эз угьо нушу доренуьт е жирей одоми.
Этрог, комиреки гьисди дэгIэм ве хушбуй ве у нушу дорени жуьгьургьоре, комигьоки гьисдут дануьсдегор Туро ве сохденуьтгьо никилуье коргьо.
Велгъ хуьрмов, доренигьо ширине бегьер, оммо буйсуьз нушу доре оморени жуьгьургьоре, сэхьиб дананигьой Туро, оммо нисе сохденигьо хубе коргьо.
Мирт, мэхьсуьл хурдени гIэмел нисе оморенигьо, оммо э хуше буйгьовоз нушу дорени жуьгьургьоре эз комигьо, чуьн хушбуй, лов сохде оморени хубе ве никилуье коргьо.
Ива, комиреки нисди не дэгIэм, не буй, ве у нушу дорени жуьгьургьоре, комигьоки нисе дануьсденуьт Туроре ве нисе сохденуьт никилуье коргьо.
Се мэхьсуьл хуьрмов, мирт ве ива бесде оморенуьт эеки э е десде ве эеки э этрогевоз нушу доренуьт еклуьи хэлгъ жуьгьурире ве жугьобдорлуьи дуь э песой еки. Чуьн Офирегор гьемме екире гуьнжуьнди э е десде – е хэлгъ эри кумек биреи дуь эри еки, доре данани дуь екире ве бире жогьобдорлуь дуь эри еки.
Гъонунгьой ве гIэдотгьой мигIид: Кей вокурденуьт суккере? Бэгъдовой руз Кипур гереки вихде раче, темизе жиге, эжеки нисдуьт сэхде кулокгьо. Бун суккере веноре оморени э дор-дурохэвоз, оммо уре гьечи мие кешу, ки веди бу гуфдире астарагьо, ве воруш не диреморенигьо тегьер. Гьундуьри суке мие бу эз 80 см те нуьгь митро ним, фирегьи ю эз 60 см. те чендгъэдер воисдгеш. ГIэмел ниев оморе вокурде суккере э зир луьгелуье дор, чуьнки гереки вокурде сукке, хьозуре тегьер нэгI. Вараюнде оморени сукке э хунчегьой суьмбуьлевоз, хушегьой онгуревоз, гъэребечгьо, фундугъгьоревоз, э ченд жире емишгьоревоз, гуьлгьоревоз.
Хаг Суккот самеах!
Мозоллуьни у инсон, комиреки хош оморе ве дануьсдени шор бире эз кешире жофой хуьшде. Ижиреи мэгIэно эн мигIид Суккот. Эдее тевэгъэ биреним эки жэгIмиет иму эри бире эшгълуье бэхшвегир мигIид Суккот. Эз гьеммей дуьли-жуни эдее омбаракбу сохденим ишмуре э мигIидевоз ве хосденим эришму жунсогъи ве э барасигьой жофои расиреи. Берекет биево эришму ве шор гердо дуьлгьошму, гIэзизе дусдгьо!
