Пуьрсуьш технически овхьолете гIовегировундение тургьоре э муниципальни соводигьо ве гъэдере эсер дореи могьлугъе хубе гьенжирее гIовевоз бири фегьмсохи э гуьрдлеме республикански Хьуькуьме э зир рэхьберисохи Абдулмуслиме Абдулмуслимове.
Абдулмуслим Абдулмуслимов риз кешири, чуьки омборе гIовегировундение системегьо э Догъисту талаб сохде тозе сохдеи ве дуьруьжде гъуьчсохи э сереботи омбор экор венгесде оморе инфраструктурере. Лап вожиблуьи ве четинигьо э гIовеведебердеиревоз.
Зуте э сереботи омбор биреи черверурие инфекцие э Магарамкентски районе э июль 2025-муьн сале Премьер-министр гъэдэгъэ зери Минстрое регионе гировунде технически фегьмсохи бинегьоре гIоведореие ве гIовегировундеие тургьоре э муниципальни районгьо ве шегьерие жигегьо те 1-муьн сентябрь. Премьер талаб сохди мэгIлуьмети эз жугьобдорлуье одомигьо эсер арти гировунде оморе коре.
«Омборе бегьем темиз сохдеие вокурдеигьо ве коммуникаци лап бири куьгьне. Угьо нисе дануьсде кор сохде э герекие гъэдеревоз, гъувотлуьи эн угьо нисе гьишде веровунде шеле венореире.
Зобуне гIоведореи нисе хушхьоле сохде жунсогъи могьлугъе. Гье у гуфдире э товун гереклуьи гъобул сохде гене гъэдергьоре эсер хубте биреи гъозиере э гIоведореиревоз э республике, э у гъэдер э кор венгесдеи гьеймогьоине технологи гIоветемизсохдеи ве дезинфекцие, э гуьнжо овурдеи гьеммишеине фегьмгерире хуби гIове ве фегьмсохи эз лой мерегълуьи идорегьоре хьуькуьме»,– эрзо нуьвуьсди сервор кабинете министргьо.
Чуьтам гуфдири министр вокурдеи, архитектуре ве ЖКХ РД Бахтияр Уллаев, э гъэд веровундеи гъэдэгъэгьоре Минстроевоз Догъисту бири э гуьнжо овурде дуь корисохие десдегьо, комикигьо э ведарафдеиревоз э жиге, э вэхд июль-август 2025-муьн сале, гировунде омори фегьмсохи чешмегьоре ве гIовегировундение тургьоре э омборте четиние могьлугълуье жигегьо муниципальни соводигьо республике.
Гьуьндуьре омборе э кор венгесде оморе тургьоре (80-100%) бирмунде омори э 9 муниципальни соводигьо, (60-80%) э 23-муьн муниципальни соводигьо. Э сер барасигьо фегьм сохдеире, омборте четиние э гъэдер гIоводореи гьисди Буйнакск ве Избербаш, Карабудахкентски, Каякентски, Бабаюртовски, Буйнакски, Ногайски, Тарумовски, Гергебельски, Ботлихски, Табасарански районгьо, гуфдири Бахтияр Уллаев.
Эки меселен, э республикански инвестпрограмме э 2025-2027-муьн салгьо веровунде оморе нуботлуье объектгьоре: «Дегиши муьлке гIовегировундеи Каспийск-Избербаш э тозе вокурдеиревоз энгуьле насосни жиге суьфдеи гьово гуьрдеире э шегьер Каспийск»; веровунде оморе объект «ГIоведореи дигье Доргели Карабудахкентски районе» ве «Тозе сохдеи системегьоре гIоводореи э дигь Какашура ве дигь Какамахи Карабудахкентски районе»; веровунде оморе объект «ГIоведореи дигье Новые Викри Каякентски районе (буругъ векендеи артскважинегьоре)».
Эзуш бэгъэй, везифе норе омори бегьем сохде вокурдеи объекте «ГIоведореи дигье Бабаюрт Бабаюртовски районе», гьемчуьн веровунде оморе объектгьо: «Вокурдеи гIовегировундение энгуьл э вечиреиревоз э 50 гьозор куб. метргьо э жигеревоз темиз сохдеи гIове ве дошде веровундеие тургьоревоз э нуькере «Быргы-озень» эри гIоведореи Буйнакски районе» ве «Вокурдеи овурдение гIовегировундеи эз жиге дезинфекцие гIове эри гIоведореи дигье Чиркей, Буйнакски районе»; веровунде оморе вокурдеи объекте «ГIоведореи дигье Хазар Дербентски районе».
Бири бирмунде, чуьки э гъэд Республикански инвестиционни прграмме пушоки дире дануьсдеи веровундеи 38 объектгьоре коммунальни инфраструктуре э жэгIмие гъэдер 1,77 млрд монет. Эз бирмундеие объектгьо – 36 объектгьо гIоведореи ве 2 объекте гIовеведебердеи э е гъэдер мескен 24 муниципальни районгьо ве 3 дигьбонгьо, комикигьо дарафде э гъэд шегьерие иловле шегьере Махачкале. Коргьо э угьоревоз уже сер гуьрди. Овгъотгьо фуьрсоре омори э проектгьо сохдеи ве енебуге вокурдеие-монтажни коргьо. Э барасии э кор венгесдеи объектгьоре темизе гьенжирее гIовевоз мибу доре 173,2 гьозор одомигьо, дечире нори 372,9 км товегировундеи.
Бэшгъэ Бахтияр Уллаев гуфдири э товун объектгьо, комики вокурде омори э гъэд РИП э песини салгьо: гIоведореи дигь Маджалис Кайтагски районе – 9,63 монет куб.м.; тозе сохдеи ве тозеден вокурдеи системегьоре гIоведореи шегьере Буйнакск. Вокурдеи гIовебердеире Чиркей-Буйнакск – 17,61 монет куб.м.; тозе сохдеи системе гIоведореи шегьере Кизляре – 20,13 монет куб.м.; тозе вокурдеи дорунешегьерие тургьо канализацие шегьере Хасавюрт – 20,54 монет куб.метргьо.
э арти фегьмсохи пуьрсуьшгьоре Абдулмуслим Абдулмуслимов гъэдэгъэ зери Министерстве вокурдеире, архитектуре ве ЖКХ РД гьекки э Минэнерго республике дануьсдеи вожиблуье объектгьоре гIоведореире э муниципальни районгьо эри фегьмсохи пуьрсуьше пуледореи угьоре э сер э гуьнжо овурдеи проекте Республикански пуледореие программе э 2026-муьн сал ве э вэхд 2027-2028-муьн салгьо э хьисобсохиревоз минкинигьоревоз республикански бюджете.
Серворгьой муниципальни районгьоре ве шегьерие иловлегьоре кумекие тэгIрифире дореи овурде хуби гьенжирее гIове э гуьре э талаби санитарни гъэдергьо ве тегьергьо э могьлугълуье жигегьо.
