Пуьрсуьшгьой э гуьнжо овурдеи кор э органгьой опеки ве попечительстве, гьемчуьн эн кор пур сохдеи социальни бешпутгьорй эн бэхшвегиргьой эн жирелуье гъовхолуье операцие ве эн кифлетгьой энугьо фегьм сохде оморебу и пушогьо э гуьрдлеме. Гуьрдлемере рэхьбери сохдебу жигегир Сернуьш Хьуькуьм эн Республикей Догъисту Абдурахман Махмудов.
Э пуьруьшсохи бэхш вегуьрдебируьт министр жофо ве эн социальни параменди эн Республикей Догъисту Магомедзагид Кихасуров, рэхьбер филиал эн хьуькуьметлуье фонд кумеки дореи бэхшвегиргьой СВО «Гъэлхэндчигьой Ватан» э Республике Догъисту Идрис Курбанов, жигегир сервор эн региональни социальни фонд «Гьеммееки» Айшат Рашкуеве угьонигее мерэгълуье руйгьо.
Гуфдире оморебу, ки эри песини рузгьо жэгIмие гъэдер етиме гIэилгьо э республике кем бири. Гьечи, э гьонине вэгIэдо э Догъисту зигьисдени 2 483 етиме гIэилгьо ве гIэилгьо мундетгьо бебе-дедесуьз, э и хьисоб етим-есиргьо – 725 одоми ве социальни етимгьо – 1758 одоми. Э и гуьре гъэдер эн етиме гIэилгьо эз поревоз ве те имбурузине руз э республике кем бири э 578 гIэилгьо ( эри 2022-муьн сал – э 275, эри 2023-муьн сал – э 410 гIэилгьо).
«Э 13-муьн Гьеммеуруссиетие съезд рэхьбергьой идорегьо эри етиме гIэилгьо ве эри гIэилгьо мундетгьо бебе-дедесуьз, комики гировунде оморебу э апрель 2025-муьн сал э Москов, гуфдире оморебу, ки Республикей Догъисту дери э пенжимуьн жиге эн субъектгьой эн Уруссиетлуье Федерацие, э комигьоки веди бирени лап зиедие гъэдер кем сохдеи гъэдер етиме гIэилгьоре ве гIэилгьоре, мундетгьо бебе-дедесуьз — э 30% эз жэгIмие гъэдер эн гIэилгьо. Эри 2024-муьн сал э 98 гъозиегьо поюнде омори опека, деде-бебегьоре тозеден доре омори ихдиери, ве гIэилгьо доре оморет э кифлетгьо», — ихдилот сохди А.Махмудов.
Министерство жофо эн Республикей Догъисту расундени меточески коре э идорегьой эн социальни гъэлхэнд сохдеи могьлугъэ э муниципальни районгьо ве шегьерлуье округгьо э товун пуьрсуьшьой опеке ве попечительства.
Э май-июнь 2025-муьн сал эри сенигIэткоргьой эн УСЗН гировунде омори е жерге вебинаргьо э товун э гуьнжо овурдеи ве дешендеи коргьой эн э 18 сале нерасиригьо гIэилгьоре. Эри дошде низоме фегьм сохде оморенуьт овхьолет зиндегуни энугьо, етимдоргьо дошденуьт ихдиери ве гъонунлуье мерэгъгьой гIэилгьоре.
Э гIэрей гуьрдлеме гьемчуьн пуьруьш сохде оморебу пуьрсуьшгьой дошдеи хунелуье ихдиергьоре эн етиме гIэилгьоре.
