Кейки ме шиновусдем гье и мэгlнире, дуьл ме сигъмиш бисдо. Мере месд сохди неки берхити сес веровундегор, оммо ве нуьвуьсде оморе хэтгьо э гьовуме зугьун жугьури, гlуьзетсохи оморигьо э гьовуме эри ме шегьер Дербенд. «Джон Дербенд» —
мэгlни, эн ки хьэйронлуье гьово дуьлдэгъдэгъэ дори э ёрбиёригьо эн ме. Нуьвуьсди ве веровунди гье и моле Лазарь Изгияев, ве мере ёгъин воисди шинох бире э гье и мэгlрифетлуье музыкантевоз. Ве ини – ме меслэхьэт сохденуьм э уревоз.
— Лазарь, ме ве хундегоргьой иму воисденим э товун ишму омборте дануьсде. Эйчуь мэгlни э товун Дербенд сес доре гьечи сигъмишлуь, е гъэдер расиреи симгьо жуне?
— Гьери, эзу товун ки, чуьки ме хьэсуьл оморем ве келе бирем э гье и гъэдимие
шегьер, коминире лап хосденуьм. Зигьисдейм иму э куче Пушкине, 69, э жэгlмие гlэрей- миллетлуье хьэёт. Э имуревоз гъуншиети бири инсонгьо жире-бе-жирее миллетигьо. Зигьисди лап дусдлуь, дарафди э гъуногълуьи э гьер мигlид, чуьтам э ки нисе дин-догlоти,
гьечуь ве э ки дин-догlотигьо. Е жиреш гофнесохи э сереботи дин-догlоти гьич не бири. Ве гъозиегьо гьевелине сал э гъовумлуье шегьер ме, кейки зулумкорсохгьо сухунди нумазе ве килисере ве куьш-
ди гъуллугъчире дин-догlот хочперези ве гъэреулчигьоре, лап ералуь сохди мере, ве э
ме хьэсуьл омори фикир тозе мэгlни.
— Эже ишму тербие вегуьрдейт ве чуьтам оморейт эки музыке?
— Ме тербие вегуьрдем э школе №3 нум Ленине, оммо эз дуьимуьн класс рафдем
э музыкеи школе э класс аккордеон ве э лап хубе данани бегьем сохдем варасдем уре.
Музыке гьеммише ве э гьемме жиге бири рэхьсохдегор ме. Деде-бебей ме гьемиге кор сохди э музыкальни школе, умогьой теклуье э шегьер – э куче Буйнакске. Дедей ме те имбурузине руз э дуразовуне гировундеи омборе вэхд кор сохде э музшколе библио-
текари. Бебе кор сохди рэхьберисохи хозяйствой – 40 сал э е жиге. Гьелбетте, чуьки ве мере нори э хундеи вегири э унжо.
— Эгенер ми ишмуре не бисдо мэгlрифет, ишмуре ми нисе гъобул сохде. Деде-бебе гье уре дануьсди — ве гьэгъигъэт унегуьре дори ишмуре тербиевегуьрдеи музыке. Ихдилот сохит э товун деде-бебе хуьшде.
— Бебей ме Изгияев Манахим Илизирович, — бинелуье дербенди, чуь ве келебебе ве
келеи келебебе. Бебе, э хьэйфбери, муьрди. У бу номуслуь, селигъэ ве жофокешлуье
одоми. Бебей ме возири э хьофдсимлуье гитаре ве зиёдгуьзел мэгlни хунди. Келебебей
мере эз бебеи гьемиге нум дори Лазарь, мере нум дори э хотур келебебе. Те довгlо,
э вэхд векендеи э гужевоз сэхьибие хориигьо, девлетгьо, у дори е ченд хунегьой хуьш-
дере гьовумгьоре. У зигьисди те 106-муьн сали, кор сохди рэхьгьовунчи. У хосди тебие-
те, кошди доргьо эри биёвгьо эрхэгьо, э у хьисоб емишигьо. Кейки ме форигъэти ве-
гуьрдем э пионери лагерь э зир Избербаш, гогь винирем лап дуьруьжде сэхьро, кошде
оморигьо жире-бе-жирее емишигьо доргьоревоз, эри чуьки гlэилгьоре гlэмел миёв хурде. Ве э ме гуфдири, чуьки гьемме угьоре кошди келебебе Лазарь. Ме лап текебури бирем ве гьейсэгlэт текебурлуь.
— Ихдилот сохит э товун дедей хуьшде, Лазарь. Чуьтам ме варасирем, муьгьбет эки музыке ве шогьири ишмуре дори у.
— Эки шогьири ве эки эдебиет – гьелбетте деде. Оммо эки музыке – бебе. Дедей ме – эз гьемме рэхьмедуьле одоми э гlуьлом, ме варасиренуьм, чуьки жугьурие кук
гьеммише гьечуь мигуью э товун дедей хуьшде, оммо гье у гьисди бире гъозие. У гьич
вэхд ни дануь эз ён зере гирошде кеслуье дуьлести ве бедире, гьеммише гуш дошде ве
кумекии доре чуьтам гьисди минкини, у гьисди лап бэхшвегирлуье ве дуьлдердлуье
одоми. Нум эну Пурим Илизирова, у гlэсуьли эз Махачкале, чуьтам гуфдирени, кайтагъи. У те имогьоиш кор сохде:рэхьбери сохде книггьоревоз ве нотагьоревоз. У лап назуьке ве данандее одоми. Ведарафдеи э шувер э бебей ме, гирошди э Дербенд. Бебей
эну, Ихилов Илизир Илизирович, э сенигlэткори сэгlэтчи, оммо гьеле рэхьбери сохди е ченд тукунгьоревоз. Келедеде
бири хунеихозяйке.
— Мере не воисдебу е гъэдер расире гье и гъосуьт, зуте дануьсдеи, чуьки зереи э ишму дорд, оммо ишму миё бу ихдилот сохит э товун кифлет ишму. Гье и вожиблуьи, эри чуьки хубте дануьсде ишмуре.
— Зен ме муьрди 7-муьн апрель 2022-муьн сал. Гьэгъигъэт у гьуьнерлуь бири э у, чуьки э мэгlни хундеи ме э кафе ве ресторангьо, гуфдиребу, чуьки мере зиёдгуьгчегие сеси, ве биё мэгlни хунде, эри чуьки расунде шори
ве э хуьшде, ве э инсонгьо. У нуьвуьсди текстгьо эри мэгlнигьо эн ме, у мере эшгъдори. Ве ини омборте 20 сали ме зигьисденуьм э Пятигорск ве мэгlни хунденуьм э межлуьсгьо – неки эн имунигьо,
оммо э армянски, гречески, уруссигьо – хунденуьм мэгlни э зугьунгьо угьо. Хунденуьм э ресторангьо ве кафе. Ве экуьнди дегь сал ме бирмундеи гировунде э кафе «Шашлыки
у Володи». Мере гье у расунде гьэгъилуье хоши.
— Комини рол возире музыке э зиндегуни ишму? Гье и гьисди бинелуье жире корисохи эн ишму?
— Бинелуье жире корисохи ме – гье и музыке, энжэгъ музыке. Музыкесуьз эри ме хьэсроти. Музыке э зиндегуни ме дарафди эз лап жовоне гlуьмуьрлугъи. Эз 14-муьн сал ме
мэгlни хундем ве возирем э гитаре. Иму курабиреи э хьэрмэхьгьоревоз ве мэгlни хунде
– ве хьэётигьо, ве попсовигьо. Музыке – гье и серворлуье муьгьбет зиндегуни ме, у гьеммише дери э дуьл ме.
— Ихдилот сохит э товун
гlэилгьой ишму.
— Мере чор куки.
— Ишму гlошире одоми.
— Эри, ме гье у гьисди гlошири. Мере зиёдгуьгчегие кукгьо. Келеи кук бегьем сох-
де медицини институт, дуьимуьн хундеире варасди ве э гъушун гъуллугъ сохди. Миглеи кук тербие вегуьрде ве кор сохде. Эз гьемме чуьклеи хундеи вегуьрде э Ставрополь.
— Гьисди ми ишмуре мерэгълуьи эз музыке бэгъэй? Енебуге музыке ишмуре согълу гъупермиш сохди?
— Е жире екигегьо мерэгълуьигьо мере нисди. Энжэгъ Музыке. Музыке гьисди бинелуье гъэдуьр э зиндегуни ме. Ве ме согъбоши гуфдире эз Худо чуьки У мере дори ижире бэхш, чуь божеренемэгlрифет нуьвуьсде гьово музыкеи ве мэгlнихуни. Ве гье и эри ме бинелуье жире кор.
Музыке дануьсдени огол зере жире-бе-жирее нушу дореи ве дивэгl жун, ве музыкантгьо
бирмунде хуьшдере эз сер музыке ве дорени гье и гушдошдегоргьой хуьшдере.
— Эгенер ми гlэмел миёв вогошде э гьевелине, чуь дегиш мисохдит э зиндегуни хуьшде?
— Гьичиш ми ме дегиш ни сохдуьм. Ме э товун гьичиш гьимиш не сохде, егlни, гьечи бу гъисмет.
Стелла Давыдова
