7-муьн октябрь, 72-муьн сали руз хьэсуьл омореи хуьшдере гировунди уруссиетлуье хьуькуьметлуье ве политически корсох, президент Уруссиетлуье Федерацие , сернуьш Хьуькуьметлуье Меслэхьэт эн Уруссиетлуье Федерацие ве эн Меслэхьэт Секонесуьзи эн Уруссиетлуье Федерацие, Зеверие серворлуье рэхбер эн Ерэгъленмишие гъувотгьой Уруссиетлуье Федерацие Владимир Владимирович Путин! Э сер ишму вери келе жугьобдорлуьи эри гъисмет одомигьой Уруссиет ве эри гьеммей Уруссиет. Ишму сер гуьрдейт миллетлуье проектгьоре, жугьоб доренуьтгьо э мерэгъгьой вилеет. Ишму — нишоней гьэгъигъэтлуье ватанхогьи Уруссиети, комики э гьер руз зиндегуни хуьшдеревоз э жовоне эрхэгьо бирмундени, чуьниге гьэгъигъэтлуье гъуллугъсохи эри Ватан ве эри одомигьо. Эришму хосденим хубе жунсогъи ве гъувотгьо, эри расире э пушо норе оморигьо везифегьо, хубе хьовиргьо ве гъулишони эри гlэзизе вилеет!
Серворгьой эн де вилеетгьоиге ве политикгьо В.В.Путине омбаракбу сохдет э руз хьэсуьл омореиревоз
Суьфде Владимир Владимирович Путине омбаракбу сохди президент Беларусь Александр Лукашенко.
Песде омбаракбу сохдебируьт премьер-министр Армение Никол Пашинян. У имидлуьни э песдеине еклуье кори сохи Ереване ве Москове.
Омбаракбу мэгlлуьмети гьемчуьн фуьрсори сервор Турцие Реджеп Тайип Эрдоган. Чуьтам мэгlлуьм сохди пресс-гъуллугъи эн Кремль, В.В.Путин э уревоз пуьруьш сохдет э товун дуьтарафие гъэножогъигьо.
Эзуш бэгъэй, омбаракбу сохдебируьт президент Никарагуа Даниэль Ортега, вице-президент Росарио Мурильо. Угьо эри В.В.Путин хосдет муьхькемлуье жунсогъи ве бараси э сер “садангьой фашизм”. Гье бирден эри В.В.Путин фуьрсоре оморебу е ченд омбаракбугьо эз Молдавие, эз гьевел биригьо президент республике, эз пушобер эн Партие социалистгьо Игорь Додон, эз пушобер эн блок “Бесгъуни” Илан Шор гьемчуьн сервор Гагаузски автономие Евгени Гуцул. Угьо разинуьт эз Уруссиет эри гъувотдореи ве кумеки сохдеи э Молдавие, не денишире э “хьэшо”эн молдавски хьуькуьмгьо ве дуьшмение политике коминиреки угьо гировунденуьт.
Песде омбаракбу сохдебируьт президент Туркменистан Сердар Бердымухамедов, серворгьой эн Дорум Осетие ве Абхазие Алан Гаглоев ве Аслан Бжания.
Сиротгьо э гуьзет В.В.Путин веноре омороебу э е ченд шегьергьой Италие. Оммо омбаракбу сохде не оморебу.
8-муьн октябрь э Москов гировунде оморебу саммит СНГ. Жерге коре гировундебу президент Уруссиет В.В.Путин
Э шогьнишон Уруссиет оморебируьт президентгьо эн хьэшд вилеетгьо: Казахстан, Азербайджан, Армение, Кыргызстан, Узбекистан, Туркмение, Беларусь ве Таджикистан.
Серворгьой вилеетгьо пуьруьш сохдебируьт е жерге пуьрсуьшгьоре, гоировундет артгьой еклуье корисохире э гlэрегьой СНГ эни сале ве гоф сохдебируьт э товун гlэрейхэлгьие ве региональни гъосуьтгьо.
Гьемчуьн пуьруьш сохде оморебу э товун гировундеи мигlид 80-сали бесгъуни э Буьзуьрге довгlой Ватани.
