Эз книг Хизгиле Авшалумове «Муьгlуьжуьзе гъозие-гъэдер гlэмелданеэгъуьлменд Шими Дербенди».

Кейки Шими бу косиб ве зигьисди лап михьтожлуь, эки эну е гиле шев дарафди дуьзд. Гешде вихде э торики, у нехэбереки расири э пой хисирегоре Шими, ве у гьеебо хэбер бири. Дуьзд, терсунде оморе, чу гуниле ведарафди э буруне. Шими э у дэгъдэгъэ вэхуьшди эз хьэлов, теретэгlди вегуьрди эз дорундарафде дивор песини мундигьо нун, вегуьрди гьебирден куьгьне парс гуьрде хэнжел, ве чуьтам бири, э е зирие партал, вирихди э песой дуьзд.

— Пой! Пой! —  хьэрой зери Шими э гъэд шев, вирихде-вирихде э песой эну э тип-тигьилуье куче, божэхьэт ториктегьерлуье товуш дореи минорегьо, э е десевоз жумундеи хэнжелевоз, екигеревоз – нун э пушо гуьрде э лой зури-зури вирихденигьо дуьзд. Не денишире э у чуьки Шими умогьой бу жогьил ве гъувотлуь, чуьтам у божэхь не зери, чуьтам у не вирихди э песой дуьзд, не дануьсди уре гуьрде. У бири лап бежидлуь.

Шими, э гурундиревоз нефес кеширеи, хэсдебире, хьуьршлуь, гьемме ю тар, вогошди э хуне. Нори нуне песево вогошдеи э дорундарафде дивор ве дуллу сохдеи хэнжеле э дивор, у дегешди э хьэлов.

— Ай, шуьвер, чуь гlэжоиби туь! Ки вирихде э песой дуьзд э нуневоз? – пуьрсири гlэжоиб бире зен, коминики э гъэйгъу кеширевоз денишири вогошдеи эн уре.

— Ай, зен, туь гьичиш не варасирени,- э хьэйфкеширевоз гуфди Шими.- Гьемме э шегьер дануьсдени, чуьки ме лап косибе одоминуьм ве неки шев, э торики, оммо ве э вэхд рузи э гlэтошевоз э хуне эн ме гьичиш офте ни дану, эри чуьки гlошир бире. Гьелбетте дануьсди э товун гье у ве дуьзд. Оммо гьеле не денишире э у овхьолет, у гье генешки дироморе эки ме: ведини, косиб лап гисне бири. Ини мере ве воисди гуьрде уре, бегьем хорунде, песде е дубо зере: дан эки ки дарафдениге,- ве рэхьо дореи э гьемме чор тараф.

— Гьери, дегьишденуьм гье и гьечуьни, -гуйге рази бири зен,- умогьой эйчуь туь вегуьрдей хэнжел?

— Хэнжел ме вегуьрдем, эри чуьки у, гиж, дебе не сохдеи ве гъобул сохдеи хьэёмендлуье хурек мере: эз чуь гlошир гьисдуьм эз у ве шоруьм. Эхи нисди омборте дуьлгуруние гlовун, рэхьо доре одомире гисне эз хуне…