14-муьн сентябрь, Сернуьш Хьуькуьм Республике Абдулмуслим Абдулмуслимов гъобул сохде бэхшвегири э межлуьслуье корисохи, гlуьзет сохде 95-муьн сали эз руз э гуьнжо омореи Ботлихски районе ве 25-муьн сали берборде гlэрейхэлгъие зулумкорисохдегоргьо, дарафдигьо э республике э 1999-муьн сал.
Гуъзетлуье гъуногъгьо ве бэхшвегиргьо корсохи бири Сервор Комитете Хьуькуьмдуме э гъэлхэнди генерал-полковник Ерэгъленмиш биреи Гъувот РФ Андрей Картаполов, жигегир Сернуьше комитете Хьуькуьмдуме э параменди одомие жэгlмет, пуьрсуьшгьо жэгlметие ве динлуье гуьрдномегьо Владимир Шаманов, генерал-майор ве сервор «Интерфакс-Юг» Александр Веклич, генерал-майор Алаксандр Ларченко, Игид РФ Загид Загидов, Алексей Вербицкий, депутатгьо Хьуькуьм думе Султан Хамзаев ве Артем Бичаев, депутат Хэлгъие Гуьрдлеме РД Магомед Патлухаев, сервор Ботлихски районе Руслан Гамзатов, гьемчуьн бэхшвегиргьо лешгерие корисохи , бэхшвегиргьо СВО, Игидгьо Уруссиет.
Гуьлгьо эки Сенгъ ёровурди ведиреморегоргьо эз Ботлихски районе, комики телеф бире э Келе довгlой Ватани, Афганистане, лешгерие корисохи э август-сентябрь 1999-муьн сал ве еккейгегьо довгlогьо дуь эекиревоз бэхшвегиргьо коре веноре Сернуьш Хьуькуьм РД Абдулмуслим Абдулмуслимов, сервор Комитете Хьуькуьмдуме э гъэлхэнди Андрей Картаполов ве депутат Хьуькуьмдуме Владимир Шаманов.
Ёр телеф бирегоргьо вегири минутевоз сессуьзи. Э гъэд корисохи венореи премьер Догъисту гофсохи дуь э екиревоз э гъовумгьоревоз ве бэхшвегиргьо лешгерие корисохи, гъуллугъ сохдегоргьо умогъой э Ерэгъленмише Гъувот РФ ве ихдиёригъэреул сохдение органгьо.
Шолуми гуфдиреи бэхшвегиргьо межлуьслуье корисохи, премьер-министр хунде шолуми гуфдиреи эз Сервор Догъисту Сергее Меликове зигьисдегоргьоре Ботлихски районе.
Ёр оовурде гъозие 25-муьн салине зутеине, Абдулмуслимов гуфдире хубе гофгьо гуфдиреи гьер догъистуниоре, зигьисдегоргьоре Ботлихски районе, гьемчуьн гьеммере, ки э у рузгьо гъэлхэнд поисде Ватане, дошде ведировунде шолуми ве динжи э республике.
У гьемчуьн шолуми гуфдиреи бэхшвегиргьоре лешгерие корисохире, оморегоре э Ботлих эз жире-бе-жирее регионгьо Уруссиете.
Э гъусо эн хуьшде премьер Догъисту бэшгъэ бирмунде ве кифлетгьо телеф бире лешкергъуллугъсохгьо, гьемчуьн оморигьо э район. У хубе гофгьо гуфдиреи дедеоре, комики дори эри бараси кукой эн хуьшдере.
Абдулмуслимов огол зере догъистуниоре гирде э ёр у хуние гъозиегьо, комики гирошди э 1999-муьн сал э е гъэдер мескен республике, гьемчуьн гъобул сохде гьемме коргьо эри нисе гьишде вогогьруши у гъозиегьоре.
Имбуруз догъистунигьо гене гъэлхэнд поисде мерэгъгьо Ватане, нушу доре игидьети, хуьшдере гъимиш несохи ве игиди. Эз сер гуьрдеи жейлее лешгерие операци 12 эз угьо верзуьнде нум Игидгьо Уруссиетие Федераци.
Той сохдеи дуь э еки гъозиегьо 1999-муьн сале ве гьонине вэхде генерал-полковник, Сервор комитете Хьуькуьмдуме э гъэлхэнди Андрей Картаполов. Согъбоши гуфдиреи зигьисдегоргьоре Ботлихски районе э песой боворини э бараси э1999-муьн сал генерал, жигегир сернуьш комитете Хьуькуьмдуме э параменди одомие жэгlмет, пуьрсуьшгьо жэгlметие ве динлуье гуьрдномегьо Владимир Шаманов. Э бирмундеи эн хуьшде у э ёр овурде четине гъозиегьо август-сентябрь 1999-муьн сале э Догъисту.
Келе бэхшвегири э гъэрорноме везифегьой зулумкорлуье операци, чуьтам риз кешире генерал, возире биригьо Сервор Догъисту Магомедали Магомедов.
Э Межлуьслуье гуьрдлеме эки ботлихцегьо руй бире ве сервор муниципалитете Руслан Гамзатов. У бирмунде жирелуье жиге гъозиегьо 1999-муьн сал э ёр зигьисдегоргьо Ботлихски районе ветовусдеи омборе синемишигьо.
Дегиши лешгерие корисохи э районе Гамзатов гуфдире дарафдеи гъуллугъсохи Сернуьше Хьуькуьме РФ Владимире Путине, комики бэгъдовой гуфдиреи э товун нисд сохдеи гъэчэгъоре ве дореи е гъэдер мескение согъэтегъерлуье вилеет вегуьрде э хуьшде жэгlмие рэхьбери КТО.
Э песой нушу дореие ватанхогьи омборте 600 зигьисдегоргьо районе, э гъэдер комики лешгеригьо ве гьемкоркигьо органгьо доруние коргьо бири бэхшире хьуькуьмлуье бэхшгьоревоз. Э корисохи лешгерие коргьо телеф бире 76 лешгеригьо, 5 гьемкоркие човуч ве 15 э войгей хуьшде гуьре рафдегоргьо.
Бирмунде э гъусовоз э пушой догъистунигьо ве хэгьер телеф бирегьо лейтенанте, серворе суре эри дануьсде рафдегор десде 136-муьн гвардейски жейлее мотострелковый десдей Романа Сидорова, комики бирмунде, чуьки 25-муьн салине берборде гlэрейхэлгъие гъэчэгъи сохдеи еклуьг бире хэлгъгьо Ботлихски районе Догъисту ве гьеммей Уруссиет. Имбуруз кифлет эн Сидоровгьо гьемчуьн бэхш сохде хьэйфбери э телеф бирегоргьо лешгеригьо э гlэрсгьоревоз э чумгьо.
Э 1999-муьн сал жовоние варасундегор Новосибирски лешгерие буьлуьнде серворе хундеи фуьрсоре эри хилос сохде Ботлихски районе ве гьеммей Уруссиете эз гlэрейхъэлгие зулумкорсохдегоргьо. Э еки эз четиние гъовхо э кент Танда у телеф бире э гlэжел игидлуье, вегуьрде э хуьшде гlэтош.
э эхири мигlидлуье гуьрдлеме эки 95-муьн сали Ботлихски районе премьер-министр РД Абдулмуслим Абдулмуслимов доре сенигlэткорлуье гlуьзетлуье нум 9 хубе корсохгьо — гье у духдиргьо, тербиедорегоргьо, тренергьо, гьемчуьн корсохгьо культуре.
Э межлуьслуье овхьолет иловлеи премьер дори ботлихцегьоре гlуьзетлуье нум «Верзуьшлуье духдир Республике Догъисту», «Верзуьшлуье корсох культуре РД», Верзуьшлуье тербиедорегор РД».
Жейлее бэхш э песой мердьети ве хуьшдере гьимиш ние сохдение, нушу дореие э сер веровундеи одомие гъэрхунди (эз уьлуьм эулое) дори Жавгарат Саадуевой.
Верзуьшлуье суьрхине бэхш э нум генерал-полковнике Магомеде Танкаеве э песой мердьети, игиди ве боворини Ватане бири бэхшире Сернуьш Хьуькуьм Догъисту Абдулмуслим Абдулмуслимов.
Корисохи зиёд сохде концертни программе, э сегьне бирмунде хэлгъие вежегъисдение десдегьо ве возирегоргьо.
Хэлгlэт эн мигlид бире миллетлуье сэхьиблугъи омборте 30 могьлугълуье жигегьо Ботлихски районе. Э зир гьово хэлгъие мэгlни гъуногъо хурде динлуье жирей хурег миллетлуье хурекхоне, гьемчуьн шинох бире э молгьой хэлгъие ветэгъэгьо эн ботлихцегьо.
Э эхир программе корисохи, Сернуьш Хьуькуьм РД Абдулмуслим Абдулмуслимов э гьееки э Андреем Карповым ве Владимиром Шамановым сер кешире богьче ёр овурди телеф бирегоргьо бэхшвегиргьо жейлее лешгерие операци э кент Ботлих.
