29-муьн июль, Сернуьш Хьуькуьм эн Республикей Догъисту А.Абдулмуслимов вохурди э Векилевоз э товун дин-дог1отие коргьо ве миллетгьо эн Меслэхьэт Министргьо эн Республикей Беларусь э А.Румаковевоз.
Э Министерство э товун миллетлуье политике ве дин-дог1отие коргьой РД тарафгьо пуьруьш сохдебируьт еклуье корисохи Догъистуре ве Беларусь э гуманитарни сфере.
Э г1эрей вохурдеи гуфдире оморебу, ки денишире э план гуьре э Беларусь гировунде миев мероприятиегьо, г1уьзет сохде оморигьо э 115-сали эн шогьир Догъисту С.Стальски.
А.Абдулмуслимов риз кеши, ки омбаре одомигьой Догъисту зигьисденуьтгьо э Беларусь расирет э омбаре барасигьо э жофолуье корисохи. Э имбурузине руз э Беларусь зигьисдени эз 5 гьозор одомигьой Догъисту омбарте. Угьо кор сохденуьт э промышленни корхонегьо, э жунсогьи дошдеи, э бизнес, э г1илми ве угьонигее сферегьо.
Премьер регион гьемчуьн ихдилот сохди э товун эни гъозие, комики гирошдебу э уревоз э парад ВМФ э Каспийск. Эки эну куьнд омо догъистони, комики имбуруз зигьисдени э дорум-мэг1эров эн Беларусь э шегьер Брест, фегьм сохдени хэбергьоре эн Сервор ве Хуькуьм Догъистуре э Интернет. Ихдилот сохденки э товун суьфдеи нушу дореигьой хуьшде бэгъдовой омореи э республике, А.Румак гуфди: «Догъисту мидануь хурек доре гьеммей Уруссиете».
«Ме фикир сохденуьм, ки гьемме догъистонигьо – сэхьибкоргьо ве усдокоргьои. Иму рафдебирим эз рэхь «Кавказ» ве э гьемме жиге виниребирим усдохоногьо, одомигьоре кор гьисди. Омбаре тукунгьо, Гьебелкине, гьер гъунши восдоренуьт дуь э зеки молгьо. Э беларусь унгъэдер тукунгьо нисди. Иш гуфдирени э товун дилбоши одомигьо»,- гуфди А.Румак.
Э эхир вохурдеи э нушуй параменд сохдеи г1эреймиллетлуье гъэножогъигьоре ве муьхькем сохдеи дусдире э г1эрей одомигьой Догъисту ве Беларусь, А.Румак Сернуьш Хьуькуьм Догъистуре А.Абдулмуслимове бэхш дори жирелуье юбилейни медаль, ведешенде оморигьо э г1уьзет 425-сали эн Мински соборни хуней дин-дог1оти мусурмуи. Суьфдеи хуней дин-дог1оти мусурмугьо э шегьер Минск вокурде омори э 1599-муьн сал ве у вокурде оморебу эз тэхде. Тозе хуней дин-дог1оти мусурмугьо вокурде омори э 2016-муьн сал.
А.Абдулмуслимов гъуногъэ дори бэхшгьо – молгьой хэлгъие шекуьлуье мэг1рифетгьо.
Гереки э ер овурде, э везифей параменд сохдеи г1эрейрегиональни еклуье корисохире э г1эрей Беларусь ве Догъисту э гуманитарни сфере э 2021-муьн сал гъул кешире омори разименди э товун еклуье корисохи э г1эрей Муфтият эн Республикей Догъисту ве Духовни идорей мусурмугьо эн Республикей Беларусь. Эзуш бэгъэй, э июль 2022-муьн сал гъул кешире оморебу План мероприятиегьо э товун э кор венгесдеи Разимендире э г1эрей Хьуькуьм Догъисту ве Хьуькуьм Беларусь э товун алверие-экономически, г1илмие-технически ве базургенде еклуье корисохи эри 2022-муьн-2024-муьн салгьо.
