Бэгъдовой инаугурацие Президенте Уруссиет э гуьнжо овурде оморени тозе десде Хьуькуьм. Чуьтам ве зутеине хэёл сохдеи омборте несиет дорегор, Михаил Мишустин дошдеи жиге кор Сернуьш Хьуькуьме. Гьемиге гъувот дореи эн угьо фикир, чуьки Министерство гъэлхэнди белкине сервори мибу сохде тозе одоми, оммо нум Андрее Белоусове кеми ки фегьм сохди. Сергей Шойгу бири Секретареи Совети Секонеисуьзи Уруссиети Федерации э жигей Николае Патрушеве.

Оммо гьисди ве екиге дегишбиреи э десде Хьуькуьм, э товун комигьоки э сайт хуьшде мэгIлуьм сохде http:/government.ru.

Тозе куьгьне Сернуьш Хьуькуьм деберди э фегьм сохи Хьуькуьмлуье Думе фикир э товун десде тозе Хьуькуьм.

Денис Мантуров, эн ки рэхьбери гьисди ветэгъэ, вегуьрдени жиге суьфдеи вице-премьере.

«Зевербиреи овхьол вице-премьере, фегьмгери ветэгъэ, себеб эн гъозие бире вожиблуьи дануьсде расундеи технологие суьфдеи жиге, э товун чуь гуфдире омори э тозе майски буйругъ, гъул кешире оморигьо Президенте. Параменди технологии имбуруз гьисди э сервори жиге гьемме десде везифе, норигьо э пушо органгьо веровундегоргьо кор Хьуькуьме. Гьечи технологии суьфдеи жиге э гьемме рэхь кори, бош у самолётевокурдеи, гъирибер сохде молведешендеи, станкевокурдеи, радиоэлектронике, ВПК, божеренлуь биреи дуьруьжде гердундегор параменди экономике»,- гIуьзет сохди пресс-секретарь Сернуьш Хьуькуьм Борис Беляков.

Э хьисоб дешенде вожиби песдеине параменди кор мошини ве э вэгIэдо ю овурде расунде, дебердеи гIэрейхэлгъие кор мошини гьейву, э тозе гуьнжуьндеи Хьуькуьм веди биреи жире сенигIэткори вице-премьере. Э у жиге кор вогьне бири норе Виталие Савельеве, э песини салгьо сервори сохдигьо э Министерство кор мошини, те у вэхд э дуразовуне гировундеи омборе салгьо – еки эз дуьруьжде ватани авиакомпание.

Эз товун гирошдеи э тозе жиге кор Викторие Абрамченко э жигей вице-премьере миё бу дегиш сохде Дмитрий Патрушев, те у вэхд кор сохдигьо сервори Миндигьбонхозе РФ.

«У сэхьиб вожиблуье дананигьо ве синогълуье. Те гъуллугъ сохи хьэшд сал сервори сохди Уруссиетдигьбонхоз банк, бири э рэхьбери ВТБ ве хуб дануьсдени финанси жире кор. Божеренлуьи дануьсдеи расунде песдеине параменди боворинлуье жире кор»,- ёгинире гуфдири Борис Беляков.

Эз товун жигей ве жирей гирошдеи Андрее Белоусове э тозе жиге кор эзуш бэгъэй кор энергетике Александр Новак миё бу гузетсохдегор экономикеи десде (пуьрсуьшгьо кумекки экономики ве э гъэрушуйтеслихлуье жире кор).

Дмитрий Григоренко дуразкеши фегьмгери финанси ве гузетсохи жире кор. Эзуш бэгъэй э пушо норе гировунде эну рэхьбери цифровие параменди ве ек биреи жире, гьемиге антимонополи политике. Дмитрий Григоренко дошдеи жиге кор рэхьбери Аппарате Хьуькуьм.

Э гузетсохи Дмитрие Чернышенко жиге корсохи Министерстве гIилми ве буьлуьнде данани, Министерстве спорте ве Минэкономики э бедел параменди сафари диеш зиёд сохдеи Минсоводи дореи ве Уруссиетжовони. Гьемиге у дуразкеши разисохдеи э лой СМИ, кими вэхд дофус зере ве дофусзереи кор. Татьяне Голикове э жирей вице-премьер дуразкеши гузетсохи кор Министерстве дошдеи жунсогъире, Министерстве жофои ве социальни гъэлхэнди, Министерстве культури. Гьемиге э жире кор эну дарафдени Федеральни агенство э коргьо миллетгьо.

Гьемиге жире кор вице-премьергьо э тозе десдеревоз Хьуькуьм фикир дори дошде э песой Алексее Оверчук, Юрие Трутневе ве Марате Хуснуллине.

Эхири гъэрорноме э бэхшсохдеи жире корисохи вице-премьергьо мибу тогIинноме Сернуьш Хьуькуьме эзуновлейге фегьмсохи кандидатгьоре Хьуькуьм дума ве меслэхьэт дореи Михаиле Мишустине э Президентевоз.

Э министери блок нуботлуье дегишбиреи.

Э жиге кор министре мошини кор фикир сохди кандидатуре губернаторе Курски улке Романе Старовойте. Э жиге министре молведешендеи ве алвари фикир сохди кандидатуре губернаторе Калинингради улке Антон Алиханов, комики е вэхд кор сохди э Минпромторг, гьемиге дарафди э десде меслэхьэт дореи совети э товун молведешендеи эки Коллегие Евразийско экономикеи гузетсохи.

Э жиге министре энергетике э тозе десде Хьуькуьм гьисди губернатор Кемеровскеи улке – Кузбассе Сергей Цивилёв. Тозе министр дигьбони хозяйствой Хьуькуьмлуье дума фегьмсохди кандидатуре Оксане Лут. Чуьтам э ёр овурди Борис Беляков. Э Миндигьбонихоз у жофо кешире эз 2018-муьн сал. Эз 2021-муьн сал – кор сохди э жиге суьфдеи жигегир министре. Те гирошде э министерстве бири еки эз рэхьбергьо э профильни Уруссиетдигьбонихоз банк. Сэхьиб вожиблуье данани ве герекие данани эри кор э жугьобдорлуье жиге рэхьбер министерстве.

Э жиге кор министре спорте э жигей гирошдениё э екиге кор Олеге Матыцине фикир сохди кандидатуре губернаторе Хабаровске улке Михаиле Дегтярёве.

Жигегьо хуьшдере э тозе десде Хьуькуьм, чуьтам зутеине хэёл сохдеи, дошдеи: Антон Котяков (Минжофо). Александр Козлов (Минтебиет), Сергей Кравцов (Минданани), Ольге Любимове (Минкультури), Максим Решетников (Минэконопараменди), Антон Силуанов (Минфин), Михаил Мурашко (Миндошдеи жунсогъире), Ирек Файзулин (Минвокурдеи), Валерий Фальков (МиндананигIилми), Алексей Чекунков (Минмизрэхьипараменди), Максут Шадаев (Минцифре).

Зутеине хэёл сохде, чуьки эхирлуье десде федеральни Хьуькуьм мибу э гуьнжо овурде те 15-муьн май.