Э кефлет эн Захаровгьо се кук бири э довгIо. Гьемме бири игидгьо. Э товун дуь эз угьо иму э ёр овурдеим. Захаров Яков Захарович зенде оморе э келе кифлет э Дербенд, эзуш бэгъэй э кифлет бири 4 бирор ве 4 хэгьер. Бэгъдовой барасилуье варасдеи школе Захаров венуьшде рафде э Ленинград ве дарафде э тербиедорегоре институт. Варасде уре, вогошди э Дербенд, кими вэхд кор сохди тербиедорегор, песде сервор келе школе.
Э октябрь 1940-муьн сал жовоние ве мэгIрифете тербиедорегоре огол зере э лешгери. У гъуллугъ сохде э МэгIэрове Украине э Черновце. Те вогошдеи э хуне эри Захаров мунде дуь мегь, кейки сер гуьрде Буьзуьрге довгIой Ватани. Эри эну у сер гуьрде эз суьфдеи руз. Уре доре нум политруке э суьфдеи рузгьо довгIо. Гирошде гурунде гъовхо. Десдей гуниле зерегор эз пенж лешгерчи, э гъэд комики дарафде Захаров экуьнди е сэгIэт гъэлхэнд бире эз лешгергьо фашистгьо, 5 гуниле зерегоргьо нисд сохде гьемме фашистгьоре.
«Омборе вэхде гъойде эн иму бире хубте, эз немцегьо,- э ёровурде Яков Захарович,- иму э догъгьо бирим, оммо угьо э очугъэ жиге». Э товун и гъовхо кавказигьо нуьвуьсде ихдилот э гозит «Комсомольски расди». Фотокорреспондент эз Москов сирот зере игидгьоре, сироте дофус зере э книг э товун Келе довгIой Ватани. Игидгьо ихдилот бири нушу доре эки бэхшире, оммо э велвеле суьфдеи рузгьо бэхш нисе вегуьрди. Э дивизие гировунде гуьрдлеме э хьэё барасибергьо эн женг. Кейки лешгер эн иму ветовусде бесхунвегирии, ижире чуькле барасигьо возире келе вожиби, гьечи чуьтам боворини доре, чуьки немцеро гIэмел миёв барасире берде, гье у доре гъувот э лешгерчигьо.
3-муьн август 1941-муьн сал, э ён Каменца-Подольского Захаров бири гурунде ералуь ве фуьрсоре э софи э софхоне Харьков. Харькове туп гIэжели шенди эз себэхь те шев. Э зир туп гIэжели бири ве ералуьгьо э софхоне.
Бэгъдовой софи Захарове фуьрсоре э хундеи э Лешгери-политически Академие э Горький. Э ноябрь 1941-муьн сал уре фуьрсоре э Кавказски лешгерие жиге э Поти. Унжо у бири корсох лешгерие дивуни эри лешгерчи. Э октябрь 1942-муьн сал гъуллугъ сохде э еки эз идоре 18-муьн лешгери, комики нисе доре дарафде фашистгьоре э Крым. Яков Захаров рафди э разведке, рафди суьфдеи э гужлуье гъовхо, берде э песой хуьшде гьеммере. Э песой гъовхо э гъэд 18-муьн лешгери Захарове бэхшире ордене Гъирмизине Астара.
Э эхир 1942-муьн сал Яков Захарович гене бири гурунде ералуь. Гьисди э софи э Сочи. Духдиргьо сохде эри эну омборе операции, оммо герек бири бурраи пое зеверте сугърезани. Э софхоне келеи лейтенанте Захарове рэхьо сохди эз солдати.
Э 1943-муьн сал у вогошди э Дербенд, бири сервор школе №1. Ве э доруни бири у вэхд гурунд. Вес нисе сохде хурэг, партал, книггьо, тербиедорегоргьо, омборгьо не рафди эри хундеи, оммо Яков Захарович хьэрекети веноре сохде гьемме, эри чуь гIэилгьо хунди.
Э 1948-муьн сал Захарове нории рэхьбер вэхьзи горкоме партии. Песде у омборте 20 сал гене бири сервор школе №11. Уре дори нум «Верзуьшлуье тербиедорегор школе ДАССР» ве «Хубе корсох хэлгьие соводие дореи РСФСР».
Захаров Саадья Захарович, чуьклеи бирор эн Яков зенде омори э 1921-муьн сал э Дербенд. Огол зере омори Дербентски ГВК. Гвардия лейтенант, жигегир рэхьбер эн роте 9. Телеф бири 12-муьн февраль 1943-муьн сал. Гьовре сохди: Краснодарски улке, Северски район, станци Азовски. Эз уьлуьм эулое бири бэхшире медале «Э песой игидьети». Эз бэхширеие велг эн игид дануьсдейм чуьтам телеф бири гвардии лейтенант.
«Э вэхд женг гвардии лейтенант Захаров бири ералуь, оммо не шенди зими эн женге ве зиёд сохде рэхьбери десдере ве рафде э пушо. Кейки десде бири куьнд эз дуьшмение ДЗОТгьо душмение гуниле эри муьрде зери игидлуье командире.
