ГIэзизе хундегоргьойму! Омбаракбу сохденим ишмуре э мигIид азади ве темизиревоз, мигIид Нисонуревоз (Песах)!
И мигIид нушу дорени ведиремореи хэлгъ жугьури эз муьрс мицраим, ве гьемчуьн, чуьн руз хьэсуьл омореи хэлгъ жугьури, варасиреи, чуьниге «Азади», ве дуразе рэхь офдеи эну ве гуьнжуьндеи хуьшденлуье варасиреи эн миллет. Нисону сер гирдени эз 14-муьн руз мегь нисан. Имисал жугьургьо нушу мидуьт Нисонуре э луьвэхь урусси гуьре эз 22-муьн апрель те 30-муьн апрель э гIэрей 8 рузгьо.
Гьемме жугьургьо кура бире э кифлетгьой хуьшдеревоз э иловлей шуьлхон седер Песах генеш ихдилот мисоху э товун торих хилос биреи жугьургьо эз муьрс мицраим, хуте сохде гIэилгьой хуьшдере эри жугьобдорлуье вихдеи.
Э пушой Песах хуней жугьури темиз сохде оморени эз хамис – чигьой хуреки эз вероморе хэми ве гьемме унигегьо чигьой хуреки эже дери хэмире. Гъогъол – нун гIониетини, комиреки жугьургьо хурденуьт э гIэрей хьофд рузгьой мигIид э жигей нун. Гъогъол э ер овурдени э товун вихдеи, комиреки сохдет бебегьо-келебебегьойму, гьишде «хуней муьрсире» – Мицраиме.
Э суьфдеи ве дуьимуьн шев Нисону гьеммей кифлет кура бирени э иловлей суьфрей мигIиди. Хунденуьт китоб Агадаре – ихдилот сохденигьо э товун хилос биреи жугьургьо, гьерки хурдени чор пейлей шоробе, хурдени гъогъоле. Э суьфре егъин мие вебу гIов муьнуьки, шэгIмгьо ве келе бишгъоб э буьржуьнде кесегъгьоревоз гушди э осгъуревоз э гъэд ю, хое, тэхьле хьэвужгьо ве тэхьле савзегьо, салат эз венжире сиб ве куфде гъэребеч, дорчин ве е ченд дугълегьой шоробиш.
Иму ихдилот сохденим эри гIэилгьойму, чуьтам гешдебируьт бебе-келебебегьойму, чуь жире четинигьо гурундигьо угьо кеширет, эри офде ве гъобул сохде вожиблуье бэхш азадире – жугьобдорлуьире.
Иму гьер руз мие э хуьшде кешим, чуьн ведиреморенигьо эз хуьшденлуье руьхьлуье «Мицраим» ве мие хилос бошим эз муьрс зобуне вердушигьой хуьшде.
Суьфрей Нисонуи э ер овурдени, ки эеки э азадиревоз оморени гьемчуьн жугьобдорлуьи. Азади, нушу доре оморигьо э бебегьо-келебебегьойму омори, чуьн вихдеи энугьо дарафде э игърол э Худоревоз, гъобул сохде гъонунгьоре ве вокурде тозе тегьер зиндегуни хуьшдере.
Э гIэрей рузгьой Нисону иму хьэрекет сохденим вегуьрде тозе гъувотгьоре, эри дегиш сохде э хубтее тараф зиндегунимуре, нореним э пушой хуьшде тозе везифегьоре. Ве бигьил э и рэхь э пушошму э дуь ло лов биренуьт дерьегьо ве э дуь ло жиро биренуьт догъгьо. Худо нисе норе э пушойму ужире везифегьоре, комигьореки иму ниданим веровунде. Оммо, энжэгъ гереки лап сэхд воисде веровунде угьоре ве лап сэхд хосде азади ве Худоре. Гереки гуфдире, ки и мугьбет гьеммеймуре гьисди.
Эз нуминей коллектив редакцие республикански гозит «Ватан» эз дуьли жуьни хосденим эришму рач гировунде и мигIидлуье вэхде эеки э кифлетгьой хуьшдеревоз, хош бире э суьфрей Нисонуиревоз. Бигьил ихдилотгьой Нисонуире бебегьо ихдилот сохденуьт э кукгьо, ве гIэилгьой энугьо ихдилот сохденуьт э невегьо.
Бигьил э и мигIидлуье рузгьо гердо товуш ве шори эришму ве эри куьнде одомигьошму!
МигIид Нисону эн ишму обмаракбу!
