Э гlэрей дуьворой музей гъозие гlуьломие культуре не дин гирошди межлуьс, комики гьеебо, гировунде омори э дуь едигорлуье руз ве сал, э ёр овурденьо имуре э залумие не хунлуье гъозие Келе довгlой Ватани – Гlэрейхэлгъие руз ер гъурбуй эн Холокост не 80-дот сали эз руз хилос сохдей Ленинград эз дес эн фашисткой блокада.
Бэхшвегиргьо бири хундегорой школей дербенди, комики винирет хьозуьрлугъи эн концертный программаре: хундет дестонгьо, э ёр овурдет блокадой Ленинграда, эз игидо, комики э гъимет жун хуьшдерево гъэлхэнд поисдет Ватане, э ер овурдет гlовунсуьзе гъурбуне, комики э гlэрейшу бу омбаре келетегьо, зенгьо не гlэилгьо. Лауреат эн конкурс «Мэгlни бараси» Лаура Изгияева хунди дестонгьо «Ме мидешенум астарай Давида».
Гьелем бири фегьмсодеи э себэхь-себэхькине пуьруьшсох эн кутэхье фильме «Чекмэле», кешире омори э режиссерово Константин Фамэво, ихдилот сохтие эз гъисмет кифлет жугьури эз мизрэхь Европа эз гъэд гирошде гъозишу.
Эз хьуьрметлуье гъуногъгьо огол зерет э межлуьс сервор кафедраре ЮНЕСКО э компаративный гешдеи гlилми руьхьбереи дин-гlэдотгьо, спецификей эн культурейшу не э гlэрей миллет гоф сохдеишу э Софуни Кавказ Гюльчохра Сеидова, серворлуье редактор эн улкие гозит «Ватан» Виктор Михайлов, сернуьш комиссией ЖэгIмиетлуье Палате РД э параменд гражданский жэгlмет, гъэлхэнд конституционни ихдиёри эн хэлгъ не кумеки э ОНК Гахриман Ашуров, верзуьшлуье экономист Республикей Догъисту, бэхшвегир ВПП «Еклуье Уруссиет», сенигlэткор эн ЖэгIмиетлуье Палате РД Сусанна Мирзаханова — Фейзиева, гьемиге тербиедорегор, не СМИ. Гьеммешу руйбирет э гофово эз жовоне бэхшвегирой межлуьс, гуфдурутки, гъисмет вилеет иму дери э дес ишу – межбур биреини эз эррузи вижирейшу, эз хотур хосдей вилеетшу не войге сохдей мисво. Межлуьс варастенки сервор эн Музей гъозие гlуьломие культуре не дин гуфди эз гъуногъгьо, эксперт эн ЖэгIмиетлуье Палате РД Диана Гасанова, согъбоши гуфдиреи эз жугьоби, эз хьозуьрлуье творчески программе э зир дес рэхьберисохе тербиедорегоргьо, хосди шолуми эз гьемме. У рузе гировундет межлуьс э дербентски музыкальни училище. Эри хундегоргьо ихдилот сохдет эз залумие гъозие бирие э «лагерьгьо муьрдеи», чэнгъэдер одомигьо гирошди эз бигlэдети, э гlэтош офдореи э лагерь муьрдеи. Э муниципальни татски томоше нум Манахимова Л.Я. бири бурмундеи эн тематически композицие «Жун эн Холокост» (режиссер-постановщик Дмитрий Рахмилов). Э биней музыкальни-литературни дестон дарафди гъэгъигъэтлуье гъозие э гъомбур дебирегорой концлагерь Биркенау миллет жугьури. Э е гъэдер мескен концларьой Освенцим (Аушвиц), комики гьелем дарафди лагерь Биркенау э залумирово кьушде омори диеш милльен одоми, омбардекишу бири жугьуро. Эзини гьемлуье верэгъой гъозие био э ёр муну не гъурбуй фашизмиш эз ёр ведешенде ниё биев эн биёвгьо эрх.
