Э Европейски университет э Санкт-Петербург – еки эз бердегор гуманитарни ВУЗгьо Уруссиет – хьозуьр бире вокурдеи Междисциплинарнигьо гешдегор гIилми проекте э хунде дануьсде догъи-жуьгьургьо могьлуьгъ э гъэдер мескен РФ.

Проект вокурденигьо бинелуье мескен «Петербургски иудаика», сер гуьрде мибу э 2024-2025-муьн хундение сал, эки эну миё бу э хуьшде вогосунде се гIилмие гьемкоркигьо, се аспирантгьо, гьем се магистрантгьо (торихчи, культурни антрополог ве социолог), комики мидану гировунде гешдеи гIилми – э суьфдеи нубот зимии – э жиге зигьисденигьо догъи жугьургьо э гъэд Софун Кавказе ве э Москов.

Бараси гешдеи гIилми миё бу жэгIмиет гуьрд сохде оморе, гIуьзетсохи жуьр-бе-жуьрелуь фикири ториххундеи, социологие ве культури догъи жугьургьо, гьемиге дофусзереи э гъэд гIилмлуье журналгьо э урусси ве английски зугуьн.

Сервори сохдени проекте гуьнжуьндегор бинелуье мескен «Петербургски иудаика» гIилмчи культури жугьургьо Мизрэхьи Европа ве Кавкази, литературовед ве тержуьмесох, духдир химическигьо гIилм Валерий Дымшиц.

ГIуьзет сохди, чуьки э РГУ нум Косыгина э Москов эз 2021-муьн сал корсохдени магистерски программ э хундеи дануьсдеи догъи-жуьгьургьо культуре ве зугьун жуьгьури. Гье у программе гьисди э суьфдеи нубот эри хьозуьр сохде тербиедорегор жугьури ве жэгIмиети корсох.

Петербургски проект нибу бире эри Москови «Хьовуети» гьем не вогогьруши ни бу, эзу товун гье у гьисди эри хьозуьр сохде академическигьо сенигIэткор-гIилмчи, менфигIэт коминики гьисди ториххундеи, этноданани ве жэгIметданани догъи-жуьгьургьо хэлгъ.

Гьемме кире мерэгълуьи биригьо э и программе гIэмел миёв руй бире эри вегуьрде буллуье хэбер э бинелуье мескен «Петербургски иудаика» Европейски университет э Санкт-Петербург.