Президент РФ Владимир Владимирович Путин нум до зугьунгьоре ве эдебиет эн хэлгъгьой Догъистуре очугъэ ве мэгIнолуье бэхш эн жэгIмиуруссиетлуье базургенди.

В.В.Путин тигъэте до э кем ведешендеи книггьоре э зугьунгьой эн хэлгъгьой Догъисту ве гъуллугъ дори сер гуьрде гъэрор сохде и четиннире. Сервор хьуькуьмет э товун эни гуфди э гуьрдлемей Меслэхьэт э товун гъувотдореи зугьун уруссире ве зугьунгьой эн хэлгъгьой эн Уруссиетлуье Федерациере.

«Тигъэте гереки доре э гъэдер книггьо, комигьоки дофус зере оморени э зугьунгьой эн хэлгъгьой Догъисту,- руй бисдо у эки веровундегор гъэрхундигьой эн сервор республикере Федор Щукин, - Имуре, хэйф, эри пушотеине дегьсалигьо той сохде омоге э у вэхдевоз, комиреки иму гуфдиреним вэхд совети, дофус зере оморени кемте»».

«Э инжо омбаре кори – ишмуре э унжо сайловгьои ве де четинигьои. Оммо и ижире гIэдотлуье коргьои, комигьоки дери э биней базургенди эн гьер хэлгъ,- гуфди сервор хьуькуьмет. – Ве ме хосденуьм эз ишму тигъэте дить э и ве герек бисдоге, руй бошит э хьуькуьм, чуьнки хьуькуьм дануь эз пулгьой хуьшде гъувот доре и тарафе».

Дестонгьой шогьир эн Расул Гамзатов дешенде омори э егъинлуье школьни программе э эдебиет эри 5-муьн,8-муьн ве 11-муьн классгьо. Э товун эни мэгIлуьм сохди министр соводи эн Уруссиетлуье Федерацие Сергей Кравцов.

Имбуруз ме оморем э республикей Догъисту. Нисе дануьсденуьм не гуфдире, ки дестонгьой эн Р.Гамзатов дешенде омори э программей эдебиет эн 5-муьн, 8-муьн ве эн 11-муьн классгьо»,- гуфди С.Кравцов э вэхд меслэхьэт э товун э кор венгесдеи хьуькуьметлуье политикере э сферей эн зугьун урусси ве зугьунгьой эн хэлгъгьой Уруссиет.