18 июль, сервор Догъисту Сергей Меликов гировунди гуьрдлеме э товун вокурдеи, э кор венгесдеи ве э гуьнжо овурдеи объектгьой соводире, вокурде оморенигьо э 2024-муьн сал э г1эрей э кор венгесдеи миллетлуье пректгьоре.
Сер гуьрденки гуьрдлемере, рэхьбер регион гуфди, ки Догъисту гене мидануь бире пушебер э товун вокурде оморигьо объектгьо. Э республике имисал диеш вокурде оморени 43 объектгьой соводи: 30 школегьо ве 13 бохчегьой г1эили. Омбаре объектгьо хьозуьр мибу те 1-муьн сентябрь, угьонигегьо э график гуьре.
Гьееки э уревоз сервор республике риз кеши – э г1эрей омбаре вокурденигьо идорегьо ве вокурдегоргьо дери угьош, ки «сохдени зобуние вокурдеи».
«Мере воисде эзугьо пуьрсире: э школегьой Догъисту г1эилгьошму ни хунуьт бегем?! Те 1-муьн сентябрь мунди 1,5 кемте. Ишмуре биё бу хубе гъэножогъи эки ёгъине гъэрхунди хуьшде. Иму биё сохим гьеммере, чуьнки плангьой иму э кор венгесде биев, ве чуьнки ченд гьозор г1эилгьой Догъисту бурав э тозе ве гъуьч сохде оморигьо школегьо ве богъчегьой г1эили»,- гуфди сервор республике.
Сергей Меликов эз вокурденигьо идорегьо гуфди,- не вегуьрдеи э сер хуьшде вегуьрде оморигьо ёгъине гъэрхундире мибу жозе кеширеи ве биразие коргьоревоз.
Сервор республике риз кеши,- те сер гуьрдеи хунденигьо сале объектгьо мие зуте хьозуьр сохде биев, э и хьисоб вечиреи школегьош. У гуфдири бичоре гъозие, кейки э пушой Руз данани школегьоре ве бохчегьой г1эилире хьозуьр сохденуьт тербиедорегоргьо, технически корсохгьо ве деде-бебегьо хундегоргьо. Э гофгьой энуревоз, гьемме коргьоре мие сохут вокурденигьо идорегьо.
С.Меликов гуфди, ки «Баварски дом» коргьоре э вэг1эдо не веровунди. Вокурденигьо идоре вегуьрди э сер хуьшде гъэрхунде – вокурде школере э кент Новосаситли эн Хасавюртовски район.
Э когьозгьо гуьре школе мие хьозуьр сохде биев-е гъэдер вэхд дореи – декабрь эни сал, оммо гьонине вэг1эдо проект э кор венгесде омори энжэгъ э 9%.
Фегьмсохи бирмунди – э песини дуь мегьгьо коргьо веровунде нисе оморе. Вокурденигьо идорере гьеле пор доре оморебу 248 млн монетгьо.
«Идоре, комиреки гьеле пор доре омори 250 млн монетгьо, э г1эрей хьэшд мегьгьо коргьоре сохди энжэгъ э 5%. Эжи и пулгьо?! Зигьисдегоргьой Новосаситли дениширет э и школегьо! Гьейсэг1эт унжо школегьо хуьрд хэсдеи, э комигьоки г1эилгьо гене мирав э се дегиши. Рэхьбергьой вокурденигьо идорегьо ме мидануьм гуфдире чуьн одомифурух»,- гуфди э гуьрдлеме Сергей Меликов.
Сервор республике гъуллугъ дори дир не кешире фегьм сохде кор идорере. Э артгьой фегьмсохи гуьре гъобул сохде миев гъэрорноме.
Э товун эну чуьтам гировунде оморени вокурдеи школегьо ве богъчегьой г1эили ихдилот сохди веровндегор гъэрхундигьой министр вокурдеире, архитектурере ве ЖКХ Бахтияр Уллаев. Э гофгьой эну гуьре, денишире э технически хьозуьр биреи, объектгьо бэхш сохде омори э зерде енебуге гъирмизине мескен э хьисоб вегуьрденки жирей коргьоре. Курабирегоргьо фегьм сохдет риз хьозуьрлуьги гьер школере ве богъчей г1эилире.
Песде э гуьрдлеме нушу доребируьт рэхьбергьой профильни идорегьо. Э эхир доре оморебу протокольни гъуллгъгьо.
Э кент Новосаситли вокурденигьо идоре э вэхг1эдо ю школере не вокурди.
Гъусот э товун идоре «Баварски хуне», комики вегуьрди э сер хуьшде ёгъине гъэрхундире э товун вокурдеи соводие объекте.
