ГьейсэгIэт, кейки э омборе регионгьо гIуьлом ведини желдилуьи жугьур-нехогьи, гереки селигъэлуь товуш доре лап дуьруьждлуье дебердеи нушудорегоргьо егьудии жэгIмиет э жире-бе-жирее гъосуьт экономике, гIилми, культури ве жэгIмиет зиндегуние. Имбуруз ихдилот иму мибу э товун Михаиле Адиньяеве, кандидати хоригъуллугъсохи гIилми, профессори, верзуьшлуье механизатори Республике Догъисту, э кор венгесдегор жерге пушолуье механизатори кор эри хозяйствой дигьбони.
Михаил хьэсуьл омори 2-муьн январь 1947-муьн сал э Дербенд э омборе гIэили кифлет. Бебе эну, Данай Ютамович бу бэхшвегир ВОВ, кор сохди сервори бухгалтер э колхоз. Гьееки э зен хуьшдеревоз Диной Имануиловой угьо верзуьшлуь дошде ведировунди хьэшд гIэилгьо, пенж кук ве се духдер. Деде-бебе мэхьшево сохди, эри чуьки гIэилгьой угьо дануь вегуьрде хубе данани ве сохде гъуллугъкор. Ве гьэгъигъэтиш гьемме вегуьрди буьлуьнде данани, оммо дуь, кукгьо Имануил (1941-2018) ве Михаил, бисдо мэгIлуьмлуье гIилмчи э хоригъуллугъсохие жире. Гьердуь бесди зиндегуни хуьшдере э хоригъуллугъсохи буьлуьнде-данани: Имануил — э Владикавказии, Михаил – э Махачкалеи.
Эз гIэили Михаил нушу дори дананисевен эки технике, уре хьэз омори э дорун кор расире гIэили мошингьо, трактергьо ве паровозлегьо. Э рузгьо школеи вэхд форигъэтии у хосди эз бебе вегуьрде уре э хуьшдеревоз э кор э колхоз, эри чуьки унжо те суьрои гузетсохде э сохде кор хоригъуллугътехнике. Хьэйронлуье денишири у чуьтам тракторгьо кутон зерени хори енебуге чуьтам комбайнкорсох бегьем дурундеи суьмбуьл, ве тэхьул гье бирден вечире оморе э мескен дошдеи тэхуьле, шелеверие мошингьо бегьем пурлуь бире ве берде мэхьсуьл э ток. Э гьер омореи э колхоз, эн у зевер бире войге эзвер хунде дануьсде э механизатори.
Э 1965-муьн сал Михаил э суьрхине медалевоз э школе №11 хундеире варасди ве дарафди э инженери факультет Догъи хоригъуллугъсохие институт э шогьнишон Софунлуь Осетии Орджоникидзе (гьеймогьой Догъи хьуькуьмлуье аграрии университет). Тербиедорегоргьо хьисоб сохди уре еки эз хубе Худо доре хосиетлуье студентгьо, эз суьфтеине курс у бири лап хубе хундегор. Э 1970-муьн сал эри эну межлуьслуье дори гъирмизине диплом. Эзуновлейге Михаил е сал гъуллугъ сохди э гъушун.
Э 1974-1977-муьн салгьо тербиевегирди э аспирантуре э ГосНИИ гъуьчсохи ве э кор венгесдеи мошине-трактори бохче э Москов, эже векили сохди диссертацие «Гешдеи гIилми барасилуьи жире техникеи гъуллугъсохи мошине-трактори бохче» э боржбери гъэдер кандидате техникеи гIилми. Уре гье бирден дори кор э шогьнишон, оммо у нэгI сохди: уре лап воисди рафде э хуне, э гъовумлуье Дербенд, эжеки уре денишири гъовум-гъэрдеш ве хьэрмэхьгьо.
Э 1977-муьн сал Михаил Данаевич бири гIилмлуье корсох Догъистонии НИИСХ. Э жиге, эже у кор сохди, бири э кор венгесде ве дешенди е ченд механикие еклуьги.
Суьфдеи эз угьо бири вокурде оморе экуьндигьо эз Махачкале – гье у шири еклуьги эри 800 дуьширение гов, гьеймогьоине механикие оборудовани. Гье у жиге кор гьемиге бири дешенде э корхоне гьемме пушолуье тегьер э кор венгесдеи хоригъуллугъсохиетехнике э Ипатовски тегьер ве э екиге регионгьо Догъисту, чуь э 35% зевер сохди молведешендеи жофоре. Гировунде оморигьо НИИ гешдеи гIилми гъиребир сохде хори э догъи ве пушодогъи жейлее чапарлуье мескен республике дори гьисдсохи барасилуьи. Гировунде бири омборе жире кор э товун ведекуьрдеи эз гурунде сулогъи хори муьнуьке ве дегишбиреи угьоре э г1эмеллуье эри битмишидори. Ижире тегьер гIэмел миёв бире э кор венгесде экуьнди гъирогъ жейлее чапарлуье мескен Каспии дерьёгь, эже сергуьрди синогъи кошдеи онгурбогъгьо. Бири зиёдгуьзелие барасигьо гIилмлуье коре, оммо угьоре, э хьэйфкеши, поюнди э сереботи вес нисе сохдеи овгъотгьо.
Э гъэд пенж сал корисохи М.Адиньяеве э НИИСХ Догъисту бири э гуьнжо овурде ве вокурде 10 хоригъуллугъсохие мошингьо ве технике, э комигьоки вегуьрде омори ю хуьшдени нуьвуьсдегор шогьодидореи. Эз гьемме омборте тозеи э товун гъиребир сохде онгурбогъгьо бири дешенде э совхоз нум Алиеве.
Э 1988-1999-муьн сал Михаил Данаевич бири декан факультет механизаци хозяйствой дигьбони, оммо э 1999-муьн сал бири норе э жиге суьфдеи проректор э тербиедоре кор Догъистонии хоригъуллугъсохие институт. Э 1995-муьн сал эри эну бири доре нум профессор. Гье э у вэгIэдо хьуькуьм Догъисту, буьлуьнд гъиметдори э верзуьши эну, дори эри эну нум «Верзуьшлуье механизатор хозяйствой дигьбони республике».
«Эз гьемме вэхд корисохи ме,- э ёр овурде Михаил Адиньяев,- факультет механизаци иму ведешенди зиёдте гьозор сенигIэткор, комигьоки барасилуь жофо кешири э хозяйствогьо республике Догъисту ве э екиге жигегьо. Омборте эз варасдигьо факультет механизаци дануьсди диеш тербие вегуьрде э аспирантуре. Э ме бири муьхькем сохде дуь аспирантгьо э диссертаци э гъосуьт механизаци хозяйствой дигьбон. Э салгьо тозеден вокурдеи экологии ве экономикии жире э лой механизаци хозяйствой дигьбони лап дегиш бири, ве институт иму э кор венгесде диеш асантие технике эри фермери кор.
Э апрель 2000-муьн сал кифлет Адиньяевигьо рафти эз вилеет. Э Исроил Михаил Данаевич э дуразовуне гировундеи 7 сал кор сохди инженерии э буьлуьндтехнологие корхоне, ведешенденигьо электрони приборгьо эри медицини идорегьо. Э гьонине вэхд у келе мерди, зигьисдени э кифлетегьо э Ашкелон. Зен эну Лия – тербиедорегор химие. Келе текебури угьоре – дуь кук, нуьгь неве ве се нишре. Келеи кук Олег – духдир дендуи, зен эну Ларисе – тербиедорегор математике э келете классгьо. Угьоре пенж гIэили. Неве Лия – гьемигеш духдир-дендуи, хундеире варасде омори э Кишиневие университет, кор сохде гъосуьт эстетии духдири, у гьисди деде се гIэили. Неве Даниэль бэгъдовой гъуллугъсохи э ЦАХАЛе тербиевегуьрде э сеимуьн курсе факультете математике ве програмировани Ариэльи университет. Хэгьерлей эну Хане, гьемигеш бэгъдовой лешгерии гъуллугъсохи, тербиевегуьрде э дуьимуьн курс Жугьури университет э Иерусалим э сенигIэти «фармацевтики». Дуь чуьклеи невегьо, Ноа ве Ариэль,- гьисди хундегоргьо школе.
Дуьимуьн кук Адиньяевигьо, Рафаэль, кор сохде духдири (э сенигIэти ортопед-травмотологи). Зен эну Нателле – фармацевт. Угьоре чор гIэили: келеи кук Иосиф гъуллугъи сохди э ЦАХАЛе, ве э гьонине вэхд гьееки э бироревоз Йонатаном хунде дануьсде кор духдири э шегьер Дебрецен э Венгрие. Бироргьой угьо, Михаэль ве Итамар,- хундегоргьо школе.
Э 2010-муьн сал Михаил Данаевич гъобул сохди бэхшвегири э гъэд Гьеммеуруссиетие форум э товун пуьрсуьшгьо параменди хозяйствой дигьбони э бинелуье мескен Догъистони хьуькуьмлуье хоригъуллугъсохие университети, э коминики у бирмунушини э докладевоз. Эз экуьнди чоримуьн девре зиндегуни э Исроил профессор Адиньяев не поюнде шинохе э Догъисту. Кейки э 2011-муьн сал сернуьш хьуькуьм Догъисту ве ректор Догъистони хоригъуллугъие университет бири э Исроил, у шинох сохди угьоре э жирелуье корбердеи хозяйствой дигьбони э жугьури вилеет. Бири э пушо норе жерге кор э товун дешендеи исроили синогъи кори э Догъисту, оммо, э сереботи гъэдерлуье терг монети кор не вегуьрди дуразкеши хуьшдере.
Гьисдигьо гIошире гIилмлуье синогъи э гъосуьт механизаци хозяйствой дигьбони, Михаил Адиньяев фикирнушудии хуьшдени хэёл э хоригъуллугъи кор э Исроил: «Эри ме войге бу гIуьзет сохде, чуьки хоригъуллугъиетехнике э Исроил э сер гоф поисдеи сеч не сохде дуь эз еки эз у, чуь э кор венгесде э Уруссиет. Оммо гье генешки инжо гьисди зиёдте гьеймогьоине ве хубтее меселенигьо, гьисдигьо ёгIни омборе овгъотлуьи. Гьемиге тум шендение мейдонгьо э вилеет чуьклеи, унегуьре ве гъиребир сохде хори, вечиреи мэхьсуьл ве угьонигейге жире хоригъуллугъкор зиёд хуби. Э Уруссиет гьер кор хоригъуллугъи корхонере бири эн хуьшдени бохче мошингьо ве технике, чуьни нисди э Исроил, ме фикир сохде, чуьки э у нисди гереклуьи. Хозяйствой дигьбони э Исроил э герде вегуьрде э гьемме гIуьлом тозеивенгене кор (гIовдореи, вегуьрде дуь-се мэхьсуьлгьо э сал, шири молгъэредори,хозяйствой шитилхонеи, вегуьрдеи ранге-бе-рангие пембе, лап омборе мэхьсуьл онгуре ве молведешендеи гьеммегIуьломие мэгIлуьмлуье жире шороб ве диеш). Ве у, гьелбетте келе хубе кори э параменди хозяйствой дигьбони Исроил, корсохи коминики войгеи вегуьрде э омборгьо вилеетгьо гIуьломе.
