28-муьн январь э межлуьсе жугьургьой-догъи бинелуье мескен ОГЕ э улкей москови эн Сокольники горошди литературни хундеи э жугьури, белед бирение эри тербиедорегор, шогьир, драматург, тержуьмесох Борис Гаврилов.
Бердегор Людмила Теймурова-Юсуфова, э зугьун жугьури хош омори сохд бэхшвегирой хундеире, ихдилот сохди нуьвуьсдеи гъозиегьой зиндегуни эн Борис Гаврилов, хунди дестонуре «Мескен шогьир» не «Мегlни духдери».
Кук эн шогьир, Владимир Борисович Гаврилович, комики зигьисдени э Москов дофус зери китоб бебере «Дестон эри гlэилгьо». И дуьзугьуне дофуз зереи, э бигlий жовоне шекуьлкеш Марк Абрамовичево, гьелем э тержуьмесохирево э зугьун уруси, сохде оморио Геннадий Рахмилов. И китоб гьовои бэхш мибу э гъэд жугьуро, эже горошдеге нубогьой жугьури эри гlэилгьо.
Э Борис Гаврилов гьисди десхэтией жофое, комики гьелем дофус зере не омори: пьеса «Пери-ханум» (э дуь бэхш), тержуьме сохди оморение э жугьури, овосунегьо «Хогьине-бироргьо», поэме «Гайдар не Марал» не екигьо.
Дестонгьой Борис Гаврилов «Э тур кес», «Зимисду», «Себэхь», «Хиникини», «Гэдэгэ», «Меги дира» хундет тербиедорегоргьо корсохой ОГЕ Нина Азаряева, Елена Мардахаева, Марал Давыдова.
Нуьвуьсдегор Геннадий Рахмилов пушой хунде тержуьме сохди эз жугьури э уруси дестон Борис Гавриловиче «Суфте когоз» не «Дербенд». У хунди уре э дуь зугьун. Геннадий Исаевич тержуьме сохди гьемме дестоной гlэилире э жугьури шигьире Борис Гаврилове, угьо нуьвуьсдет э тозе китоб «Дестон эри г1эилгьо».
Лауреат премией фонд энд СТМЭГИ нуминей Вайнштейн, нуистегор жугьури-урусие словаря Мардахай Нафталиев кешири омбаре жофо кешири Борис Гаврилов эри дошде не хунде зугьун жугьурире, гьелем хунд дестон «Шенде».
Пирелешгерчи системей дуланжэгъи Азербайджан, бэхшвегир Совет келетегьо Данил Изугуев хунди дестоне «Э бэхдевери».
Рэхьбер эн магистерски программ РГУ нум. Косыгина Евгения Назарова ихдилот сохди эз верзуьшие омбаре жофой Борис Гаврилов эри филологгьо, хундение зугьуне не литературе жугьурире, эз вожиби дофус зереи гьемме, чуь нувуьсде омориге, эз хьэзури эри магистерский диссертацией творчестве Борис Гаврилов, э сер эн у кор сохтение Елизавета Гаврилова. Евгения Моисеева хунди дестоне «Гъозией Гевгlид гъуншиме».
Хундегоргьой культури жугьурой догъи студенткой магистерски программ РГУ нум. Косыгина Ирина Зарбаилова, Елизавета Гаврилова, Лея Гаврилова, Бике Абасова хундет дестонгьо «Поиз», «Зу вогошд», «Меги дира», «Духдер Дербенди», «Васал» не статьяре «Учиталь», эри 100-сали Б.Гаврилов, комики нуьвуьсдени «Кавкази гозит» э Исроили э 2008-муьн сал.
Исполнительни директор фонд СТМЭГИ Данил Данилов хунди дестон «Ферзенд», «Тевер ве бондур» не «Ники» – э тержуьмерово э зугьун уруси Гемриил Рахмилов. Данил Ильич ихдилот сохди эз песдеине кор эн десдей фонд СТМЭГИ не ОГЕ эри дошде, хунде не лов сохде зугьуне не литературей жугьурире, эз межлуьсгьо биренио э февраль не март 2024-муьн сал.
Екигьо литературный хунденигьо биренини 25-муьн февраль эри творчествой нуьвуьсдегор эз Гъирмизине Гъэсэбэ Рашбиля Шамаева.
21-муьн февраль, эри Г1эрейхэлгъие руз зугуьн дедеи гирошди гlэдоте хуно конкурс эн жовоне хундегоргьо э жугьури. Гьер бэхшвегир био хуну ду дестон: еки эн Борис Гаврилов, екиге – эн Рашбиль Шамаев. Гlэилгьоре эде гузет сохде бэхш не хубе домогъ!
Омбардеки жофой Борис Гаврилов гьисди э библиотекэй фонд СТМЭГИ, угьо э нумировозут, мибу хунде э сайт STMEGI.com э «Библиотека».
Э общинний бинелуье мескен жугьургьой догъи э Сокольники ОГЕ бири г1эдет э мегьи е гиле гировунде литературни хундеи э жугьури.
Зугьунлуье рэхьберой жугьури, нуьвуьсдегоргьо не тербиедорегоргьо, гlэилгьо не жогьилгьо нубо гирошденигьо эри зугьуне вомухде, лингвистгьо не литературоведгьо, хундегорой РГУ нум. Косыгина эдет хьозур бире эри и хунде, вомухде-вомухде нуьвуьстегоргьоре жугьургьой догъи.
Борис Гаврилов эз дедей омори э 1908-муьн сал Гъирмизине Гъэсэбэ. Э 1914-муьн сал кифлет гирошди э Дербент. Эз 19-да сал Борис Гаврилов нубой жугьури дори э ишколе э дигъ Маджалис улкей Кайтогъи. Э г1ъарэрово э салой дог1ово, кей биёвгьо шогьир бу э лешгер, буьтун зиндегуни гировунди эри дошде, вомухде не лов сохде зугьун жугьурире нэ литкратурере.
Э 1938-1941-муьн сало э Догъистуе хьуькуьметие дофуз сохдеи (Даггиз) ведромори хьэрфноме, китоб эри хунде, хрестоматией литературе, китобой грамматика не вердуьши дуз нуьвуьсдеи, методически тапшуьрмиши (гьеммеки 16 бэхши), хьозур сохдие Борис Гаврилов.
Эз тербиедорегори кор песде Борис Гаврилов гъэтро кешири эри шогьирие не драматургие творчестве э зугьун дедеи. Жофогьою дарафде омори э литературни китобгьо не альманахгьо.
Э 1979-мун сал дофус зере омори китобой дестони «МэгIнигьой васали».
Эз уьлуьм Борис Гаврилов песде э жофогьой гъовум-гъэрдешово не дофус зере омори: «Хьэрфноме» (1990), «Десхэтлуье дефтер» (1991), словарь жугьури, китобой дестони «Ники» (1993), «Орфографически Гофноме зугьун жугьури» (1995).
