Альберт Рабаев – эз конкурс «Астарай Жугьургьо», эз гьовой музыкеи кифлет хуьшде не бинелуье мескен эн искусства.
— Альберт, э песо зар-зарие бирмундеиту бири э конкурс «Астарай Жугьургьо». Чуь гьис бу э мэхьэл хьэзулугъи нэ чуь нушу дореини эз шиновусдеи?
— Дуьзире гуюм, ме нисе дануьсденуьм чуь гьис мере эде гуьзет сохдеге. Оммо у руз, иму – гьемме бэхшвегиро – вохурде оморенки э Куьгьне Яффо э кеширеи клип, ме дуьлхоши вегуьрдем эз тониши не элогъи э гlэилгьорево. Е дэгъдэгъэ небу гьис иму мидевгъиним. Иму винирейм екире нушудорегор мэгIрифелуье жогьилей жугьури, комики эде хьисоб сохде гъэрдэ хуно эрзо нуьвуьсдеи хуьшкере не бирмунде хосдеире неки э современный музыкальный культуре, не сэхьиблуьере. Конкурс – себеби эр ину.
Мереш эз гьемме бэхшвегиргьой конкурс хош омори. Гьемме ухшеши зеренит, оммо гье евэхди жуьр-бе-жуьреит.
— Эри, ме воисдембруьм гуюм, еки репери, униге оперный мэгlнихун, киниге эдембу хуб хуьнде мизрэхьие сейёг. Оммо гьерки э хуьшде гуьро мерэгълуьни, ме нисе данусдембирум э жугьури мибу хунде э жуьр-бе-жуьрелуье сейёг. Эхьсобово мибу, хуьшденуьш нушу дореи. Ихдилот сохденки иму хьэсуьл омори дуь эекиревозе творческий метлебгьо. Иму имбурузине руз незник бирейм. И лап хуби!
— Вожиблуье игърол эн конкурс бу хунде е мэгIни э зугьун жугьури. Четин бу гьово гуьрде озуни мэгIни?
— Эвел эри, асант небу. Гьечки у миесд неки хош оморе, не бире е мэгIники дану бирмунде чу хубе сес вериге мэгlнихуне. Иму э деде-беберево гуш дошдейм омбаре мэгIнигьо, эхирки поисдим э сэр эни мэгIни «Бебегьой ме». И соф э дуьлме нуьшди.
— Ме лап шорум, Альберт, конкурс гьишди эри туь хубе нушу дореи, гьеле туре бири тозе гъовум-гъэрдеш эз гъэд жугьургьо, диеттеш дуьлшорини.
Имогьой ихдилот сох, эз чу вэхдево туь муьхшуьл бире э мэгIни хунде?
— Сер гируьм эз у ким э келе бирейм э мугъумлуье кифлет. Гьердуь бебе-деде варасди мугъумлуье хундеире – бебейме э Махачкала, дедейме э Пятигорск. Э и гуьре э хуне гьеммише сес мэгIни шиновусдени. Гьечи бисдоки чуклеи хегьер, комики эз гlэилирово бу эн раче сес, хунди эз мэ пушо, и бири меселен эри ме. Эри эну ме сер гирдем хунде э 16-салеи, э школе. Песде бу дэгъдэгъэй сессуьзи э хундеи нэк ор гуьре, э 2022 мэ бирем бэхшвегир э шоу «Сес Германия» э мэгIнирово «It’s A Man’s, Man’s, Man’s World».
— Эри, мэ винирем э интернет е бирмундеи туре. Нушу дореини, эз суьфдеи сесово. Омо классический мэгIни гуш дошдени ту?
— Екем, омо евош-евош эдем мерэгълуье бире – и пушогьо рафдем э «Евгений Онегин». Гереки гуфдире, э Берлин омбаре концертни жигегьои, эже хунде оморени классика, эз ён зере гирошде нибу.
— Ки э эстрада бу эри туь хубе меселен?
— Григорий Лепс – сейёгу, сес расундею. Мэ хьэрекет сохденум не демунум концертгьоюрэ э Берлин.
— Гуй, гьисди туьре творческий метлеб э оморени сало?
— Гьейсэгlэт ме эдем вокурде бинелуье мескен искусстве, эже мигирору жуьр-бе-жуьре межлуьсгьо, концертгьо, бирмундей моде, вохурдеи творческий одомигьоре. Унжо биренини студие, эже мибу вомухде овозие не карасдие искусстве, нуьвуьсде мэгIние хуьшдере, комики песде иму лов мисохим э социальный сеть. МэгIни хундэ мэре войсдени буьтун зиндегуниме.
— Лап хубе метлебгьои! Эз дули жуни эдем хосде гуьлишанлуь бире не метлебгьо веровундеи бире. Хуьшдени туре – гьеммише творчески вероморе не тозе барасие э международный конкурсгьо!
Альберт Рабаев эз дедей бири э 1993-мун сал э Берлин. Хундегор Берлинский университет экономикей, технологией не культуре. Бэхшвегир шоу «Сес Германия» (2022). Лауреат международный конкурс эстрадни мэгIни хундеи «Астарай Жугьургьо» (Исроил, 2023).
