Э пушой мигIид Суккот, комики имисал сер гуьрде омори шев эн 16-муьн октябрь, Келе раби Уруссиет Берл Лазар руй бири эки дин-догIотие жэгIмиет жугьургьо:  

“Хьуьрметлуье хьовиргьо!

Сер гуьрде омори ориней мигIид Суккот. Э тиро и рузгьо гуфдире оморени “зман симхатену”, “вэгIэдой шориму”. И  шори э гьеммей вэгIэдой Суккот — и несиети. Гье ужире, чуьн чор жирей мэхьсуьлгьо, чуьн дебиреи э суко. Эри, иму э де мигIидг гуфдире, оммо э рузгьой Суккот — эзу товун ки гьечуь эзиму гуфдири Офирегор.

Бежид эз одомигьо шиновусденим, ки угьоре воисдени шор бире, оммо шоре зиндегуни нисди, омбаре гурундигьо ве четинигьои. Бирени гьечуьш, одоми себэхмунде вэхуьшдени  э шориревоз оммо оморени зобуне хэбер ве гьовой одоми пуч бире! НесигIэт эзиму талаб сохдени шор бире гьеммей эни хьофд рузгьо. Чуьтам гереки ире сохде?

Э суьфдеи нубот  шорире ве софоре гъэриш сохде герек нисди. Эри, кейки софо оморени эз гьерчуь бисдо, иму шор биреним.

Софоре иму вегуьрденим эз комининиге егъинлуье себеб, енебуге эз буруние гъозиегьо. Эзу товун софо — гьелелуьгее моли. Шори — и доруние овхьолет одомини. У, ки Офирегор мере дори зиндегуни — и шорини! У, ки Офирегор мере дори тапшуьрмишие везифе, ки мере гьисди везифе э зиндегуни — и шори э дуь гиле омбартеи. У, ки ме веровунденуьм несиетгьой Офирегоре — уш келе шорини! Чуьтам гуфдирембируьт хьохомгьой иму — “симха порецет гедер”, “шори эз гурундигьо гирошдени”. Енебуге — шорире софо нисе овурде, шори минкин дорени софо вегуьрде. Шори  — суьфдеи себебе, гьэгъигъэт и овхьолет  одоми имуре минкин дорени сохде хубе коргьо, хубте сохде хуьшдере ве гIуьломе.

Келе шори, хуте сохдени Рамбам, и фикир сохде неки э товун сирои биреи хуьшде, оммо гереки фикир сохде э товун сирои сохдеи угьонигегьоре. И шори э гьеммей зиндегуни имуни, эзу товун ки иму э кор венгесденим минкингьой одомире.

Егъин ижире шори экиму оморени э рузгьой Суккот. Иму нуьшденим э суко, мидануь бире э зобуне гьовош — ве шор биреним, ки э сер иму бун вери — и бетонни бун нисди, и асмуни, эже Офирегори. Э дуь гиле омбарте шор биреним эзу товун ки иму варасиреним, ки Офирегор э иму гьеммише кумеки мисоху! Гье гьечуь гIэмел миев гуфдире э товун несиетгьой эн чор жирегьой мэхьсуьлгьо. И нишон еклуьги эн хэлгъ имуни. Кейки иму гьеекиним, кейки гьис сохденим душ хьовире —  и гъувот дорени, и шори дорени, гьис дорени, ки гьемме хуб мибу!

Ве Офирегор миду, чуьнки шори иму бу себеб куьнд биреи эки говлеи, кейки миев Мошиях, ве шори имуре серхъэд нибу”.

Э хьуьрметевоз, Пресс-гъуулугъи эн Келе раби Уруссиет.