Дуьшоббот, Сернуьш Хьуькуьм эн Республикей Догъисту А.Абдулмуслимов э Хуней Дусди вохурди э Хоким Бухарски областевоз эн Республикей Узбекистан э Б.Зариповевоз.

Тарафгьо пуьруьш сохдебируьт параменд сохдеи ве муьхькем сохдеи дуьтрафие олгъигьоре э алверие-экономически, г1илмие-технически ве социальни-базургенде сферегьо.

Шолум гуфдиренки эз гъуногъгь, А.Абдулмуслимов гуфди, ки гирошдигьо Меслэхьэт э гуьнжо овурде омори лап хуб. Гьемчуьн у гуфди согьбоши эри жирелуье тигьэт, доре оморигьо э Догъисту.

Гоф гуфдиренки э товун зевер биреи мол фурухдеи э г1эрей республике, А.Абдулмуслимов гуфди, ки мол фурухдеи э г1эрей Узбекистан ве Догъисту зевер бири эз 50% омбарте.

Премьр регион гьемчуьн гуфди, ки Бухарски область сохди омбаре кор эри параменд сохде алверие, экономически, базургенди, социальни ве жэг1миетлуье гъэножогъигьо. У имидлуь бисдо э муьхькемлуье дусди э г1эрей хэлгъгьо ве республикегьо бэгъдовой тог1ин сохде оморигьо бирорие гъэножогъигьо э г1эрей Дербент ве Бухаре.

Хоким Бухарски область Б.Зарипов гуфди согьбоши эри герме гъобул сохдеи десдей Узбкистане э г1эрей пуруьшсохи параменд сохдеи дуьтарафие еклуье корисохире. Э гофгьой эну гуьре, узбекски-урусситие еклуье корисохире э имбурузине руз омбаре плангьои, риз еклуе корисохи гьеммише зевер бирени. Гьечуь, э тозе риз ведиремори неки алверие-экономически гъэножогъимгьо, оммо гьемчуьн базургенде-дин-дог1отие ологъигъгьош.

«Оморенки э Дербенд гуйге иму э Бухаре оморейм. Фикир сохденуьм, иму дуз сохдейм, ки игърол бесдейм э товун тог1ин сохдеи бирорие ологъигьоре э г1эрей шегьергьо Бухаре ве Дербенд.

Лап хубе шегьери, раче торихлуье объектгьои. Ме фикир сохденуьм, ки гьер одоми Узбекистане ве гьер зигьисдегор Бухарере воисдени винире и шегьере е гиле семей»,- ихдилот сохди Х.Запиров.

Э г1эрей дуьтарафлуье еклуье корисохи Догъисту ве Бухаре тог1ин мисохут плангьой коргьоре. Сернуьш Хьуькуьм А.Абдулмуслимов мэг1луьм сохди, ки проект план хьозуьр сохде омори ве бирмунде миев э десдей Узбекистан.

Рэхьбергьой регион пуьруьш сохдет минкингьой вокурдеи дуьруьжде алверсохие жигере э мескен Догъисту. Э товун минкингьой вокурдеи хуней алверисохире «Узбекистан» э мескен регион ихдилот сохди А.Абдумуслимов.

Э план параменд сохдеи пембеверовундеире ве пешмие корхонере векурдеи ижире жигере восдогоргьоре мидануьт восдоре хубе моле э ужуьзе гъимет.

Сервор Бухарски область Б.Зарипов, э нубот хуьшде, гъувот дори фикире. Ве у гуфди, ки Узбекистан мерэгълуьни э вокурдеи ижире объекте. Гьемчуьн у гуфди, ки гереки фегьм сохде минкин э гуьнжо овурдеи объекте, комиреки нум доре миев «Made in Bukhara».

А.Абдулмуслимов риз кеши, ки вожиблуье вэхш экономикей республике – агропромшленни комплекси. Эри параменд сохдеи республикере лап вожиблуьни дуне кошде веровундеи, богъдори, онгур кошде веровундеи ве агрологистике.

Б.Зарипов гуфди, ки узбекски тараф мерэгълуьни э пешм ведешенде оморенигьо э Догъисту.

Гьемчуьн э вохурдеи Догъистонигьо гуфдиребируьт, ки угьо мерэгълуьнуьт э дуьтарафие еклуье корисохи э тараф гусбенддошдеи, э дошдеи ве хубте сохдеи дошде веровундеи гусбендгьоре э герме овхьолет, э кошде веровундеи пембере ве мерэгълуь сохдеи пулдешендегоргьоре эри э гуьнжо овурде э мескен Догъиситу корхоней хуьшдере эже пешм тозеден э кор венгесде миев, гьемчуьн эз пешн сохде миев молгьо ве диеш.

Гьемчуьн гуфдире оморебу, ки эгенер молведешендегоргьой Догъисту мерэгълуь бисдоруьтге э е сал угьо мидануьт э де милеетиге фурухде 5-6 гьозор тонн гушд гусбенди.

Э план еклуье корисохи вожиблуье жиге доре омори сферей соводире. Зеверие хунденигьо идорегьой Догъистуре гьисди игъролномегьо э товун еклуье корисохи э зеверие идорегьой Узбекистаневоз, э и хьисоб э Бухарски хьуькуьметлуье медицински зеверие идореревоз. Э имбурузине руз э соводие идорегьой Догъисту хунденуьт экуьнди 80 студентгьо эз Узбекистан, э кор венгесде оморени еклуье программегьо.

Э план гуьре денишире оморени, ки урусситие-узбекски корхоне вокурде миев э август-сентябрь 2024-муьн сал.

«Гьонине вэг1эдо бегьем сохде оморени коргьой э гуьнжо овурдеи уруссиетие-узбекски корхонере «Асадбек Глас Файбер» эже ведешенде миев стекловолокно.

Тараф Догъиту – ООО «Каспийски завуд стекловолокно» э проект дешенди экуьнди 50 млн монетгьо, узбекгьо – 47 млн монетгьо. И суьфдеи проект еклуье корисохи имуни»- гуфди А.Абдулмуслимов.

Узбекски жэг1миет лап хуб кор сохдени э республикански ве муниципальни органгьой хьуькумевоз, гировунде оморени миг1идлуье ве базургенде мероприятиегьо фуьрсоре оморигьо эри дошдеи гъэдотгьой узбекгьоре, зигьисденуьтгьо э рспублике.

Э нубот хуьшде, э Узбекистан кор сохдени догъистондуье жэг1миет э комики дери эз 500 одомигьо омбарте. Догъистонлуье жэг1миет кор сохдени гьееки э органгьой хьуькуьм Узбекистаневоз»,- ихдилот сохди премьер регион.

Десдей Бухарски область бирмундет проект эн Каспийски гъирогьдерьегьлуье жигере.

А.Абдулмуслимов э пушой бизнес-жэг1миет эн Бухарски республике нори э гъирогъ дерьегь вокурде комплекс хуьшдере ве уре нум доре «Бухара».

Догъисту хьозуьри э гуьнжо овурде очугъэ ве хубе овхьолете эри кор узбекски бизнес, комики хьозуьруьт э гуьнжо овурде еклуье корхонегьоре э мескен регион иму ве кор сохдеире э у жигегьо эже доре оморени налогови льготгьо.

Гьемчуьн тарафгьо гуфдиребируьт э товун минкингьой еклуье корисохи э г1эрей сафарлуье идорегьо. Гьечуь, эз шегьер Махачкале э шегьергьо Ташкент, Бухара, Ургенча ве Намангана рафденуьт омбаре самолетгьо, чуь кумеки мисохуьт параменд сохде сафарире.

Когьозгьоре э товун еклуье корисохи э сферей сафари гъул кеширет Догъисту ве Бухарски область. Тарафгьо кумеки мисохут тог1ин сохде ологъгигьоре э г1эрей субъектгьой эн корхонегьой сафари эн регионгьо ве дуь гьееки ихдилот мисохут э товун сафари.

Э эхир вохурдеи А.Абдулмуслимов эз десдей Бухарски область гуфди согьбоши эри доре оморигьо тигъэт ве огол зери угьоре бэхш вегуьрде э кор форум «Экономикей Догъисту: минкингьо ве тарафгьой параменди». Гьемчуьн бэхш вегуьрде э мероприятие «Руз г1эрейхэлгъие бизнес э Республикей Догъисту», комики э план гуьре гировунде миев имисал и сентябрь.

Г1эдотлуь э эхир вохурдеи доре оморебу бэхшгьо, А.Абдулмуслимов Б.Зарипове ве десдей энугьоре доребу епуьнжигьо ве попохгьо. Гъуногъгьо сирот зерет э епуьгжигьо ве попхгьоревоз.

Гереки гуфдире, ки денишире оморени э г1эрей омореи э нушудорегоргьой бизнес-жэг1миетевоз эн дуь респебликегьоревоз гировунде миев вохурдеигьо. Э вохурдеигьо пуьруьш сохде миев пуьрсуьшгьой мерэгълуь сохдеи пулдешендеигьоре, промышленни ве алверие еклуье корисохире.