Сернуьш Хьуькуьм РД Абдулмуслим Абдулмуслимов 2-муьн март гъобул сохди бэхшвегири э межлуьслуье межлуьс дешендеи онгурдор э дигь Митаги-Казмаляр Дербнди дигьбон.
Дуьруьжде инвестпроект э товун дешендеи онгурдор э дугъле гIовдореи э хории муьлк мейдоневоз омборте 500 га веровундеи ООО «Тегьенг каспийске». ВэгIэдо веровундеи: 2023 – 2026-муьн салгьо. Э жигей хьуькуьм кумекии зиреклуье одоми зуте бири э ихдиёри доре хории муьлк э киро алверсуьз. Доруние гъэдер пулрасуни э проект гуьнжуьнде экуьнди 300 млн. монет.
Муьлк – мескен гьевел биригьо совхозе, те и пушогьо вэхд э гье у хори бу энжэгъ ологъо ве кулелугъгьо.
Дешенде онгурдор миё бу э жиге овурде кем-кем гъэлем зере шивлей онгурдоре Саперави, Каберне-Совиньон, Шардоне, Мерло.
Шивлегьо онгуре мибу восдоре э догъистони шитилкошдегор ООО «Планта».
Э бараси э кор венгесде проекте миё бу э гуьнжо овурде 46 гьеммишеине корисохи жиге ве вогосундени дегьигьо жофокеши э вэхд гуьре корсохгьо. Э вэгIдо ведарафдеи проекте э мол ведешендение гъувотлуье э 2027-муьн сал вечиреи эз муьзд жофои э бюжет Республике Догъисту ве гьемшегьери бюджет зевер сохде 2 млн. монет.
Э муьлк сергуьрди вокурдеи гIовдоренигьо тургьо эри кем-кемие гIовдореи. Разилуье тегьер доре гIов, э суьфдеи нубот пур сохде те эхир гIови жиге доруние гъэдер зиёдте 100 гьозор куб.м, вокурдеи коминики гьисди э е гъэдер вэгIдо бегьем сохдеи. Пур сохде те эхир жигегIове – курасохдеи мол ведешендеи эз гьисдигьо гIовдоренигьо ерх э кумекии гъопу, э комики гьисди гIовибору, гIовигъили. Дуразовуне гировундеи гIовдореи тур гуьнжуьнде 660 км. Гьемиге проект пушоки дире дануьсде жигенореи жерге э гьемме мейдон кошдигьо онгурдор. Э имбурузине руз кошде омори 60 га онгурдор: Мерло – 26 га, Суьфдеини Магарача – 15 га, Саперави – 19 га.
А.Абдулмуслимов э гъэд межлуьслуье межлуьс э товун дешендеи онгурдор хуьшдени ю гъобул сохди бэхшвегири э кошдеи шивлей жинс «Совиньон».
«Хьуькуьм Догъисту алверсуьз гьем борж дорени хории муьлк эри дуьруьжде омонети проектгьо. Э песини салгьо э республике дори 9 хории муьлк эри дуьруьжде инвестпроект. Эн иму лап вожиблуье везифе гуьнжуьндени э у, эри чуьки хори бире дешенде э кор.
Имбуруз иму гьисдим э хоригьо, эже гьевел бу мэгIлуьмлуье совхоз. Э песини дегьигьосали бири гьечуь, чуь у гьисдигьо сэхьиблугъире бири гьеле пули гъэрхунди э дегьигьо млн., гьем мейдун э 500 га бири шендеоморе корсуьз. Э гьонине вэхд инжо веровундеи дуьруьжде омонети проект «Тегьенг каспийске», веровунденигьо кор кошдеи гьем гьерчуь бисдо сохде эз онгур.
Минкини гьисдигьо э онгур ехмиши эн иму, миё бу бегьем э кор венгесде. Имбуруз э ижире зиёдгуьгчегие хьол корсохгьой иму ведарафди э сэхьро ве кор сохде. Инжо кор сохде 180 корсохгьо. Угьо вегуьрдени муьзд жофои ве хэйр, не вадарафде эз эхир регионе»,- гуфдири А.Абдулмуслимов.
Нушудорегор сергуьрдегор проекте-депутат Гуьрдлемей Хэлгъи РД Имам Яралиев, э нубот хуьшде, риз кешири, чуьки сэхьиб хори гьис сохде кумекии рэхьбере регионе:
«Хуьшдени ю Сервор РД Сергей Меликов Алимович гьееки э Абдулмуслимом Мухудиновичем дорени хьэрекети параменди гьемме отрасльгьо, оммо э суьфдеи нубот – параменди хозяйствой дигьбони. Догъистони лап бэхд бири, чуь э сервори Хьуькуьм республике поисди одоми, коминики бинеденлуь варасирени э пуьрсуьшгьо параменди хозяйствой дигьбони – эз молгъэредори те онгуредори. Ве гье у доре бараси. Ме фикир сохде, экуьнди сал-дуь регион тозеден э хуьшде дировунде мидану совети молведешендеи онгур гьем гьеле зевер биреи эну. Ве гье у мибу лап омборе бараси. Догъисту миё бу вегуьрде гьуьндуьри э гьисдигьо рэхь»,- гуфдири Яралиев.
Сернуьш Хьуькуьм Догъисту А.Абдулмуслимов мерэгълуь бири эз онгур дошде ведировундегор игъролноме ве рэхьменомуслуье коре э плантацигьо Дербенди дигьбон.
Угьо, э нубот хуьшде, согъбоши гуфдиреи рэхьберсохи проекте э товун корисохи жигегьо.
Корсохгьой гъинемиш сохди, чуьки не бирази ми бу зиёдсохи гьеррузине серзиёди эки мегьине муьзд жофои. Гьонине вэхд гьер руз эз жофо хуьшде э онгурбогъ угьо вегуьрдени 1500 гьозор пул. Еки эз сергуьрдегор проекте И.Яралиев э жиге биреи Сернуьш Хьуькуьм РД А.Абдулмуслимове боворини дори, чуьки мегьине муьзд жофои мибу ёгъинлуь зевербире.
ГIуьзет сохде, чуьки э у мескен инвесторе воисдени гьемиге э кор венгесде проект э товун агросафари.
