Э суьфдеи гуьрдлеме корие десдере эсер нисдсохи эзуновлейге бире гъозие бамиши сохдеигьо, э гуьнжо овурде омори э гъэдэгъэи Серворе РД Сергее Меликове, пуьруьш сохде омори пуьрсуьшгьо кумекии дореи булатмиши кеширегоргьоре зигьисдегоргьой регионе. Корие десдере сервори сохди вице-премьер Абдурахман Махмудов.

Жигегир огол зери бэхшвегиргьоре желди дарафде э жирей корисохи, рафдеи эки гъэрхундигьо эн хуьшде жугьобдорлуь бире ве э гуьнжо овурде гьеррузине хэбер дореи э товун гъобул сохдеие гъэдергьо.

Серворгьоре хьуькуьм эн серкорире гъэдэгъэи зере омори гировунде гъиметдии гъозиере э жигегьо эри бовориние вогордундеи бедхэржи буланмиши кеширегоргьоре:

«Э гъэдер бинелуье гъэдэгъэгьо – гьеммишеине хэберлуье-андуьрмишие коре э могьлугъгьоревоз: одомигьоре вожиблуьи варасирение тегьер варасунде, комини кумекиире гIэмел миёв вегуьрде, комини когъозгьо вожиби ве эже руй бире. Вожиблуьи омборе корикумекии доре э вечиреи ве тозеден э хуьшде дировундеи вир сохде когъозгьоре».

Жирелуье тигъэти доре омори муниципалитетгьоре э режимовоз ЧС региональни риз гъэдерлуьиревоз. Серворгьоре гъэдэгъэ зере омори норе жугьобдорлуье одомигьоре э песой э гуьнжо овурдеи нуботномегьоре буланмиши кеширегоргьоре, гъиметдии бедхэржире ве гIэрейидорее кори сохдеи дуь э екиревоз.

Бинелуье четиниревоз гуфдире омори недебиреи ихдиёрие когъозгьоре э хунегьо э дигьбоние зигьисдегоргьоре. Э товун энуревоз нуботномегьоре гъэдэгъэ зере омори бэхш сохде э дуь бедел: одомигьо э документгьоревоз (эри муьзде дореи эсер гуьнжолуьи) ве одомигьо документгьосуьз. Документсуьзгьоре кумекии миду э войгей хуьшде гуьре бинегьо «Инсан», «Имиди» ве «Темизе дуьл».

Чуьтам гуфдири министр жофо Магомедзагид Кихасуров, эз электронни платформегьо доре омори омборте 12 гьозор эрзогьо. Э Хасавюртовски районе эрзогьо эз одомигьо жигегьо гьелелуьге э жиге биреи гъобул сохде рафдеие жигегьо МФЦ. Абдурахман Махмудов гъэдэгъэ зери серворгьой екейгегьо буланмиши кеширее районгьоре дуь э екиревоз э Минцифры РД дешенде и корисохире э е гъэдер мескен эн хуьшде.