Пуреихдиерлуье нушудерегор эн Президент РФ э СКФО Юрий Чайка омори э Махачкале. Гьееки э сервор республикеревоз ве э нушудорегоргьой эн федеральни ведоствогьоревоз пуреихдиерлуье нушудорегор рафди э зарали зере оморигьо объектгьо эз сайловгьо.
Ю.Чайка фегьм сохди подстанциере «Приморская» э Махачкале, комики гъуьч сохде оморебу, э кор венгесде оморебу гьемме гъувотгьо ве овгъотгьо, э и хьисоб сенигIэткоргьой МЧС. Гьонине вэхд оборудование кор сохдени гьеммишеинере хуно. Э зутее меркез эн МЧС Догъисту Ю.Чайка ве С.Меликов гуш дошдет докладгьой эн нушудорегоргьой эз сайловгьо зарали зере оморигьо шегьергьоре ве районгьоре.
Э жирей ВКС сервор Махачкале, эн Буйнакск ве эн Хасавюртовски районгьо ихдилот сохдет э товун зере оморигьо зарали, э товун гъуьчсохие коргьо ве кумеки сохдеи э одомигьо.
Э гуьрдлеме пуьруьш сохде оморебу гъуьчсохие коргьо ве чорегьой эн хьуькуьметлуье кумеки дореи.
Сер гуьрденки гуьрдлемере Ю.Чайка э ер овурди, ки гьовой рузгьо э субъектгьой эн Софун Кавказ зобу бири 27-муьн март. Э сереботи омореи омбаре ворушгьо (эз 100 мм э 2 руз), ве эн кулок те 28 метрегьо э е ддэгъдэгъэ бири сайловгьо, хори лов бире фурамори ве вечаруьсди инфраструктуре. Э зир гIов демунди эз 8 гьозор хунегьо омбарте, экуьнди 6 гьозор бисдугьо ве экуьнди 350 рэхьгьой мошингьо. Хэребе бири 17 рэхьгьой мошингьо, 16 э пееде гешденигьо ве 2 рэхьгьовуние куьрпигьо, энергорасундеи ве газерасундеи.
«Э хотур э вэхд ю гировунде оморигьо коргьо, дануьсдейм назари сохде гуьнжуьнде оморигьо овхьолете ве зарали не зереи э одомигьо, дануьсдейм хьозуьр сохде гьелелуьгее жигегьо, эз батмиш биригьо районгьо э де мескениге гировундейм одомигьоре, э зарали зере оморигьо районгьо овурдейм гIов ве хурек ве гереки гъуьч сохде энергорасундеире ве газерасундеире», — гуфди Ю.Чайка. Сервор Догъисту э нубот хуьшде ихдилот сохди э товун гирошденигьо овхьолет э регион ве э товун чорегьо, гъобул сохде оморенигьо эз вэхд сергуьрдеи зобуне овхьолет.
«Офхьолете дануьсдейм хубте сохде, оммо гереки гировунде келе кор эри ниссохи эзуновлейге бире гъозиегьой эн зобуне овхьолете, гъуьч сохде хэребе биригьо хунегьоре ве объектгьоре, эри чуь герек мибу омбаре пулгьо. Сер гуьрде омори кор эри кумеки дореи э зараливегуьрдегоргьо ве герекие чорегьой эн социальни кумекии ве пул. Эри кумеки дореи доре омори эз 43 гьозор эрзогьо омбарте, ве и рэгъэмгьо омбар бирени», — гуфди С.Меликов.
Рэхьбер республике риз кеши гьееки э уревоз, ки жейлее тигъэт доре оморени э оводу сохдеи ве хубте сохдеи инженерни инфраструктурере. Коргьо гировунде оморени э системегьой гIоврасундеи ве гIовгировундеи, гьемчуьн э энергорасундеи – эри зевер сохде гъоимгъувотлуьи энургьоре э гъэршуй эн зобуне тебиетлуье гъозиегьо.
Гьемчуьн э товун овхьолет ихдилот сохдебируьт нушудорегоргьой эн региональни ве федеральни органгьой эн веровунденигьо хьуькуьм. Э товун овхьолет э Чеченски Республике ихдилот сохди жигегир эн Хьуькуьм ЧР Р.Шаптукаев.
Пуреихдиерлуье нушудорегор эн Президент тигъэт курабирегоргьоре чаруьнди э у, ки э пушо норе оморигьо чорегьо э гуьрдлеме эри зу нисдсохдеи эзуновлейге бире гъозиегьой эн зобуне овхьолете мие э кор венгесде биев э кутэхьэ вэхд.
«Фегьм сохденки, ки зобуне овхьолет расири э мескенгьой эн е ченд субъектгьой эн Уруссиетлуье Федерацие, оммо зере оморигьо зарали, э пуш-пушокие гъиметдиигьо эн органгьой веровунденигьо хьуькуьм эн Догъисту ве Чеченски республике гуьре, гуьнжуьнде миев эз 1 млрд монетгьо омбарте, эз субъектгьо хосденуьм гьееки э мерэгълуь гьисдигьо федеральни органгьой эн веровунденигьо хьуькуьмевоз э кутэхьэ вэхд хьозуьр сохде ве фуьрсоре документгьоре эри фегьм сохдеи э Хьуькуьметлуье комиссие эри зуте мэгIлуьм сохдеи ве нисд сохдеи зобуне овъьолетгьоре»,- гуфди Ю.Чайка.
Пуреихдиерлуье нушудорегор гьемчуьн руй бири эки федеральни органгьо эн веровунденигьо хьуькуьм э хогьишевоз кумеки сохде э субъектгьой округ эри гъуьч сохдеи хунегьоре, объектгьой ЖКХре, социальни сферере, инженерни инфраструктурере, ве вечаруьсде оморигьо э сереботи ЧС.
Э пуьруьшсохи пуьрсуьшгьоре бэхш вегуьрдебируьт жигегир эн Минтранс РФ э товун коргьой эн гъэлхэнди одомигьо, э товун зобуне овхьолетгьо ве нисдсохдеи эзуновлейге бире гъозиегьой эн хэребеигьоре В.Яцуненко, жигегир эн Минтранс энергетике РФ П.Конюшенко, жигегир эн Минтранс вокурдеи ве хунелуье-коммунальни хозяйство РФ А.Ересько, сервор эн департамент мелиорацие эн Министерство эн дигьлуье хозяйство РФ А.Коровин, жигегир эн сервор ФКУ «Идоре эн федеральни рэхьгьой мошингьо «Кавказ» Б.Воробьев ве рэхьбергьой эн мерэгълуье идорегьо.
