Сервор Догъисту С.Меликов гировунди нуботлуье гуьрдлемей эн зутее штабе э товун нисдсохдеи эзуновлейге бире гъозиегьой эн сайловгьоре.

Э товун гъобул сохде оморенигьо чорегьо ихдилот сохди рэхьбергьой эн органгьой хьуькуьм, МЧС, серворгьой шегьергьо ве эн районгьо. С.Меликов согъбоши гуфдири эз рэхьбер эн Хасавюртовски район Б.Мамаев. Эри кор, гировунде оморигьо э и тараф, ве эри кумеки э одомигьо.

«И нишоне эн соводлуье гъэножогъини, кейки рэхьбер э сер хуьшде вегуьрди жугьобдуорлуьире, э гуьнжо овурди коре эри кумеки дореи одомигьоре. И очугъэ нишонеи гъобул сохдеи гъэрорномегьоре»,- гуфди сервор регион.

Э район, эже дошде оморени зобуне овхьолет, э гъуллугъ эн С.Меликов гуьре рафдет сернуьш хьуькуьм ве рэхьбергьой эн органгьой хьуькуьм.

Чуьтам нисд сохде оморени эзуновлейге бире гъозиегьо ихдилот сохдет премьер-министр А.Абдулмуслимов, веровундегор гъэрхундигьой эн сервор районе Б.Мамаев ве министр мошингьо ве эн рэхьлуье хозяство эн Республикей Догъисту А.Алибеков.

Э дигь Адильотар батмиш бири хунегьо ве мескен хьэетгьо, одомигьо гировунде омори э де мескениге, риз гIов зофру бирени.

Э дигьгьо Кадыротар ве Тутлар экуьнди 120 хунегьо э зир гIов домундет.

Эри ниссохдеи эзуновлейге бире гъозиегьой эн сайловгьоре э кор венгесде омори гъувотгьой МЧС, администрацие эн районгьо ве хэлгъие дружинникгьо.

Экуьнди 90 одомигьоре доре омори гьелелуьгее жигегьо, угьоре доре оморени герме хурек, дермугьо, партал ве гьемме герекигьо.

С.Меликов гуфди ки гереки зу тозеден э хуьшде дировунде инфраструктуререй эн зарали зере моригьо дигьгьоре, э суьфдеи нубот – рэхьгьоре.

«Гереки офде техникере эри вечире гIове ве темиз сохдеи эз гилов. Гьемкоркигьо эз Уруссиетлуье рэхьгьой мошингьо гьемчуьн кумеки мисохут»,- гуфди С.Меликов.

Сервор эн региональни министерствой мошингьо мэгIлуьм сохди, шев эки могьлугълуье жигегьо овурде омори герекие технике ве сенигIэткоргьо сер гуьрдет темизсохие коргьоре.

Гьемчуьн С.Меликов гъуллугъ дори тозеден вокурде вачаруьсде оморигьо школере э Хасавюртовски район. Сервор Догъисту гъуллугъ дори гъимет доре зере оморигьо заралире ве хьозуьр сохде гереклуье когьозгьоре эри дешенде объектгьоре э гуьнжое программе.

Эри тозеден э гуьнжо овурдеи хундеире фегьм сохде миев минкин хундеи э жирей онлайн енебуге доре автобусгьо эри берде хундегоргьоре э де школейгегьо.

С.Меликов гьемчуьн гуфди э товун хэйрлуье кор эн хьукуьм республикере э ведешендегоргьой гIовевоз. Гьонине вэхд гIов доре омори э больницегьо, богъчегьой гIэили ве э гьелелуьге доре оморигьо жигегьо. Сервор республике гъуллугъ дори кор сохде гьееки э Уруссиетлуье потребительски назариревоз.

Э товун еклуье кор сохдеи э мисволуье фондгьоревоз, э жэгIмиетлуье идорегьоревоз, э бизнесевоз ве э рэхьбергьой регионевоз ихдилот сохди меслэхьэтчи эн сервор республике З.Махмудова. Пулгьо, эри доре эри зарали зере оморигьо девлет эн одомигьой Догъисту, вечире омори. Сервор ГУ МЧС Уруссиет э Догъисту М.Девришбеков ихдилот сохди, ки ведомствогьо э гуьнжо овурдет кор эн гьемме органгьой эн хьуькуьм республикере.

Овхьолет э гIовевоз ве санитарни-эпидемиологически овхьолет

Рэхьбер эн региональни Идоре эн Уруссиетлуье потребительски назари З.Омариев гуфди ки гIов лихьэсуьзи ве унигее санитарни-микробиологически бирмунушигьо хубте бири.

Э даннигьой эн ведомство гуьре, э мескен Махачкале, Хасавюрт ве Каспийск зэгIифигьо э хьисоб веноре не омори.

Э тешколее соводие идорегьо фегьм сохде оморени дошдеи гъэршуйэпидемически жирегьоре, тегьергьой хьозуьр сохдеи чире, гьемчуьн хурде энжэгъ душунде гIове.

Овхьолет э муниципалитетгьо

Э Махачкале товушсуьз мундет экунди 30 гьозор одомигьо. Э подстанциегьо гIов ведешенде омрени эри тозеден э кор венгесдеи энергообъектгьоре.

Эз 320 одомигьо омбарте гировунде омори э де мескениге, 129 эзугьо э гьелелуьгее жигегьой писдеи, гьемчуьн хьозуьр сохде омори зиедие жигегьо.

Э Догъистоние Огни э гуьнжо овурде омори 10 корлуье десдегьо, комигьоки фегьм сохденуьт хэетгьоре. Гьонине вэхд гIов кем бирени, оммо э кимигьо жигегьо расире четини.

Администрацие э гуьнжо овурде овурдеи гIове эри социальни объектгьо ве бутулкее гIове э хунегьо. Чуь расирениге э энергорасундеи, зарали зере омори э еки эз фидергьо. Гьемме герекие коргьо гировунде оморени, э шегьер товуш куш нисе оморе.

Э Буйнакск э гуьнжо овурде омори гьелелуьгее жигегьо, эже кучмиш бирет е ченд кифлетгьо.

Сервор регион гъуллугъ дори хьозуьр сохде минкин э кор венгесдеи федеральни тегьергьой гъувотдореире, э и хьисоб эз хьисоб дешендеи республикере э кор сохденигьо программегьо.

Э товун артгьой гуьрдлеме сервор республике дори е жерге гъуллугъгьо

Зуте э кор венгесде хэреб биригьо подстанциегьоре э Махачкале.

Гировунде гъэршуйэпидемически коргьо.

Сер гуьрде кор комиссиегьоре эри гъиметдии заралире. Кор энугьо бэхш сохде миев э се тарафгьо.

— кумеки социальни объектгьоре;

— кумеки одомигьоре, комигьоре гьисди ихдиери эри гъувотдореи эз бюджет;

— кумеки одомигьоре, комигьореки нисди ихдиери эри бюджетни кумеки, э и хьисоб э сереботи когьозгьо эри хуне.

Э и ижире гъозиегьо э кор венгесде миев мисволуье фондгьо, комигьоки сер гуьрдет вечире пулгьо.

Э гуьнжо овурде гьемме чорегьой гъувотдореире ве э товун энугьо мэгIлуьм сохде э гьемме зарали зере оморигьо одомигьо.

Премьер-министр эн республике А.Абдулмуслимов гировунде корлуье вохурдеире э рэхьбергьой эн агропромышленни ве экологически сфере эн Хьуькуьм э товун пуьрсуьшгьой эн эзуновлейге бире гъозиегьой эн хэребеигьо э объектгьой эн дигьлуье хозяйство ве экологией республике.

Э дигьлуье хозяйство зере омори келе зарали: батмиш бири дигьлуье хозяйственни хоригьо, э хьисоб веноре омори гъозиегьой пуч биреи дигьлуье хозяйственни хэйвугьо. Эзуш бэгъэй, ведиремореи гIов эз гъирогъгьой эн нуькерегьо Аксай ве Акташ диеш зобу сохди  овхьолет батмиш биреи могьлугълуье жигегьоре э Хасавюртовски район.

«Э зарали зере оморигьо мескенгьо мие фегьм сохут сенигIэткоргьо эн битмишидори, молгъэредори ве диеш. Фегьм сохит овхьолет эн поизи ве э васал кошде оморенигьо гендуьме, фегьм сохит овхьолет богъгьоре ве егъин э хьисоб венит барасигьоре э протоколгьо эри мерэгълуь сохдеи федеральни пулдореире эри муьхькем сохдеи гъирогъ нуькурегьоре. Гьемме мие э хьисоб веноре биев», — гъуллугъ дори премьер-министр.

Гьемме коргьоре гереки разилуь сохде э гьемме ведомствогьоревоз эри зу хуб сохдеи овхьолете э зарали зере оморигьо районгьо.