Сервор Догъисту Сергей Меликов гировунди гуьрдлемей эн Координационни меслэхьэте э товун парааменд чуькле шегьергьоре, э комики у гуфдиребу, ки пуьрсуьшгьой эн комплекски параменд сохдеи ве э гунжо овурдеи гьеймогьине чуькле шегьергьоре имбуруз мэгIнолуьни эри социальни-экономически параменди эн республики.
«Иму гуфдиреним неки э товун вокурдеи омбаретебэгъэе хунегьоре, оммо гьемчуьн э товун э кор венгесдеи хоригьоре э хэел эн гьемме вокурденигьо ве эн социальни инфраструктуре: э товун рэхьлуье сетьгьо, жэгIметлуье жигегьо, социальни объектгьо – школегьо, богъчегьой гIэили, идмонлуье ве базургендие дуьруьжде вокурдеигьо. Иму виниреним, чуьтам зу параменд бирени шегьергьо э унигее районгьо. Э Догъисту параменд нисе бире», — гуфди Сергей Меликов.
Э гуьрдлеме пуьруьш сохде оморебу гирошденигьо овхьолет э сферей параменд сохдеи чуькле шегьергьоре, норе омори везифегьо э товун э гуьнжо овурдеи гьеймогьине ве муьхькемлуье системей парменд сохдеи мескенгьой республикере.
Э докладевоз нушу дори министр вокурдеи эн регион Бахтияр Уллаев. Пуьруьш сохде омори пуьрсуьшгьой эн жэгIмие параменд сохдеи мескенгьой (КРТ) э Махачкале, э Догъисноние Огни ве э Буйнакски район.
Э шогьнишон республике вихде омори 11 суьфденуботлуье мескенгьо эри вокурдеи хунегьо, э вокурдегоргьоревоз игъролгьо бесде омори, комигьоки хьозуьруьт веровунде э и хьисоб социальни гъэрхундигьоре.
Гьемчуьн фегьм сохде оморебу пуьрсуьш тогIин сохдеи плане ве тегьергьой э кор венсдеи хоригьоре э Каспийск. Хьозуьр сохде омори рэхьлуье карте э товун э кор венгесдеи жэгIмие параменд сохдеи мескен вокурдеи хунегьоре.
Еки эз гъосуьтгьой гуьрдлеме – вокурдеи э махачкалински-каспийски чуькле шегьергьо гьеймогьине поликлиникгьоре. Сервор регион дори гъуллугъ офде гуьнжолуье жигегьо, эки комигьоки асент мидануьт расире одомигьо.
С.Меликов риз кеши вожиблуьи э кор венгесдеи хорие овгъотгьоре э хушхьоли эн догъистонигьо: «Гьисдигьо хоригьо, э сер комигьоки э кор венгесде миев келе инвестиционни проектгьо, имуре воисдени мерэгълуь сохде э хозяйствогьо, эри вегуьрде налоггьо, доре хуне михьтожлуьгьоре».
Э товун артгьой пуьруьшсохи сервор регион дори е жерге гъуллугъгьо.
