Догъисту э 2026-муьн сал дигьлуье хозяйственни молгьоре берди э Узбекистан, Кыргызстан ве Азербайджан. Э товун эни мэгIлуьм сохди Сернуьш РД Абдудмуслим Абдулмуслимов, андуьрмиш сохденки бэхшвегирире э гуьрдлеме комиреки гировундебу вице-премьр РФ Дмитрий Патрушев.
Э имбурузине руз вожиблуье буруние алверие кор э сферей дигьлуье хозяйство эн Догъисту и зиед сохдеи гъэдер ведешендеи молгьоре, гьемчуьн зиед сохдеи жигегьой фурухдеире, э и хьисоб зевер сохдеи минкингьой бердеи дигьлуье хозяйственни молгьой эн АПК республикере э де вилеетигегьо.
Дуьруьжде буруние алверие хьовиргьой республике: Азербайджан, Белоруссие, Грузие, Индие, Иордание, Ирак, Казахстан, Кыргызстан, Китай, Ливан, ОАЭ, Таджикистан, Турцие ве Узбекистан. Келе минкингьой эн еклуье корисохи э сферей АПК э вилеетгьой эн Персидски заливевоз.
«Иму кор сохденим э сер зиед сохдеи бердеи молгьоре э де вилеетигегьо. Э зутеине даннигьо гуьре, эри дуь мегьгьо эн 2026-муьн сал корхонегьой эн регион иму гушд гусбендире берди э Узбекистан, жэгI э Азербайджан ве Узбекистан, дунере э Кыргызтан. Молгьой иму гереклуьни э гIэрейхэлгъие рынок»,- андуьрмиш сохд э товун артгьой гуьрдлеме премьер-министр.
Гереки гуфдире, Догъисту бэхш вегуьрдени э кор венгесдеи федеральни проекте «Бердеи молгьой эн дигьлуье хозяйственни комплексе э де вилеетигегьо» эн миллетлуье проект «ГIэрейхэлгъие кооперацие ве бердеи молгьоре э де вилеетигегьо» э 2025-муьн-2026-муьн салгьо.
