Мерэгълуьи эну гирошди э бизнес – ве гье и гьисди эз гьемме дузгунлуье гъэрорноме. Вихде оморе кор миё бу муьгьбетлуь, эри чуьки у миё бу доре хоши. Бовор сох э хуьшде э гьер гъозие – ве туь гьемме кор ми веровуни, хьисоб сохде у. Жогьиле мерэгълуье зен, муьгьбетлуье духдер, зиёдгуьзелие зен, лап муьгьбетлуье гlэилгьо хуьшдере деде, диеш бизнес леди, кор хуьшдере э муьгьбетово сохденигьо – гьемме гье и э товней Евдит Илизирова.
— Сер гуьрденуьм эз динлуье пуьрсуьш: эже туь хьэсуьл оморей, эже хундеире вегуьрдей, эже гирошди гlэильети эн туь? Эхи эз гьемме товушлуье ёрбиёри мундени э иму эз зуинее салгьо.
— Хьэсуьл оморем ме э шегьер Кизляр э Догъисту, унжо тербие вегуьрдем э школе №3. Э 1990-муьн сал иму рафдейм э Пятигорск, унжо варасунде бегьем сохдем 11 класс. Песде дарафдем э хундеи э политехнически институт э Пятигорск э сенигlэт «бухгалтери учет ве аудит». Е ченд сал кор сохдем бухгалтери э Пятигорск, песде э Москов. Ведарафдем э шуьвер.
— Эзжеи гъумолет деде-бебе эн туь, келедеде ве келебебе? Гъэлече кифлет – ве гьисди гъэлече гъумолет.
— Деде-бебей ме хьэсуьломорегоргьой Догъисту. Деде, Мишиева Мария, эз Дербенд, у рафди эз и гlуьлом э 2022-муьн сал э Пятигорск: э вэхд гешдеи э сирот бебе хуьшдеревоз э жерге «Гlэжелсуьзе полк» 9-муьн май ве эз некуми динж бири. Бебе, Мишиев Илья, хьэсуьломорегор Махачкала. Деде тербие вегуьрди э педагогически институт э Махачкале э физико-математически факультет. Хундеире варасунде бегьем сохди, песде ведарафди э шуьвер э Кизляр, дир не кешире вэхд кор сохди тербиедорегор математике э школе. Бебе варасунде бегьем сохди торговый техникум э рэхькори «жэгlметлуье хурек» э Оржоникидзе ве Москови кооперативни институт э Ставрополь, сенигlэт «экономике ве торговля». Кор сохди э Кизляр рэхьберисохи жерге кафе.
— Бинелуье жейлее фикир несигlэтдореи ве параменди гlэиле деноре оморени э кифлет. Ихдилот сох, чуьтам туьре несигlэт дори деде-бебе?
— Мере несигlэт дори э дуьлтижи, чуьтам ве э омборгьо жугьури кифлетгьо. Терсирем денишире э чумгьой бебе. Эри гье у ме разилуьинуьм э деде-бебе хуьшде. Эри гье у, чуьки несигlэт дори мере чуьтам гереклуьи, хуте сохди э кифлети верзуьшигьо. Угьо хуте сохди мере жофо кешире, тербиевегуьрде, фикир сохде э дузине рэхь.
Э ёр ме гьисди, чуьтам э гlэили э беберевоз рафдем э ов. Лап мере хьэз оморебу кор сохде э хьэёт хуьшде. Дедере бу лап дуьруьжде клумбагьо э гъуьзуьргуьлгьоревоз ве екиге гуьлгьоревоз, у лап угьоре муьгьбетлуь бу. Э бебе кумеки сохдем хорунде вечегьоре: гье у бири еки эз мерэгълуьигьой эну.
— Зугьун – гье и культурни очор эн хэлгъ. Э кифлет ишму э жугьури гоф сохденит? Гоф сохдет ми э жугьури деде-бебе ве екиге келетегьо эз кифлет?
— Э зугьун жугьури э кифлет гуфдирет энжэгъ келетегьо, кейки герек бири гуше-гуши сохде, пэхьники гуфдире чуьниге эз гlэилгьо. Унегуьре энжэгъ ме варасиренуьм зугьун жугьури, оммо гоф не сохденуьм, ве гье и лап зобуни. Иму миё бу даним зугьун хуьшдере. Шуьвер ме дануьсдени жугьури ве э гlэилгьоревоз гоф сохдени, чуьнки угьоре мерэгълуь бире зугьун иму.
— Чуь кор сохде туь? Эже кор сохде? Вегуьрдени ми туь софо эз кор хуьшде? Гье у лап вожиби.
— Сенигlэткори ме бухгалтер, оммо э песини салгьо дегиш сохдем сенигlэт хуьшдере, ве гьеймогьой мере гьисди салон красоты. Салон мере норем нум «Евдит» — гье и нум келедеде, э хотур комини мере нум дорет. Кор э одомигьоревоз лап жугьобдорлуьи ве гурунди, оммо мере лап хьэз оморе кор ме, параменди сохденуьм э муьгьбетевоз, доренуьм э одомигьо, эз буруние тозе дегиши венгесдеи бэгъэй, ловехэндеи ве хубе хьол.
— Дин-догlот – гье и нэгъуллуье гъонунноме ве торих. Комини жиге гуьрде у э зиндегуни туь?
— Боворинуьм э Худо. Гуфдиренуьм эз гьеммей дуьли-жуни: эз деде рафдеи ме бибоворин бирем, гье бирден муьрдеи эну венгесди боворини мере. Иму светски жугьургьоим, оммо шоббот эз гъонун не ведарафденим. Ме дегесунденуьм шэгlмгьо, хьозуьр сохденуьм шобботине хурек шевине. Ве гьелбетте, иму гlуьзет сохденим бинелуье мигlидгьоре: Песах, Рош а-Шана, Ханука. Дин-гlэдотгьо хуьшдере гереки гьелбетте эз гъонун не ведарафде.
— Ки эз гьемме омборте туьре хьэвес доре э зиндегуни туь?
— Мере хьэвес дорени гlэилгьой ме. Угьо – эз гьемме серворлуье эшгъэдорегоргьо э зиндегуни ме.
— Гьисди ми туьре хобби ве мерэгълуьигьо?
— Э песини 10 сал мерэгълуьигьой ме гирошди э бизнес: ме вокурдем студие рачи ве бегьем те эхир мерэгълуь бирем э у.
— Комини гьовой музыкеи эри туь муьгьбетлуьи?
— Гьовой музыкеи мере лап хьэз оморе, гуш веноренуьм гьеммере, эз классике те кавкази шансон. Жун ме гьеммише талаб сохде музыке, оммо кейки коминире гуш дошденуьм межбур бире эз хьол.
— Чуь несиет ми дори туь жугьурие жогьилгьоре?
— Э гоф деде-бебе гуш дошде, бошит номуслуь – ве гьемме хуб мибу, хушхьоллуь э кумекии Офирегоревоз.
Нуьвуьсди Стелла Давыдова
Тержуьмесох Ильканаева И.
Сирот: STMEGI
