Гьэгъигъэтлуье рачи музик гьисди э у, чуьки у гуьрд сохде одомигьоре. Гьис, огол зерение эз музик, дегиш бире эз вэхд гуьре, эз жиге эки жиге. Зиндегуни музиксуьз минкинсуьзи, у ведабурра иловлере э гьемме жиге: э мошин, э гировундеи мигlид, э институт, э рэхь э кор рафдеи. Музик е гъэдер расире э гьемме лой зиндегуни иму. Гьечи хьисоб сохде гофсохдегор эн ме, музикончи ве композитор Лазарь Нагдимаев.

— Мэгlни ишму э товней деде э гофгьой Эльмире Шалумова жуне бурра: гуьнжуьсдеи гоф ве музик дорени нисе вогогьрушие рачи. Гьемме интернет пурлуь бири мэгlни ишмуревоз. Эйчуь ишму гъэрор норейт нуьвуьсде музик эки и гофгьо?

— Ишму дузи: музик нушу доре хьол-овхьол жуне ве кеф. Гье и расирени э гьемме офиренуьше одомигьо, шекуьлкешгьо, шогьиргьо, композиторгьо. Гьелбетте, эз гьово жун бэгъэй, келе рол возирени фикир нуьвуьсдеигьо. Унегуьре, кейки ме хундем дестон Мира Шалумова, гье бирден варасирем, чуьки мэгlни миё бу бикефлуь, назуьшмендлуь ве хьэсротлуь. Чуь себеб мере э хьэвес венгесди эри нуьвуьсде музик? Кор гьисди э у, чуьки Мира Шалумова гъовум ме, уре и пушогьо бу руз хьэсуьл омореи, ве ме гъэрор норем сохде эри эну хьэёменде музикеи бэхш.

— Музик – гье и культури килит гьер хэлгъ, у нушу доре руьхь энуре. Э хэлгъ иму гьисди ижире мэгlнигьо?

— Э гъимиши, хэлгъ имуре лап кеми мэгlлуьмлуье мэгlнигьо. Воисдени ми, гьелбетте, эри чуьки угьо омбор бу, эри чуьки не бу вирсохи культуре иму, дин-гlэдотгьой иму.

— Ихдилот сохит, эже ишму хьэсуьл оморейт, эже хундеи вегуьрдейт?

— Ме хьэсуьл оморем э Дербенд, те хьофдимуьн класс хундеи вегуьрдем э школе №11, песде, э 90-гьо, рафдем э Москов, варасунде бегьем сохдем э шогьнишон школе ве техникум. Деде-бебей ме зуьнде нисди.

— Кейки ишму рафдейт э Исроил? Чуь кор сохде гьейсэгlэт э хьуькуьмет жугьури?

— Чуьтам ме э ёр овурдем, э «лихие 90-е» студентгьоре четин бу э монети гъэножогъи, ве э 1992-муьн сал э беберевоз рафдем э Исроил. Гьейсэгlэт мере гьисди кифлети бизнес, ме кор сохденуьм гьемиге э музики мейдонгьо чуь диджей-продюсер.

— Варасирени ми туь гофгьой гье и зиёдгуьзелие мэгlни э товней деде? Эхи Эльмира Шалумова нуьвуьсди уре э зугьун жугьури. Э кифлет ишму гоф сохдени э зугьун дедеи?

— Эри, гьелбетте, ме гоф сохденуьм э зугьун дедеи. Гоф сохдем э келете гъовумгьоревоз. Хунденуьм книггьо нуьвуьсдигьо жугьургьо догъи. Ве, гьелбетте, гофгьо Эльмира дес зери э жун ме, ве ме гъэрор норем мэгlни нуьвуьсде.

— Ки эз гьеймогьоине мэгlни хундегоргьо, э фикир ишму гуьро, мидануь гье и мэгlнире хунде гьечуь, чуьтам туьре воисдени?

— Э хьэйфкеши екиш вогогьруш сохде ни дануь оригинал. Чуьнки у нуьвуьсде омори, ме фикир сохде риз гъэдерлуьи сенигlэтлуьи ве гьинорменди мэгlни хундеире. Жугьоб: нэгl! Екиш.

— Ки эз гьеймогьоине гlуьломи хундегоргьо ишмуре хьэз оморе? Мэгlнигьой эн ки ишмуре хьэз оморе гуш дошде?

— Ме гуш дошденуьм омборе жире-бе-жирее тегьер, бинелуь лирике, мугамгьо э электронни инструментгьоревоз. Э песини вэхд бирмунденуьм тигъэти э иранцигьо, гречески музик – жэгlмие э гьемме, эже гьисди гуьнжуьнде бедел мугам. Гьисди еки мэгlнихун, эки комини ме гъэножогъинуьм э келе гермиревоз: нум эну Roya.

— Гьисди ми гене мэгlни э жугьури, эри коминигьо ишму нуьвуьсдейт музик?

— Эри, гьелбетте. Гье и согъэ альбом, песини э офирени буьзуьрге мэгlнихун ве музикончи Мити Юшваева. Ме неки музик нуьвуьсдем, оммо сохдем ве аранжировке. У бу э 1997-муьн сал.

— Чуь офиренуьше везифегьо гьисди ишмуре?

— И пушогьо ме гуьрд сохдем чуькле трио. Иму хьозуьр сохдейм е ченд мэгlни эз мэгlлуьмлуье мэгlнигьо э инструментальни гьово. Э унжо деруьт Виталий Габрилян (кларнет), Беня Гранд (гитара), ве ме, эн ишму муьдибирегор гъуллугъчи (клавишнигьо). Десде иму «Нээмот» миёв эки ишму э межлуьс, эри чуьки шор сохде гъуногъгьоре.

Вожиблуьи – эри чуь бу шоре гъозиегьо э кифлетгьо жугьургьой иму!

— Амэн! Худо разии ишмуре эз нумине хундегоргьой иму эри зиёдгуьзелие мэгlни ве войге сохденуьм келе офиренуьше барасигьо! Гьово музик гьеммишелуьги!

Нуьвуьсди Стелла Давыдова

Тержуьмесох Ильканаева И.