Хьэйронлуье героиня иму Далия Дадашева – сенигlэткорлуье архитектор. У лап хосдени кор хуьшдере, ве гене у дуьлтижи дошдени гьемме жугьури дин-гlэдотгьоре ве гуьнжуьндени муьгьбетлуье коре э веровундеи гъонунгьой Туро, мерэгълуьи э торих гъумолет хуьшде, лап хуб дануьсдени уре, нуьвуьсде девронгьоре дорени у э дес екигегьо. Э товней гьемме и – мерэгълуье ихдилот иму.
— Гъумолет ишму Дадашевгьо – лап мэгlлуьмлуьи, гъэдими. Ихдилот сохит э товун эну пурлуь.
— Эри, и гьечуь гьисди. Лугъот оморени э товней мэгlлуьмлуье гъумолет жугьургьой догъи, коминики бинегьой хуьшдеревоз эз Дербенди. Суьфдеи эз Дербенд эз гъумолет Дадашевгьо кучмиш бири келеи келебебей эн ме Манашир Дадашев. У бу лап гlошире одоми. Уре бу онгурбогъгьо, мере мэгlлуьми, чуьки у бу севдегер 2-муьн гильдие.
Манашир-ага бири бирорзере Натан, кук Рувин бен Ягу (1780-1850), коминире хьисоб сохде биненорегор гъумолет.
Дуьимуьн нум эну – Ага-Дадаш (дадаш – гlуьзетлуье нум, коминире доренуьт гlошире одомире ве гlуьзетлуьи э жэгlмет). Дирте гьэгъигъэт гье и бедел нум вегуьрде омори э фамилие. Ве хэлефгьой Рувина бен Ягу енебуге Ага-Дадаша бисдоруьт Дадашевгьо.
Дануьсденуьм, чуьки Ага-Дадаше (Рувина бен Ягу) бири пенж гlэилгьо, оммо гьемме гlоширире у гьишди эри келеи кук, Натан. Оммо у, э нубот хуьшде бэхш сохди гьемме мол миросире э гlэрей бироргьо ве э гьерки эз кифлет, э гъэд коминигьо бири келеи келебебей эн ме Манашир, бирорзерей эну. Угьо дануьсдет гlоширире серзиёди сохде, омборте сохдеи хоригьоре э дигьбон Нюгди (Мюшкюр) э куьнди Дербенд. Э гье и хоригьо бири угьоре онгурбогъгьо, емиши богъгьо ве дунеи сэхьрогьо.
— Менфигlэтлуь…
— Эз идорей дошдеи когъозгьоре э 1902-муьн сал э иму мэгlлуьм бири э товун, чуьки серворлуье ичкуи завуд Дербенд бири эн Манашир Дадашев, э мол бири веноре оморе гуьнжолуье марка. Эз кимигьо бире гъозиегьо, у нушу доре, чуь коньячни завуд №13. Дирте, Дадашевгьоре бири дуь завуд: шороб-водочни ве коньячни ве жэгlгири артель «Рубас» э Каспийски дерьёгь.
Эз гофгьой гъовумгьой ме, келетегьой иму э киро вегуьрдет пароходгьо эз фирма «Кавказ ве Меркурий», э коминигьо овурде омори вокурдеигьо молгьо ве више.
Э у вэхд, эз Догъисту гирошди мэгlлуьмлуье эвруьшуьмие рэхь, чуь параменди сохди буёгъведешендеи, гъосут комини бири ведешендеи ранггьо эри мол ранг зере. Гъовум иму гlошир бири э гуьнжо овурдеи тозе ранг очугъэ-кову, коминигьоре дешенде омори э русму эри хьозур сохдеи холинчегьо. Дадашевгьоре гьеммейки хьисоб сохди миллионергьо, оммо угьо гьич фурмуш не сохди э товун несиет цдаки. Келетегьой иму мисвое коргьо сохди, э жугьурие мигlидгьо расунди э шегьер гlэребегьоревоз хурек, дори бэхшгьо косибгьоре, кумекии сохди э жиизевоз косибе гlэруьсгьоре.
Гьемиге дануьсденуьм, чуьки э гъовум иму бири гlошире севдегергьо, комигьоки бирет бэхшвегир э вокурдеи омборте вокурдеигьо э Дербенд, угьоревоз бири вокурде оморе нумазгьо ве ешивегьо э Иерусалим ве Догъисту. Омборе вокурдеигьоре бэхширет э шегьер, меселен, вокурде оморигьо э 1869-муьн сал нумаз э 1-муьн Комендатский куче (дирте куче Канделаки). Э гъовум ме гьемиге бири омборе рабигьо. Меир Ицхак ве Илиягу Дадашевгьо бирет э сервори дербенди ешиве «Томхей Тмимим». Э товней эну ихдилот сохде омори э книг «Хасидгьо: Хилоссохи. хэлгъ хуьшдере» Угьо хуьшдере гъимиш ние сохдени хуте сохдет бине хасиди э нумаз оморегоргьоре, кейки хуьшдени гоф «хасид» бири гъэдэгъэдоре. Э гъовум ме, эз севдегергьо бэгъэй, гене гьисди нуьвуьсдегоргьо, шогьиргьо, математикгьо, духдиргьо, торихчигьо, архитекторгьо. Келебебей ме эз лой бебе Борис Дадашев нуьвуьсди раче дестонгьо ве бири сэхьиб жирелуье оперни сес.
— Имуре воисдени омборте дануьсде ве э товун деде-бебе ишму.
— Михаил Борисович Дадашев, бебей ме, хьэсуьл омори э Москов, варасунде бегьем сохди Москови хьуькуьмлуье университет хуреки молведешендеи нум Ленин. Сервори сохди э жирелуье цех э кондитерски фабрике «Рот Фронт». У гьисди сэхьиб инженери жире-бе-жирее коргьо ве екиге фикиргьо, гьемиге уре гьисди патентованигьо гуьнжо овурдеигьо, параменди сохденигьо кондитерски отрасльгьоре. Инженери гены, муьгьбет эки чертежгьо ме мироси вегуьрдем эз у!
Дедей ме, Ирина Марковна Дадашева (Хейфец), — Эшкенезие жугьур. У хьэсуьл омори э Москов, лап хуб варасунде бегьем сохди школере ве РЭУ нум Г.В.Плеханова. У кор сохди э сенигlэткори хуьшде те хьэсуьл омореи гlэилгьоре, песде бири хозяйке хуне ве деде. Э дин-гlэдот жугьури зен – гье у Хуне. Деде гуьрд сохде шобботгьо, сохдени афрашат-хала ве хуте сохди имуре э хэгьеревоз э серворлуье зенуне несиетгьо.
— Э Кавказ бирейт?
— Хижолети доренуьм, оммо не бирем. Лап воисдени рафде. Келедеде эз лой бебе, Яфа, зу мере огол зери рафде э жигегьо торих гъовум иму. Оммо гьеле не дануьсдем офде эри эну вэхд.
— Ишму гье генешки омбор хубит, чуьки дошдейт гьеммере э товней келетегьой хуьшде, э товней куьндлуьегьой ве имбуруз дануьсденит ихдилот сохде уре э екигегьо дошде ведировунде эри торих. Гоф сохим э товней ишму. Чуь кор сохденит имбуруз ве эже?
— Вегуьрдем хьэвес келетегьоре э зиёдсохи худо борухо сохде вокурдеигьо, ме э зир рэхьбери Любавичски Ребе э Уруссиет, раби Исаак Абрамович Коган, бирем бэхшвегир, чуьтам архитектор, э тозеден вокурдеи Келе Любавичски нумаз э Витебск. Гье у жирелуье объект, э коминики мегьр сохди Марк Шагал, теклуье мэгlлуьмлуье эри ме нумаз, э коминики гьисди рэхь эри дарафде Машиаха.
Гьмме детальгьо интерьер сохде омори эз шекуьлкеширеигьо Далия Дадашева, гьееки биму ве амуд-хазан, эже э бине пластически гъэрорноме дегешди онгури тегьенг, чуь нишон, коминики Туро бирмундени чуь нишон мейвохьэсуьллуьи худо борухо сохде хори Исроил.
Э эхир кор эсер нумаз, сенигlэткорлуье тилисим поисди э дигьбон Любавичи, эже гьисди нисе бирение гьово мугъгъэдес ве жуни шолумивенгени. Э Оэле унжо битехьэим сохде омори дуь Любавичски Ребе: сеимуьн (Цемах Цедек) ве чоримуьн, раби Шмуэль Шнеерсон (Маараш).
Э и худо борухо сохде хори ме э рэхьбери раби Исаака Когана фикир сохдем ве вокурдем кампус эри ешиве, коминики гьейсэгlэт э кор венгесде омори. Гlэжоиблуье, чуьки э гье и нумазевоз тенг бесдеи торих зиндегуни гъовумгьой ме эз лой деде. Келеи келебебе Авраам Израилевич Хейфец, хьэсуьломорегор Орши, рафдебу э и нумаз, раби комини бири э у вэхд Шмарьягу-Лейб Янкель Медалье. Песде, куьндлуь эки 1930-муьн салгьо, у омори э Москов ве рафди э Хоральни нумаз, эже э у вэхд гье гене бири раби эз Витебск, Медалье. Екиге бедел гъовум Хейфец бири эз мескен э Могилевски улке: э жигегьо Любавичи, Могилевичи ве Славное. Гьемме и гьевелине, дорени очугъэтегьери варасиреи, чуьки Офирегор эри чуьниге овурди имуре э Любавичи, эже ме бирем бэхшвегир э вокурдеи кампуса ешиве, эхи Гиля Хейфец, гъовум эз лой деде, бири э Любавичгьо вокурдегор.
Имбуруз ме кор сохденуьм э нумаз э Келе Бронной эки раби Исаак Коган, гьисдуьм серворлуье архитектор. Э гье и вэхд иму омборе кор дануьсдейм сохде. Э хотур чуьки кор сохдеи ве шинох биреи э Исаак Абрамовичем, ме дануьсдем дес расире э вокурдеигьо Худо борухо сохде объектгьо, эз товун чуь лап разилуьи хуьшдере уре нушу доре!
— Эз ки гуьнжои кифлет ишму?
— Мере гьисди келеи хэгьер, Хана Дадашева, гьемчуьн архитектор. У нушу дори мере муьгьбет эки офиренуьш ве сенигlэт. Лап бежид вегуьрденим дуь эекиревоз проектгьо, меслэхьэт дореи дуь э екиревоз, эзу товун ки фикир сохдеи иму зиёдгуьзели нехэбереки гъисмет бире. Иму гуйге гоф сохденим э е пластически зугьун. Гьемиге ме овурдем уре эки проект э Витебск. Воисдебу, эри чуьки гьерки эз иму дес расире эки мугъгъэдес, эзу товун ки гье у дузовне дес расире эн гъумолет иму Хейфец.
— Чуь жирелуье хосиет вегуьрдейт эз мироси деде-бебей хуьшде, чуьтам фикир сохденит?
— Гурунди гьечи э хуьшде бил зере ве жейле сохде – чуь эз кини. Гьебелки, эз гьерки кем-кем.
— Комини вуз ишму варасунде бегьем сохдейт, эйчуь вихдейт гьэгъигъэт гье и сенигlэте?
— Ме варасунде бегьем сохдем Москови архитектури институт (МАРХИ) э гъирмизине дипломовоз ве ме вегуьрдем сенигlэт архитектора, бегьем сохдем магистратуреи диссертацие ве нуьвуьсдем жерге гlилмие статьягьо. Те МАРХИ ме варасунде бегьем сохдем лап хуб Москови хьуькуьмлуье институт дизайне ве технологигьо (МГУ ДТ). Э сенигlэт вихдеи разилуьи сохдем гъонунгьо Туро гуьро ве варасирем гьемме вожиби гуьнжуьндеи, сергуьрде эз суьфдеи книг Берешит, э комини ихдилот сохде оморени, чуьтам Офирегор хьэсуьл овурди гlуьлом эз гьичиш. Чуьтам гуфдири 7-муьн Любавичски Ребе Менахем Мендл Шнеерсон: «Э вокурдеи гъэлебенд, архитектор нисе корисохде э войге хуьшде, оммо бемзери сохде э плангьоревоз ве чертежгьоревоз, ёгъинире дануьсдеи, эже мибу дуьруьжде утогъ, ве эже – дер э утогъ. Гьечуь ве Худо, э гуьнжо овурдеи гlуьломе, бемзери сохди э Туроревоз». Эзуш бэгъэй, э гъумолет ме, эз лой деде ве бебе, бу архитекторгьо ве вокурдегоргьо.
— Очугъэтегьер. Эйчуь муьгьбетлуьит сенигlэт хуьшдере?
— «Офде кор э жун гуьро ве е рузиш кор ни сохит!» — гуфдири Конфуций. Белкине, сес доре нисе э хасиди гуьро, оммо кор сохдени. Архитектура эри ме – гье и неки сенигlэти, комини хуте сохде, чуьтам вокурде бун э зеверсер. Гье и жерге офиренуьш э темизе нушудореиревоз. Вегуьрденуьм хошвегири эз гуьнжуьнде оморе кор хуьшде! Кейки туь дануьсдени винире параменди проекте, эз суьфдеи вохурдеи э хогьишидорегоревоз ве шекуьлкеши тапшуьрмиши э гофсохи э уревоз те эхир вокурде бараси. Минкинсуьзи гофгьоревоз бирмунде и гьис, кейки туь суьфдеи бо вокурдени дергьо хуьшдени вокурдеире ве э ёр овурде суьфдеи шекуьлкешигьоре ве десхати эскизгьо э когъоз.
— Чуь четини гьисди э гьейсэгlэти кор ишму? Э комини четинигьо вохурденит э уре веровундеи?
— Э хотур эну, чуьки омборе сал ме кор сохденуьм э нумаз Бронной э рабиревоз Исаак Абрамовичем Коганом, варасиренуьм, чуьки э гьер рузевоз э гьер кор вокурде оморени хьохомлуьи Офирегор, ве туь сергуьрдени винире муьгlуьжуьзигьо э иловлей хуьшде.
Весси ёровурдеи, чуьтам ме шинох бирем э рабиревоз. Оморем, пушоки нуьвуьсде омореи, э вохурдеи руй-бе-руй. Поисдем эки дер «770». Нехэбереки шиновусдем гофсохи, чуьки Исаак Абрамович гешдени архитекторе эри нумаз э Витебск. Ишму варасирит: гье у нумаз, э комини рафдебу келебебе, хьэсуьломорегор Орши Абрам Израилевич Хейфец. Ме у вэхд фикир сохдем и гьисди нишон, чуьки ме э герекие вэхд ве герекие жиге оморем. Ве гьемме, чуь межбур бири э мугъгъэдес ве рабиревоз Исааком Коганом, э нумазевоз, не бире четин, гирошдени шор ве разилуьи хуьшдере нушу доре эки Офирегор.
— Эз чуь ведешенде рачире ве хьэвес? Ишмуре хоши вегуьрде, чуьтам имбуруз параменди бире Москов, шегьер иму, э архитектури фикир гуьро?
— Мере хьэз оморе гьемме бигlэдотлуьегьо. Эгенер вокурдеигьо – гье нис ижире, эри чуьки угьоре поюнде э е жерге э екигегьоревоз.
Муьгlуьжуьзи, оммо э гуьнжо овурдеи офиренуьше гlуьломвиниреи э архитектуре корисохи архитекторгьо-деконструктивистгьо, бине коминигьо гьемиге межбури э ёгьудииревоз. Гье у Даниэль Либескинд ве Фрэнк Гери (Эфраим Голдберг), гьемиге Питер Айзенман. Хьэвеслуь биренуьм ризгьой э тебиет, хьэз оморе театргьо ве бирмундеигьо. Гьич вэхд не дануьсде, эже офде мибу ведибирение очор, комини песде э герекие вэхд веди мибу варасиреи ве норе миёв э бине гье у енебуге екиге архитектуре, эхи иму дениширеним э гlуьлом чумгьоревоз нуьшбиреи культуре…
Нуьвуьсди Яна Любарская
Тержуьмесох Ильканаева И.
Сирот: STMEGI
