27-муьн ноябрь, гирошди пенжимуьн дузе риз серворе Догъисту Сергее Меликове.

Рэхьбер республике жугьоб дори э пуьрсуьшгьо зигьисдегоргьо э тегьер гьэгъигъэтлуье вэхд.

Э вэхдгирошди дуь орине руйбиреигьой хуьшдере догъистунигьо фуьрсори э портал «VoprosGIaveRD _bot» э миллетлуье мессенжер MAX.

Гьемме э дузе эфир омори эки дуь гьозор пуьрсуьшгьо, омборе гъэдер эз зигьисдегоргьой Махачкале, Цунтински районе, Каспийске, Дербенде, Ахтынски районе.

Догъистунигьоре бежид дуьлпесои пуьрсуьшгьо ЖКХ, хорие-девлетлуье гъэножогъигьо, хубе рэхьгьо, кумекии дореи бэхшвегиргьоре СВО, хубте биреи хунеие иловлере ве дошдеи жунсогъире.

Э тегьер видеоконференцбесдеи рэхьбергьо идорегьо веровундение хьуькуьме гьемчуьн бири хьозуьр жугьоб доре э ёгъинлуье пуьрсуьшгьо ве гъобул сохде гъэдэгъэгьо эз рэхьбере регионе.

Бирмунденим, чуьки э гьевелие сал э хотур чуьки руйбиреи э дузе риз э гуьнжо овурде омори гъэрор норе омборесалине четини зигьисдегоргьой хэребеие хунере э Южно-Сухокумске, кумекии доре одомигьоре э нечогъигьоревоз, э дермуие дореиревоз, жугьоб дори э дуьлпесое пуьрсуьшгьо.

Э и сал дузе риз Сергее Меликове гирошди э Музее гъовхоие гIуьзет.

Э сал гъэлхэндчи Ватане ве 80-муьн сали Барасире э и хуне э гъэдэгъэи серворе Догъисту гировунде омори дуьруьжде тозеден э хуьшде дировундеи.ЖэгIмие мейдун комплексе зевер бири э 2,5гиле- эз 267 те 872 кв.м. Гье у гьишди э гуьнжо овурде жейлее бирмундеие жигегьо – гъосуьтлуье бирмундеигьо э товун Афгански гъозиегьо, СВО ве серхьэдие гъуллугъсохи.

Эзуш бэгъэй э гуьнжо овурде омори гьеймогьоине конференц-зол, эже имбуруз кучмиш бири жэгIметие корсохгьо, сенигIэткоргьо, бэхшвегиргьо СВО, кифлетгьой эн угьо, угьо, ки гьеммише рафдени э жиге СВО э хушхьоле кумекииревоз.

Э пушой сергири дузе ризе Сергей Меликов фегьм сохди бирмундеигьо музее.

Э корисохи вокурде оморе меслэхьэти Сергей Меликов бодо доре эхиригьо Сале гъэлхэндчи Ватане, ихдилот сохди э товун бинелуье барасигьо рафденигьо сале.

«Гье у бири сал боворини, сал еклугъи гьеммей зиёдгъувотлуьигьо ве сал, кейки иму э нуботлуье гиле варасиреним, чуьки имуре нисе барасире берде, чуьки иму гьеекиним, чуьки иму боворин дингьой эн имуре, боворин ёргири буьзуьрге гъозиегьо, эз комикигьо гирошди вилеет эн иму»,- гуфдири сервор республике.

Э ёр овурденим, гьемме э везифе корисохигьо, комики гIуьзет сохде мигIидлуьи 80-муьн сали Бараси э Келе довгIой Ватани ве Сале гъэлхэндчи Ватане, дарафди 127 беделгьо. Омборе корисохигьо уже гировунде омори, коминигегьо мибу веровунде те эхир сале.

Э гьемме Догъисту гирошди жуьр-бе-жуьрелуье дуьруьжде корисохигьо: акцигьо, бирмундеигьо, гуьрдлемегьо, спортивни бэхьсгьо, нушудореигьо. Вокурде омори чигьретгьо ве сенгъ ёровурдигьо э номус келетегьо Келе довгIой Ватани ве бэхшвегиргьо СВО. Бэгъдовой тозеден э хуьшде дировундеи тозеден сохди коре Музее гъовхоие гIуьзете, дофус зереи книггьоре, комики гIуьзет сохде игидгьоре-догъистунигьоре.

Э сал гъэлхэндчи Ватане доре омори омборте 282,9 гьозор социальни гъуллугъгьо эки 7 гьозор кифлетгьой лешгерчигьоре. Жирелуье тигъэти доре оморе кифлетгьой бэхшвегиргьой СВО. Фирегь гирошди акцие «ГIэжелсуьзе лешгер» ве екейгегьо ёровурдие войгегьо: автовирихигьо, бирмундеигьо вокурдеи сенгъгьой ёровурди ве Рэхьгьо ГIуьзетлуьи.

Э тигъэти кор э жовонгьоревоз: гировунде омори эки 100 дуьруьжде гъозиегьо э дешендеи омборте 400 000 одоми. Гье у лешгерие-спортивни возиреигьо, гешдеи гIилмигьоре, мигIидгьо, бирмундеигьо, корисохигьо э иловле ватанхогьие тербие дореи ве екейгегьо.

Сергей Меликов эрзо нуьвуьсди гьемчуьн э товун гуьнжолуьи хэберлуье рэхье эсер гуманитарни кумекии. Гьер воисдегор мидану кумекии доре лешгерчигьоре э пушолуьи енебуге шолумие зигьисдегоргьоре тозе ве эки серхьэдие районгьо. Инжо гIэмел миёв дануьсде, чуьтам фуьрсоре овгъотгьоре, эже гъобул сохде парталгьоре, чуь гереки лешгерчигьоре. Эзуьш бэгъэй, э сайт гIэмел миёв фегьмгери сохде, чуьтам шелгьоре овурде расунде ве ченд гъэдер гумкумекии кучмиш сохде омори.

Э гъэд дузе риз э войгей нум нореи еки эз Самурски гъугъ догъе э номус догъистуни – суьфдеи Игиде э СВО Нурмагомеде Гаджимагомедове руй бири корсох СенигIэткорлуье несиете догъистуние беделе Уруссиетие географически жэгIмете Залине Шарифове.

«Е жиреш четинигьо нисе виниренум»,- гуфдири Сергей Меликов ве э пушо нори ведеберде гье у пуьрсуьше э нуботлуье гуьрдлеме региональни беделе РГО.

Сервор регионе дори жергей гъэдэгъэгьо рэхьбергьоре идорегьо хьуькуьме. Э у гъэдер серворе шогьнишоне – вегуьрде э фегьмсохи пуьрсуьше эсер хуб сохдеи екире эз хьэётие е гъэдер мескене э куче Лаптиеве.

Сергей Меликов эрзо нуьвуьсди, чуьки э гьеммей хьэётие жигегьо, эже зигьисде нисе виниреие одомигьо, мибу доре гъэдэгъэгьо рэхьбергьой муниципалитетгьоре.

Вогьне бири пуьрсуьш зигьисдегоргьой екире эз хунегьо э Махачкале, эже зигьисде одомигьо, комикигьо нисе винире. Хьэёт эн угьо гьисди э зобуне овхьолет.

Сергей Меликов ихдилот сохди, чуьтам э Догъисту гъэрор норе четинигьоре ЖКХ. Гьусо рафди э товун еклуьги жейлее объектгьоре, гуьнжолуьи хьуькуьм идорегьоре, э кор венгесдеи омборе вэхде программегьоре э коргьой энергодореигьо.

Сергей Меликов гъэдэгъэ зери э дорун кор расире э войнегьо ве песшендеи угьоре, гуш венори догъистунигьоре, комики вохурди э четинигьоревоз дешендеи хунегьой эн угьоре эки газе, не денишире э гьисдигьо руьхсете когъозгьо.

Жейлее гъосуьт – овхьол муниципальни рэхьгьоре. Бэгъдовой руйбиреи эки сервор зигьисдегоре Хунзахски районе пуьрсуьш гъуьчсохи авторэхье Мочох – Очло э Хунзахски районе мибу фегмсохде.

Зигьисдегор Махачкале бирмундеи тигъэте э муьлк эки рэхьгьовуние гирошдеи эки чаруьсдеи э Тюбе. Инжо эз дуь лой чор ризе куьтэх сохде те дуьдуь ве э гуьнжо овурде омборе гъэдере мошингьоре. Сергей Меликов мэгIлуьм сохди, чуьки гьеммей рэхь эз Герзель-Ауле те Яраг-Казмаляре, э у гъэдер ве гье у муьлк, мибу гировунде э чор ризе. Эки гъирогъ Березке э Махачкеле рафде дуьруьжде вокурдеи рэхье эки порте. Э Махачкеле зигьисдегор мерэгълуь бири мибу у хьуькуьмлуье ве мидануь уре э кор венгесде гьемме зигьисдегоргьо. Сергей Меликов эрзо нуьвуьсди, чуьки рэхь мибу вокурде эри гьеммееки, у хилос мисоху кучегьоре, е жиреш дегмиши дешенде везифе нисе нори.

Э гъэд гъэдэгъгьо – кумекии доре зигьисдегоре Карабудахкентски районе эри вегуьрдеи шуькестие коляскере; э кор венгесде пуьрсуьше зевер биреи жэгIмиетие транспорте э куьндигьо шегьер Махачкале, тозеден э хуьшде дировунде куьгьне вокзале эки бархане Сарыкуьм ве омборе екейгегьо гъэрорномегьо.

Э бегьем сохдеи дузе ризе эки Сергей Меликов руй бири геде, комики мэхшево сохде э товун очугъэ тозесалине мигIид.

«Гъэдэгъэ зенит, эри э Догъистуние гIэилгьо гьемите дануьсде шори сохде э Тозе салевоз э гьемме шегьергьо ве районгьо. Гье у мигIид рэхьми, кейки шори бире гьеммей кифлет – неки гIэилгьо, оммо ве бебе, ве деде, келедедегьо ве келебебегьо»,- хосди кук.

Сергей Меликов жугьоб дори э хогьиши: «ГIэилгьо дузи. Э тозесалине мигIидгьо не биё бу жиге эри дуьлмогъбули. Ме имид биренум, гье у руйбиреире шиновусди гьемме: биёйт э гуьнжо биёрим эри гIэилгьо мигIиде! Биёйт бэхширеи угьоре темизе, товушлуье, шоре ве секонесуьзе Тозе сал! Биёйт кумекии дим гье у гIэилие хогиши ве сохим и Тозе сале, не денишире э гьемме четинигьо, раче, шорие ве бэхдлуь!»

Дузе риз э Сергеевоз Меликовоз дураз кешири се сэгIэт. Э песой гье у вэхд сервор регионе жугьоб дори э онлайн – жире экуьнди 40 пуьрсуьшгьо. Э жиге у дори гъэдэгъэгьо э омборгьо эз угьо рэхьбергьоре идорегьой хьуькуьме. Руйбиреигьо, комикигьо нисе сес сохди э вэхд эфире, ёгьин мибу фегьм сохде ве вегуьрде жуьгьобе.