У не зигьисде э жирее тегьеревоз, оммо гьеммише э рэхьберисохи дуьлевоз. Ве у уре гьич вэхд нисе фурмунде. Уре дуьлпесои не доре, чуь фикир сохде екигегьо, у лап асант сохдени кор хуьшдере. Эз гьемме келе пэхьнии бараси дери э гье у чуь е жиреш пэхьнии нисди, гереки энжэгъ кор сохде гъирьетлуь. Черх мерэгълуьигьой эну фирегьи, оммо, чуь ми у не сохдени, э гьемме гьис сохде бедел жун эну. Шинох бошит: Луиза Беньяминова.

– Ихдилот сох эри хундегоргьой иму, эже туь хьэсуьл оморей, эже э комини школе хундеире вегирдей, эже имбуруз зигьисдени? Чуьни эри туь варасиреи «Чуькле Ватан»?

– Ме хьэсуьл оморем э гъэдимие шегьер Уруссиет – Дербенд. Кейки ме бирем дуь сала, иму э кифлетевоз рафдейм э Москов, оммо гьер гьеминон иму э бирорево гировундейм э Дербенд эки келедедегьо – гье у гьисди эз гьемме зиёдгуьзелие ёрбиёри гlэили: дерьёгь, емишгьо, гъовуме одомигьо, возигьо ве хэнде. Гьелбетте, Дербенд – гьисди чуькле ватан ме. Оммо ве Москов эри ме – муьгьбете ве гlэзизе шегьери. Ме зигьисденуьм э Москов эз гlэили. Ве гlэили богъче ве школе ве университет – гьемме э инжо бири. Ме не виниренуьм зиндегуни хуьшдере э екиге шегьер – инжо ме гьемме дануьсденуьм. Лап муьгьбетлуьи гье и зиёдгуьзелие шегьер.

– Эзжеи гъумолет деде-бебей туь, эзжеи келетего? Гоф сохденуьт ми э кифлет туь э зугьун иму э жугьури?

-Деде-бебей ме эз Дербенди, дедей дедей ме — эз Баку. Э жугьури гоф сохди келедедегьо ве келебебегьой ме, деде-бебей ме. Оммо э кифлет ме екиш гоф не сохде, э келе гъимиши эн ме. Ме кими вэхд варасиренуьм, кейки э ки ме руй биренуьт э жугьури.

– Э комини зеверие соводие идоре хундей? Эже гьейсэгlэт кор сохде? Жирей корисохи туь?

– Сенигlэт ме психолог. Кор сохденуьм ме сервор келе гипермаркет, барасигьо гуйге дуьруьжд нисди, оммо гьеммере хуьшдени ме те эхир бегьем сохдем.

– Сервор гипермаркет – гье и лап жугьобдорлуье кори. Чуьтам веровунде туь и коре?

– Межбур бирем веровунде. Чуьтам гуфдиренуьт, чумгьо терсирени, десгьо сохдени. Гье у асанте кор нисди ве, гьелбетте, ме гье бирден оморе э ме не дори и жигере. Гье и бу дуразе ве гьинорменде жофо, вожиблуьи боворини э хуьшде. Бири вэхд форигъэтиисуьз межбур бирем рафде эки гъосут хуьшде. Омборгьо э ме бовор не сохди. Оммо э гье и бараси ме не поисде. Командей ме ве гьелбетте муьгьбете духдер ме, гьеммише э меревоз.

– Гьисди ми туьре мерэгълуьигьо?

– Э азадлуье вэхд, гъэрезки мере лап кем бире, ме гьерчуь бисдо э гуьнжо овурде. Гlэмел миёв гуфдире, э гьр сфере корисохи гlэмел миёв гьерчуь бисдо э гуьнжо овурде)))) Гьер зен э гуьнжо овурде э хурекхоне, оммо гьер зен уре не дануьсде веровунде. Ме гьемиге дануьсденуьм, кейки мере гьисди хьэвес, э дуь сэгlэт духде менфигlэтлуье партал.

– Ихдилот сох э товней духдер хуьшде.

– Духдер ме – гье у текебури ме! Расди, уре хьэз не оморе, кейки э товней эну гоф сохде – гьич вэхд ве э е жигеш.

– Чуьтам туь фикир сохде, бовори ве дин-гlэдот кумекии доре э одоми э четине зиндегуние синемишигьо?

– Белкине, кимигьоре э зиндегуни у кумекии доре, оммо ме бовор сохденуьм энжэгъ э хуьшде ве э духдер хуьшде.

– Ме дануьсденуьм, чуьки туь омбор хундени книг. Комини жире эдебиет туь вихдени?

– Хунденуьм бинелуь гlилмлуье книггьо. Гье у гьисди книггьо психологие ве рэхьбери. Художественни эдебиет ме не хунде – э зиндегуни иму э гьечиревоз овосунегьо омбори.

– Кини серворлуье эшгъдорегор э зиндегуни туь?

– Эри ме эз гьемме вожиблуье одоми э зиндегуни бу бебей ме, Виталий Беньяминов. Гъэрезки у зу рафди эз зиндегуни, оммо У ГЬЕММИШЕ э меревози, э мошин э меревоз сирот энуни. Эри ме у гьеммише зуьндеи.

– Комини музыке туьре хьэз оморе гуш дошде? Ве межбур бирени ми эз хьол туь?

– Музыке руьхсет дорени гешдеи эз инжо э унжо э гьер вэхд зиндегуни, ве гьелбетте, у межбури эз хьол.

– Комини се бинелуье хосиет туь гъимете верзуьнде э одомигьо?

– Очугъи, инсоньети ве дузгунлуьи. Гье и се хосиет, комигьо гьеймогьой вохурденуьт лап сейреки. Мере лап тенге черх шинохгьои – гьэгъигъэт эзу товун, чуьки ижире одомигьоре лап четини офде.

Нуьвуьсди Стелла Давыдова

Тержуьме сохди Ильканаева И.