Меслэхьэт сохденки э журналист эн «КП» э Валентин Алфимовевоз сервор республике ихдилот сохди э товун параменд сохдеи экономикей Догъистуре, э товун э кор венгесдеи социальни проектгьоре ве ихдилот сохди э товун плангьо эри биевгьо.

Журналист гуфди, ки Догъисту – асанте регион нисди, оммо вегуьрде оморигьо рэхь эри параменд сохде республиккере кор сохдени. Валентин Алфимов хосди эз рэхьбер субъект гировунде суьфдеи артгьоре.

Сервор регион риз кеши, ки у нисе норе везифе гировунде артгьоре эри гьеркоми бисдо вэхд.

«Гьисди егъинлуье вэхд, комиреки тогIин сохди Конституцие ве президент – вэхд кор сохдеи. Кейки и вэхд бегьем сохде миев, ини умогьой, гьебелки, герек мибу гировунде артгьоре. И расирени э кормеш. Эгенер иму гуфдиреним э товун артгьой эну везифегьо, комигьореки иму имбуруз э кор венгесденим, э унжош гьисди униге вэхдгьо. Гьери, меселен, э 2022-муьн сал иму хьозуьр сохдебирим план эн социально-экономически параменд сохдеи Республикей Догъистуре те 2030-муьн сал. Ве омбар гьемме гъэдергьой эну, э комиревоз иму имбуруз рафденим, пенжсалине вэхд гуьнжолуь нисе бире. Эзу товун ки и кутэхьэ вэхди эри э кор венгесдеи угьоре, ве лап омбаре четинигьо очугъ бирени э вэхд гъэрор сохдеи везифегьоре, комигьореки иму норейм», — гуфди у.

Омбаре проектгьо, э гофгьой эну гуьре, имбуруз гьеле эдее э кор венгесде оморе ве кор сохденуьт эри омбаревэхдине минкингьо.

«Иму лап хуб варасиреним, ки догъистонигьо ни дануьт рази бире э имбурузине энергорасундеиревоз ве э овхьолет хунелуье-коммунальни хозяйстворевоз. Иму нисе дануьсденим себэхь гуфдире, ки шев иму гьеммере мидим, оммо у пойнореигьо, комигьореки иму сохдейм, бирмундени, ки иму э имбурузине руз э сер эни фуьрсоре пуьрсуьшгьо кор сохденим», — диеш гуфди сервор регион.

Э сугьбет Сергей Меликов ихдилот сохди э товун чорегьой гъувотдореи лешгерчигьоре э республике.

Журналист бирмунди буьлуьнде хэйрлуьи э гуьнжо овурдеи кумеки дореи лешгерчигьоре ве кифлетгьой энугьоре э регион.

«Лап вожиблуьни, кейки лешгерчи боворинлуьни, ки уре герек нисди э песово чаруьсде эри эну, чуьнки гье евэхди э гъовхолуье везифегьоревоз гереки гъэрор сохде гьеле ве коргьой хунереш. Эри лешгерчи, эри офицер, комики гъовхо бердени, вожиблуьни, чуьнки кифлет эну гъэлхэнд бу, чуьнки пуьрсуьшгьо, комигьоки ологълуьни э гIэилгьоревоз, келете бебе-дедегьоревоз, э гьовумгьоревоз ве куьнде одомигьоревоз, гъэрор сохде биев, тейте у веровундени гъовхолуье везифегьоре. Гьемчуьн вожиблуьни, чуьнки ве одомигьош, комигьоки вир сохдет е теке дошдегоре, гьемчуьн тигъэтсуьз немунут»,- гуфди сервор регион.

Эри кумеки сохде э лешгерчигьо ве э кифлетгьой энугьо э республике э гуьнжо овурде омори фонд «Гьемме гьееки». Бежид гировунде оморени вохурдеигьо э гъовумгьой эн пуч биригьо лешгерчигьоревоз, сервор регион гуш дошдени руйбиреигьой энугьоре ве э жиге дорени гъуллугъ рэхьбергьой ведомствогьоре.

Э радио пуьруьш сохде омори гъосуьт венореи нишоне э лешгерчигьо эз Догъисту ве Кавказ.

«Гьисди одомигьо, комигьоки сохденуьт гъонунепузмишигьо, оммо ве гьисди ве угьо, ки хилос сохдени эз жилиде гIов батмиш биренигьо одомигьоре э Нева, ки гуьрдени гIэиле, офдоригьоре эз 13-муьн тебэгъэ. Гьисди догъистонигьо, комигьоки бирмунденуьт хубтее жирегьой несигIэтдореи хуьшдере, ватанхогьи ве мугьбет эки Ватан э жирелуье гъовхолуье операцие», — гуфди сервор регион.

У риз кеши, ки дуз нисди гуфдире э товун кавказигьо ве эн догъистонигьо чуьн э товун коминиге еклуьги, комики гуйге гуьнжолуь нисе бире э социальни тегьергьой эн униге регионгьо. Жовонгьой Догъисту э ечиревоз сеч нисе бире эз жовоне одомигьо э униге субъектгьой Уруссиет – гьеммейкире гьисди верзуьшлуьи, кемсуьгигьо ве четинигьой хуьшде. Оммо зобуне нишон, ологълуь гьисдигьо э бирмунушие фикиревоз «сифет эн кавказски миллет», э гофгьой эну гуьре, гьеле гьисди.

Нушу доренки э «Комсомольски правде» сервор Догъисту очугъ сохди сур эн мэгIлуьмлуь гIэилие футболе э республике.

«Динамо», у футбольни клуб, комики имбуруз возирени э премьер-лиге, параменд бирени эз 1927-муьн салевоз. ГIэилгьоре гьисди э ки гереки той бире.

Бешгъэй эн торихлуье гIэдотгьо, сервор республике нум дори системни коре э Уруссиетлуье футбольни гуьрдномеревоз бинелуье гъозие зевер биреи мэгIлуьмлуьи футболе э республике. У э нишоне овурди э кор венгесдеи э Догъисту федеральни программере «Футбол э школе». «Э гьемме школегьой иму возиренуьт футбол ве гъэдер гIэилгьо-бэхшвегиргьо эн Школее футбольни лиге имбуруз экуьнди 300 гьозор одомини», — гуфди сервор республике.

Сервор регион гьемчуьн ихдилот сохди план параменд сохдеи сенигIэтлуье футболе э республике.

«ГьейсэгIэт э Догъисту кор сохденуьт дуь академие – эн Лев Яшин ве «Динамо» (Махачкала). Песде жовоне ве дуьимуьн десде «Динамо», ве десде эн футбольни клуб «Бесгъуни» (Хасавюрт), комики возирени э зофруе дивизионгьо, оммо барасилуь э пушово рафдени. Ве э зевер эн гьеммей энугьо – клуб иму «Динамо».

Пуллуье тегьер клуб, э гофгьой эн Сергей Меликов гуьре, вокурде омори э жирей хьуькуьметлуье-сэхьиблуье хьовирьети: бюджетни пулгьо фуьрсоре оморени омбар эри параменд сохдеи гIэилие футболе, оммо эри бинелуье десде ве эри транспортни политике пул доре оморени эз хьисоб эн жир-бе-жире мэгIдонгьо.

Гьер руз иму шиновуьсденим э товун игидьетигьой эн догъистонигьо. И гье у кавказски хьэвеси, несигIэтдореи ве жугьобдорлуьи э пушой республике ве эн вилеет? Э сер пуьрсуьш эн журналист сервор регион жугьоб дори:

«Сергири дешенде омори э кифлетлуье верзуьшигьо ве гIэдотгьо, э комигьоревоз несигIэт доре оморенуьт догъистонигьо».

Омбардекиш Игидгьой Уруссиет – серворгьои. Сергей Меликов риз кеши, ки доренки ижире нумгьо серворгьоре гъимет дорени оморени неки чигьрет хосиете, оммо ве барасилуь эн гъэрномегьой энугьоре ве тактически корисохигьоре.

Сирот (фото): «Комсомольская правда».