И дофусзереи гьисди зиед сохдеи гъосуьте, нуьвуьсде оморебугьо е ченд сал пушоте э дофусзереи эн Ирине Михайлове «Бедбэхде гъисмет эн бироргьо Семеновгьо». Э гIэрей бирмунде оморигьо у вэхд молгьо дебу сирот эн жовоне одоми э лешгерие парталевоз: Авнум Семенов.

Э архив ЦАМО дери мэгIлуьмети э товун эну, ве э и хьисоб извещение, фуьрсоре оморебугьо эри деде-бебе (нум дуз нуьвуьсде не омори):

«Лешгерчи солдат Семенов Авнум Савиевич, хьэсуьломорегор э Дагьистонлуье АССР шегьер Дербенд, 1919-муьн сал биренки э довгIо, нисд бири мэгIлуьмсуьз э июль 1944-муьн сал».

Дешенденки пуч биригьо лешгерчигьоре э базе даннигьо лешгерчигьо-жугьургьоре, иму э кор венгесденим гьер минкине, эри дануьсде гьеммере э товун гъисмет энугьо: эже гъуллугъ сохди, кей ве эже варасди гъовхолуье ве зиндегуние рэхьэ. Эри мэгIлуьмсуьз нисд бирегоргьо очугъ сохде ижире мэгIлуьметире четини, оммо э омбаре гъозиегьо бэхшвегиргьой эн проект НУМ ЛЕШГЕРЧИ дануьсденуьт ире сохде. Э товун Авнум Семенов – дануьсдет, ве имуре воисдени бирмунде чуьтам гировунде оморебу и кор.

Гьер хунде дануьсдеи гъисмет эн пуч биригьо лешгерчире сер гуьрде оморени эз гешдеи документгьоре э товун эну. Бежид угьо «бэхш сохде оморет» э онлайн-архивгьо э е ченд аккаунтгьо, ве бежид – э дуз нуьвуьсде не оморигьо нумгьоревоз. Гешде офдеи документгьоре э товун Авнум Семенов овурди хубе барасигьо. И бири э хотур игидьети, комиреки у бирмунди э сэхьрегьой гъовхо. Гьечи э ихдиери иму дебу дуь бэхшдоренигьо велггьо, 1942-муьн сал ве 1944-муьн сал. Фегьм сохденки угьоре, иму тигъэте чаруьнденим э сер «мэгIлуьмлуье» пенжимуьн жиге, эзу товун ки берденим миллетлуье базей даннигьоре.

Э молгьо э товун жугьургьой догъи иму вохурденим э омбаре тегьергьой нуьвуьсдеи э лешгер и графере, э и хьисоб «догълуь», «азербайджанец». Оммо э бэхшдоренигьо велг эн медаль «Эри игидьети» миллет эн Авнум Семенов нуьвуьсде омори лап дуз: жугьур догъи. Гье эзи документ иму дануьсдейм нум эн игид имуре (чуьклеи сержант), жигей коре (сервор отделение эн пулеметни роте) ве жигей гъуллугъсохи (32 гв. Стрелкови дивизие).

Ихдилот сохдеи игидьетире:

«Станкови пулемет хуьрд бири. Фашистгьо шишире диреморембируьт э сер отделение эн станкови пулеметчикгьо, эже сервор бу т.Семенов. Семенов буйругъ дори отделениере вохурде дуьшмене э винтовкегьо ве гранатгьоревоз. Лешгерчигьо е дэгъдэгъэш дир не кешире сер гуьрдуьт гулине зере э дуьшменгьо. Гьечи довомлуье пулеметчикгьо се гиле зере шендет дуьшменгьоре. Э и гъовхо тов.Семенов хуьшдени ю куьшди 14 лешгерчигьоре ве 1 офицере. Доре омори медаль «Эри игидьети».

Нуботлуье бэхш Авнум Семенове доре оморебу э 383-муьн стрелкови дивизие, дебугьо гье э у Приморски лешгер. Э сер эн 1944-муьн сал у чуьклеи лейтенант, сервор эн взвод автоматчикгьо. Гье гене е дегиши э уни, чуьтам э штаб эни дивизие пур сохдебируьт 5 графере, имогьой Авнум нуьвуьсде оморебу «татар» (мэгIлуьмлуье кор э вэхд совети, э товун миллет «тат»).

Ини ижире дегишигьоре гIэмел миев винире э серномегьой эн бэхшдоренигьо велггьо. Оммо дегиш не биренигьо мундембу бинелуьи – игидьети эн еки эз кукгьой эн кифлет Сосун ве Мирьен Семеновгьо:

«Тов.Семенов э гъовхо эри шегьер Керч 11.4.1944-муьн сал бирмунди хуьшдере игидлуье офицер. Э взвод хуьшдеревоз т.Семенов вихди рэхьэтлуье жиге ве э автоматгьоревоз нисд сохдембу жигегьой дуьшмене. Доре омори хьуькуьметлуье бэхш орден «Гъирмизине Астаре».

ШэгIм еровурдире гIэмел миев дегесунде э Зол эн нумгьой эн проект иму.

Оммо мунди бинелуье пуьрсуьш: эже ве кей пуч бири лешгерчи, хьисоб сохде оморембугьо нисд биригьо мэгIлуьмсуьз э июль 1944-муьн сал? Жугьоб э сер эни пуьрсуьш дануьсдейм вегуьрде э е орине, эже бирмунде омори жиге ве руз. МэгIлуьметигьоре дануьсдейм офде эз торих гъовхолуье рэхь эн дивизие.

Бэгъдовой барасисуьзе пушоворафдеи лешгер, э хьисоб комики дебу ве 383 стрелкови дивизие, тозеден э пушово рафдебируьт э апрель 1944-муьн сал 11-муьн апрель хилос сохде оморебу Керчь (руз ве сале иму виниребирим э бэхшдоренигьо велг, эже ихдилот сохде оморебу э товун игидьети эн чуьклеи лейтенант), бэгъдовой дуь рузиге – Феодосие. Ве песде сер гуьрде оморебу хьозуьрлуьгъи эки шишире рафдеи э Севастополь. Э песини руз рэхьэти вегуьрдеи, 27-муьн апрель, Авнум фуьрсори когьоз э хуне.

28-муьн апрель штурмовой десдегьо эн 383-муьн стрелкови дивизие сер гуьрдебируьт гъовхогьо эри Сапун-догъ, ве и гъвхо гировунде оморебу те 4-муьн май, э е рузиге бэгъдовой омбаре пучбиреигьо гировунде оморебируьт э куьнде дорун эри зиед сохдеи.

Дивизие вогошди э пушо 12-муьн май, эри шишире рафде э сер мыс Херсонес, оммо у руз ведабурра оморигьо мундигьо немецски лешгерчигьо хуьшдере э дес доребируьт. Песде 383-муьн дивизие те сентябрь дебируьт э Крым, песде рафдебируьт э Белоруссие, эже те эхир сал гьемчуьн дебируьт э унжо.

Э ижире тегьеревоз, э хьисоб вегуьрденки руз поюндеи нуьвуьсдеире (27-муьн апрель) ве руз ве сале э извещение (июль 1944) гIэмел миев офде жигере, ве руз ве сал пуч биреи лешгерчире.

Имогьой иму миданим гуфдире, чуьки сервор эн взвод автоматчикгьо чуьклеи лейтенант Авнум Семенов пуч бири э гъовхо эри Севастополь, э район Сапун-догъ, э вэхд 28-муьн апрель – 4-муьн май 1944-муьн сал.

Э план гуьре денишире оморени ки суьфдеи том эн Книг еровурди дофус зере миев э кумеки мисволуье фондевоз СТМЭГИ э пушойгофие дофусзереиревоз эн президент эну, эн Герман Рашбилович Захарьяев, комики гуфдири: «Гьердуь проектгьо – книг НУМ ЛЕШГЕРЧИ ве мигIид 26-муьн Ияр – офире омори э нум жэгIмие везифегьо. Ве ме боворинлуь биренуьм, чуьки еровурди э товун эн гьер жугьурие лешгерчи, пуч биригьо енебуге зинде мундигьо, мие дошде биев».

Нуьвуьсдегор: Александр Энгельс

Тержуьме сохди Ильканаева И.