И пушогьо рафди эз зиндегуни Илья Александрович Абрамов – одоми, коминики э вэхд гирошдеи 20 сал бири неки сервор жирее школе-интернат э Дербенд, оммо ве гьэгъигъэтлуье тилисимчи эри сади гlэилгьо, рэхьмедуьллуье хьэрмэхь эри гьеммейки, ки уре дануьсди, жун гьеркиш компание.

У хьэсуьл омори э Дербенд, э куче lll Интернационал. Деде-бебе – Александр Бенсионович, довгlо гирошдегор, кандидат хоригъуллугъсохе гlилми, сернуьш колхоз, ве Тамара Натановна, зен э келе дуьлевоз, унегуьре вихди сенигlэт духдири, — дорет уре асантесуьзе зиндегуни, оммо, эз гьемме гьевел, муьгьбет эки инсонгьо ве дануьсде офде шори э асанте чигьо.

Гlэильети Илья бу ужире чуь эн гедегьой дербенди э пенжогьигьо салгьо: дерьёгь эз себэхь те шев, гедеине возиреигьо э богъгьо, оммо лап зу у офди э хуьшде дуьлжэгlми, комини очугъ сохди гьемме зиндегуни энуре – муьгьбет эки данани.

Гьемме сергуьрди эз дуь туморе книг, гьишдигьо гьевелине сэхьиб хуне – комининиге уруси инженер-рэхьи корсох. Илья хунди гьемме книггьоре ве варасири, чуьки э у хьэсуьл омори гьэгъигъэтлуье межбурлуьи. Хунди гьеммише омбор. Деде-бебере фикир сохди, чуьки у шевгьо хисирени, оммо у пэхьни бири э зир луьхьуьф э миноревоз ве хунди книг те себэхь.

Музыке омори э зиндегуни эну э гъэршуй войге ю. Чуьтам миё бу э кифлет жугьури, деде-бебе восдори скрипке ве дори уре э хундеи э музыкальни школе. Оммо гедегьо эз бору хьэрой сохди: «Илюха, айда э дерьёгь!» — ве Илья фурмуш сохди э товней гьемме. Ки мидануьсд фикир сохде, чуьки бэгъдовой е ченд сал, кейки студент биреи, у хуте мибу возире э гитаре э дуь сэгlэт, дениширеки, чуьтам екиге геде вегуьрдени акордгьо! Войге вегуьрде данани овурди уре э Москов. Илья дарафди э тербие вегуьрде э Бауманке, э инженерни факультет – лап хубе хундение институт, метлеб омборгьо. Бэгъдовой комининиге вэхд тербие вегуьрди э журфак МГУ. Оммо э арти вогошди э хуне ве варасунде бегьем сохди торихлуье факультет ДГУ.

Э хьофдодигьо, вогошди э Дербенд, Илья бисдо бэхшвегир ВИА «Хубтее салгьо». Возири э гитаре, э скрипке, мэгlни хунди. Угьо возири э желдорклуб, кинотеатр «Ватан» ве э вежегьисдение мейдон э рэхьгьовуние богъче. Хундет мэгlни «Королева гуьзели», «Сие назу», мэгlнигьой «Мошини вэхд».

Оммо музыке бири энжэгъ бедел зиндегуни эну. Эки эну гьеммише бири зен ю, Марал. Угьо зигьисди гьееки пенжогь сал – ним девр, пурлуьи гьемме шоригьоревоз кифлети зиндегуни.

Марал Доновна бири неки зен ю – у бири эну кумексох, гье у, э киревоз у бэхш сохди мозол винире, чуьтам келе бире гlэилгьо, невегьо ве нишрегьо.

Рэхь жофо кеширеи хуьшдере Илья Абрамов сергуьрди эз сернуьш клуб э Махачкале, эзуновлейге Хунегьой пионергьо э Доруми-Сухокумск, песде бисдо рэхьберисох хундение-меслэхьэт дореи мескен Софун Кавкази гьовуни рэхь. Эз у кор бири гировунде оморе э сернуьши жирее школе-интернат №7 э Дербенд.

Эз гье и дэгъдэгъэ кор э гlэилгьоревоз бисдо вожиблуье гуьнжолуье сенигlэт эну. 20 сал у кор сохди сернуьш жирее школе-интернат э Дербенд, эже э гуьнжо овурди хуне эри гlэилгьо, комигьоки бешгъэ михьтож бири э зиёдие герми ве гъэйгъукеши.

Илья Александрович кумеки сохди э гlэилгьо э гъэдерлуье минкиниревоз, кумеки сохди э угьо, ки э у михьтож бири. Гье э у хуте сохди гlэилгьой хуьшдере: э ченд вэхд те рафде эз зиндегуни, у тевэгъэ сохди угьоре – Лие, Тамаре, Александре – кумекии сохде э екигегьо. Гье у бу неки весиет, у бу тегьер зиндегуни эну, коминире у хьисоб сохди вожиби дореи нуботлуье эрхэгьо.

Дербенд бу муьгьбет эну, чуьтам у хуьшдени ю кеиге нуьвуьсди. Шегьер рэхьмедуьле чумгьо, варасирение шегьер, эже гьеммише ловехэндеи. Вогошдеки эз хундеи э гъовуме шегьер, у мунди унжо гьеммишелуьги: гьэгъигъэт инжо, э гlэрей гъэлечеи диворгьо, э и тенге ве шевде, оммо герме мэхьэлегьо – жигегьой эну.

Гlэилгьой хуьшдере у дори гье у верзуьшигьо, э коминигьоревоз хуьшдени ю келе бири: рэхьмлуьи, дуьлфирегьуни, дануьсдеи шор бире зиндегунире. У гьишди муьгьбетлуье невегьоре ве нишрегьоре, ве эри гьерки эн угьо келебебе бу гьэгъигъэтлуье тилисимчи.

У тозе фикир сохди эри невегьо муьгlуьжуьзлуье возигьо. Екире эз угьо бу нум «Тилисимлуье жиге». Э хьэёт бири жиге е жире гьуьндуьри, ве невегьо зеверо верафди э унжо, ведешендет десгьо пойгьойре, келебебе миё бу угьоре гуьрде, эгенер угьо эз жиге ведарафдет. Асантие возисохи, оммо э у дебу гьемме: хьэвес, хэнде, шори дуь эекиревоз вэхд гировундеи. Келебебе дануьсдембу чаруьнде гIэдотлуье рузе э мигIид, гIэдотлуье хьэете – э суьхуьрлуье жиге.

Зиндегуни эн Илья Алексадрович бу очугъ ве пур. У бу музыкончи ве тербиедорегор, сервор ве мисвокор, бебе ве келебебе. Оммо лап бинелуьи – у бу рэхьмлуь, номуслуье одоми. У бу жуьн эн компание. Одоми-мигIид.

Имогьой невегьой энуре ве нишрегьоре гьисди суьхуьрлуье жиге — э еровурди э товун келебебе, комики дануьсдембу чаруьнде гIэдотлуье зиндегунире э вози, офде шори э чигьо ве ихдилот сохде э унигегьо. И суьхуьрлуье жиге гьич вэхд нисд нибу, эзу товун ки мьугьбет ве рэхьми, комигьореки у бэхш дорембу, зигьисденуьт э дуьлгьой энугьо, ки дануьсдембу уре.

Очугъэ еровурди эри Абрамов Илья Александрович.

Дофус зери: СТМЭГИ

Тержуьме сохди Ильканаева И.